S-TOꞌON GUAꞌA JESÚS IA KUU CRISTU KUENTA CHÍDOTUNI MARCOS
Kuenta Juan tsa xu dakuendutsa ñaꞌan ío tsa desiertu
(Mt 3.1-12; Lc 3.1-9,15-17; Jn 1.19-28)
1
1 Duꞌua kesaꞌa s-toꞌon guaꞌa Jesucristu D̶aꞌa Ndios.
2 Kuenta yodotuni sa chidotuni Isaías x-profeta Ndios:
Tsandaꞌa ntsu nu na kaꞌan ku toꞌon ntsu antika
sa kuj xo, nu danuna xichi yo.
3 Tsa yaꞌa kana tsa desiertu:
“Danuna ni xichi Ndios ia kuu ku Toꞌo ndo, ndada ndaa ni xichi ia.”
4 Juan tsa dakuendutsa ñaꞌan duꞌua nanuu tsa desiertu, san káꞌan tsa sa na nata-uꞌu ndidaa ñayii kuan nakoo sakaꞌnu-ini sa saꞌa x-kuachi ñayii xiꞌin na kuendutsa ndidaa ñayii. 5 San xu kee ñayii ndidaa ndaꞌa ñuu io distritu Judea xiꞌin ndidaa ñayii io Jerusalén tuku; san xu niꞌi ndutsa tsa ndidaa tsa xi Juan yutsa Jordán, ora xu tuꞌu naꞌma tsa x-kuachi tsa.
6 Juan xu kuiꞌno tsa en doꞌno kuguaꞌa xiꞌin xidi camellu xiꞌin en ñee xu kunuꞌni ndodo tsa, san xu kaj tsa cheka xiꞌin ndudi timii io yuku. 7 San xu kachi tsa:
—Sata da vaxi en tsa kaꞌnu ntseꞌe ka sa kuj d̶a, juandiku ti nitaꞌvi da sa dandatsa da xeen nchisa tsa. 8 Dan dakuendutsa ñaꞌan da xiꞌin ndutsa jni ndidaa ni, doko tsa yaꞌa taj s-tsa sa tastuni Espíritu Santu.
Duꞌua taꞌan kuenta sendutsa Jesús
(Mt 3.13-17; Lc 3.21-22)
9 Taꞌan en kii Jesús kee ia Nazaret en ñuu io distritu Galilea, san kuenta saa ia sa io Juan, san Juan dakuendutsa ñaꞌan tsa yutsa Jordán. 10 San kuenta nana ia xiti ndutsa, xini ia sa nakaan andivi san Espíritu Santu noo sata ia naa en data. 11 San tsaku en tsa kaꞌan ntsa andivi:
—Yoꞌo kuu ku Daꞌa ntsu; nu xinimani ntsu xiꞌin taꞌan-ini ntsu.
Jaꞌa kaꞌan sa sakakuiꞌia nchóxi sa Jesús na kada ia kuachi
(Mt 4.1-11; Lc 4.1-13)
12 San Espíritu Santu ntsaka ñaꞌan xi ia kuaꞌan desiertu, 13 san juan ío ia uvidiko kii san ío ia sa io ndidaa kiti vii, san xitotuni ñaꞌan sakakuiꞌia; san ndidaa ángel xínokuachi jnu ia.
Jesús kesaꞌa ia x-chiion ia ñuu nani Galilea
(Mt 4.12-17; Lc 4.14-15)
14 Tuꞌu chintsadi ñaꞌan tsa ndidaa tsa xi Juan, san kuaꞌan Jesús Galilea sa kaꞌan ia toꞌon guaꞌa sa kuu sa nayii ñayii ndaꞌa Ndios, 15 san sadaa ia:
—Xíno taꞌan kii, kuan sa kuyachi sa tastuni Ndios ñayii. Nata-uꞌu sa kininchisa toꞌon guaꞌa ya.
Duꞌua taꞌan kuenta kana Jesús kumi tsayee teen chaka
(Mt 4.18-22; Lc 5.1-11)
16 San yaꞌia yachi ia jnu mar Galilea, san xini ia Simón xiꞌin Andrés ndiani tsa yaꞌa, soꞌno tsa xonochaka xiti ndutsa kuan kuu tsa tsa teen chaka. 17 San sadaa Jesús:
—Naꞌa san kunchiko ñaꞌa ku ntsu, san kada ntsu sa duꞌua dataka yo ñayii kuenta chaka.
18 San dandoo tsa yaꞌa xonochaka san kuaꞌan tsa ndidaa tsa.
19 San en taꞌa ka kanduu xini ia Jacobo xani Juan d̶aꞌa Zebedeu, san io tsa xiti en barku na kiku tsa xonochaka. 20 San kana ñaꞌan Jesús s-tsa san dandoo tsa s-tata tsa Zebedeu xiꞌin ndidaa ka tsa kidachiion xiꞌin tsa, san kuaꞌan tsa xiꞌin Jesús.
En tsayee neꞌe tachi kuiꞌia
(Lc 4.31-37)
21 San kuyii Jesús ñuu nani Capernaúm. San en sábado saꞌan Jesús veꞌe sinagoga, san kesaꞌa ia dakuaꞌa ñaꞌan ia. 22 San oni sanaa ndidaa ñayii kída ndidaa sa dakuaꞌa ñaꞌan ia, kuan dakuaꞌa ñaꞌan ia kuenta tsa tastuni nchisa, san adii kuenta dakuaꞌa ñaꞌan ndidaa tsa dakuaꞌa ñaꞌan ley. 23 San en tsayee neꞌe en tachi kuiꞌia io tsa xiti veꞌe kuan san niꞌi ntseꞌe kána tsa,
24 san kachi tsa: Nasa nchoj ni xiꞌin da ndidaa da Jesús Nazaret? Vaj ni datani ñaꞌan ni d̶a ndidaa da ña? Xini da andu kuu ni, ia ii tsandaꞌa Ndios.
