Duꞌua kída sa nandoto Jesús
(Mr 16.1-8; Lc 24.1-12; Jn 20.1-10)
28
1 Yaꞌia kii sábado,a san yeꞌe diꞌnanuu kii semana, san saꞌan María Magdalena xiꞌin enka María sa ntsaꞌa ña yavi. 2 San níꞌi ntseꞌe kanda; kuan en x-ángel Ndios noo andivi, san tuꞌu dakanda yuu san sakuntsaku ndodo sata yuu. 3 San sandutsa ntseꞌe, san d̶oꞌno xi kuixi kachi ka. 4 Ndidaa soldadu ntsaa yavi kixi sa dayuꞌu ñaꞌan s-tsa san oni kidi ñaꞌan s-tsa, kuan yuꞌu ntseꞌe tsa san konaa s-tsa. 5 San kuenta saa ndidaa ñadeꞌe, san káꞌan ángel san sadaa xan:
—Ma yuꞌu yo ndidaa yo, kuan xini ntsu sa nanduku yo Jesús ia satakaa ñaꞌan xi en cruz. 6 Ti io ia jaꞌa, nandoto ia, kuenta kachi ia. Naꞌa ntsaꞌa ami katúu xikikoño ia. 7 See kunuꞌu ku kadaa xi ndidaa tsa inchiko ñaꞌan xi ia, sa nandoto ia sa io ndidaa ndii. San vita kundodonuu ia jnu yo ndidaa yo kiꞌin Galilea, juan kini ñaꞌan yo xi ia. Ma d̶ana yo ndidaa jaꞌa.
8 Danduu ndidaa ña yaꞌa kama ntseꞌe kée ña xiti yavi san yúꞌu ña doko ku-iꞌni ntseꞌe ña tuku, san xíno ntseꞌe ña ku kadaa ña toꞌon guaꞌa yaꞌa, xi ndidaa tsa nchiko ñaꞌan xi ia. 9 San kikii ni nánitaꞌan Jesús xiꞌin ña, san sadaa ia: ¡Kaꞌan ntsu xo! San kuyachi ña, san nono ntsa ña saꞌa ia, san chíñuꞌu ñaꞌan ña xi ia. 10 Danduu Jesús sadaa ia:
—Ma yuꞌu yo. Kuaꞌan san kadaa ndidaa sa guaꞌa yaꞌa xi ndidaa nu inchiko ñaꞌan ku ntsu, ndasa na kiꞌin nu Galilea. San juan kini ñaꞌan nu ku ntsu.
Sa nakani ndidaa soldadu
11 San neni kuaꞌan ña yaꞌa, san uu tsa ntsaa yavi kuan, núꞌu tsa ñuu san sadaa tsa xi ndidaa dutu kunaꞌnu ndidaa sa taꞌan. 12 San tsa yaꞌa nataka tsa xiꞌin ndidaa tsa nisaꞌnu, san teen tsa kuaꞌa ntseꞌe tuini san sañaꞌan tsa xi ndidaa soldadu, 13 san sadaa tsa:
—Kada vaa sa ndidaa tsa inchiko ñaꞌan s-tsa saꞌan tsa niñu san na duꞌu tsa yikikoño kuenta xidi da ndidaa da. 14 San tu jaꞌa na tsaku xi Pilatu tsa tastuni ñaꞌan yo ndidaa yo, san ntsuꞌu ndidaa ntsu tavi ñaꞌan ntsu yo ndasa ma en sa taꞌan yo.
15 San teen tsa yaꞌa ndidaa tsa tuini san kída tsa sa táꞌvichiion s-tsa. San toꞌon ya kaꞌan xi ndidaa ñayii ñuu Israel ntsa kii vita.
Sa táꞌvichiion Jesús xi ndidaa tsa nchiko ñaꞌan xi ia
(Mr 16.14-18; Lc 24.36-49; Jn 20.19-23)
16 San duꞌua, ndii uxi en tsa nchiko ñaꞌan xi ia kuáꞌan tsa Galilea,b tinduu táꞌvichiion Jesús. 17 San kuenta xíni ñaꞌan tsa xi ia, san chiñuꞌu ñaꞌan tsa; doko dagua tsa da daa ni ti xininchisa ñaꞌan tsa. 18 Jesús kuyachi ia jnu tsa yaꞌa, san káꞌan ia san sadaa ia:
—Ndios taxi ia sa tastuni ntsu ndidaa sa io andivi xiꞌin nuꞌu. 19 Juandiku kuaꞌan san kadaa sa na kininchisa ñaꞌan xiꞌin na kunchiko ñaꞌan ñayii kuntsu ndidaa ñuu io ñuyii,c san dakuendutsa ñaꞌan xiꞌin sa tastuni Tata, xiꞌin Daꞌa xiꞌin Espíritu Santu, 20 san dadana ñaꞌan na kada nu ndidaa sa táꞌvichiion ntsu. San ntsuꞌu, io ntsu xiꞌin yo ndidaa kii, ntsa na ndeꞌe ñuyii ya.