25 San sadaa Jesús:
—¡Kadi xuꞌu yo! ¡san ti kee nu xan!
26 San kuiꞌia ntseꞌe kidiniꞌno ñaꞌan tachi kuiꞌia yaꞌa xi tsayee yaꞌa san kana tsa niꞌi ntseꞌe san kee tachi kuiꞌia. 27 San ndidaa ñayii xuku juan sani-ini ntseꞌe tsa, san ndatoꞌon tsa ndidaa mee tsa san kachi tsa:
Nasa kuu jaꞌa? ¡Jaꞌa kuu sa saa dakuaꞌa ñaꞌan tsa! ¡Kuan ntsa ndidaa tachi kuiꞌia tastuni tsa san xininchisa ñaꞌan s-tsa!
28 San kuvaa ntseꞌe ia ndidaa xichi, ndidaa ñuu io yachi Galilea.
Jaꞌa taꞌan kuenta ndadaguaꞌa Jesús nanaxido Pedru
(Mt 8.14-15; Lc 4.38-39)
29 San kee ia veꞌe sinagoga, san kuaꞌan ia xiꞌin Jacobo xiꞌin Juan xeꞌe Simón ndiani tsa Andrés. 30 San j-nana xido Simón katuu ña kuan ñoꞌon ntseꞌe ña kaꞌni; san sadaa tsa ndidaa tsa xi Jesús sa kuꞌu xan. 31 San kuyachi Jesús sa io ña, san teen ia ndaꞌa ña san ndaneꞌe ñaꞌan ia. San kuaꞌan ni kaꞌni ñoꞌon ña kuan san kesaꞌa ña danuu ña sa kaj s-tsa ndidaa tsa.
San duꞌua taꞌan kuenta ndadaguaꞌa ia kuaꞌa ntseꞌe ñayii kuꞌu xi
(Mt 8.16-17; Lc 4.40-41)
32 San sa kundaꞌvi ñuyii, ntsaka tsa ndidaa tsa kuaꞌa ntseꞌe tsa kuꞌu xi xiꞌin ndidaa tsa neꞌe tachi kuiꞌia saꞌan sa io Jesús. 33 San ndidaa ñayii ñuu yukua xuku ndieꞌe. 34 San ndada guaꞌa Jesús ndidaa ñayii neꞌe nadataꞌan nadatuꞌu kueꞌe, san xíko ia kuaꞌa ntseꞌe tachi kuiꞌia. San ti xu kueen mani ia sa kaꞌan ndidaa tachi kuiꞌia, kuan ndidaa jaꞌa xini ñaꞌan xi ia.
Jesús kaꞌan ia toꞌon guaꞌa ndidaa veꞌe nataka tsa ndidaa tsa
(Lc 4.42-44)
35 San kuiꞌi ka ndukoo ia, san kuaꞌan ia en xichi ti io nisadana sa juan kaꞌan ia xi Ndios. 36 Simón Pedru xiꞌin ndidaa ka tsa ntsaka taꞌan xiꞌin tsa saꞌan tsa sa nanduku ñaꞌan tsa xi ia. 37 San naniꞌi ñaꞌan tsa san sadaa tsa:
Ndidaa ñayii nanduku ñaꞌan jni.
38 San Jesús sadaa ia:
—Kiꞌin ndo enka xichi, ndidaa ñuu io yachi, ndasa na kaꞌan ntsu toꞌon yaꞌa juan tuku; kuan juandiku vaj ntsu.
39 San kuaꞌan ia ku kaꞌan ia ndidaa veꞌe sinagoga io ndidaa ndaꞌa ñuu Galilea, san xu kuiko ia tachi kuiꞌia.
Jesús ndadaguaꞌa ia en tsayee tsaꞌyu niꞌno mee
(Mt 8.1-4; Lc 5.12-16)
40 San tuꞌua ñaꞌan en tsayee tsaꞌyu xeen xi xi Jesús, san sakuinxiti tsa jnu ia, san sakondaꞌvi tsa:
—Toꞌo, tu nchoj ni, san ndadandoo ñaꞌan ni d̶a.
41 San Jesús kunda-ini ñaꞌan ia, san dakaa ia ndaꞌa ia san kukoꞌon ñaꞌan ia san sadaa ia:
—Nchoj ntsu. ¡Ndundoo!
42 San nonoo ni nduu doo tsa yaꞌa san nduguaꞌa tsa. 43 San antika sa nuꞌu tsa san sadaa Jesús:
44 —Ntsaꞌa ka, ma kadaa yo xi nisa en ñayii, doko kuaꞌan sa kiꞌin yo jnu dutu san doko sa táꞌvichiion Moisés jnu Ndios, ndasa na kini tsa yaꞌa ndidaa tsa sa ndundoo yo.
45 Doko kee tsa yaꞌa kuaꞌan tsa, san kada kesaꞌa tsa kídavaa tsa ndidaa sa taꞌan tsa, juandiku Jesús xu kiꞌin yuꞌu ia ndidaa ñuu, san xu kendoo ia sa ti io ñayii. Doko ndidaa xichi xu kee ñayii xu kiꞌin sa xu koo ia.