Jesús ndadaguaꞌa ia en tsa natii saꞌa xi
(Mt 9.1-8; Lc 5.17-26)
2
1 Kuyii nituku Jesús ñuu Capernaúm san yaꞌia uu kii san ku vaa sa io ia en veꞌe. 2 Kuaꞌa ntseꞌe ñayii saa sa io ia, san nisa ti kuaꞌa ka tsa ndidaa tsa veꞌe; san kaꞌan ia s-tsa ndidaa tsa toꞌon guaꞌa. 3 Danduu neꞌe tsa en kamilla san ntsaka tsa ndidaa tsa en tsayee ti kachi kaka san kumi tsa ntsaka ñaꞌan. 4 Doko ti kída sa yaꞌia tsa ntsa sa io Jesús, kuan kuaꞌa ntseꞌe ñayii io, juandiku ntsaka tsa tsa kuꞌu xi san káan tsa ichi diki veꞌe san noneꞌe tsa tsa kuꞌu xi kuan. 5 San xini Jesús sa xininchisa ndidaa tsa yaꞌa, san sadaa ia xi tsa kuꞌu xi:
Dito, x-kuachi ni sa ndoo jnu Ndios.
6 Uu tsa dadana ñaꞌan ley intsaku juan tsaku tsa san sani-ini tsa san kachi xanaa tsa: 7 Andu kuu nuyaꞌa kuan kaꞌan kuiꞌia nu xi Ndios, kuan mee ni Ndios kuu ia dandoo kuachi? 8 San xínituni Jesús sa sani-ini ndidaa tsa yaꞌa san nduku toꞌon ia:
—Naku duꞌua sani-ini ni ndidaa ni? 9 Nasa kama ka sa kadaa xi en tsa ti kachi kaka: “x-kuachi ni sa dandoo Ndios”, ña: “Ndukoo ni san nakeꞌen ni x-kamilla ni xan san kaka ni”? 10 Doko na dadana ñaꞌan da sa “ia nduu ñayii ñuyii yaꞌa” io sa tastuni nu sa koo nu sakaꞌnu-ini sa saꞌa ndidaa kuachi nuꞌu ya, danduu sadaa ia xi tsa yakua:
11 —Dito kaꞌan da ni, ndukoo ni, nakeꞌen ni x-kamilla ni xan san kunuꞌu ni xeꞌe ni. 12 San ndukoo tsa san nakeꞌen tsa x-kamilla tsa san xika tsa kee tsa jnu ndidaa tsa yaꞌa, san ndidaa tsa yaꞌa yuꞌu tsa san kidakaꞌnu tsa Ndios, san kachi tsa ndidaa tsa:
—Ti on xini ndo en sa duꞌua taꞌan kuenta jaꞌa.
Duꞌua kída sa kana ñaꞌan Jesús xi en tsayee nani Leví Mateu
(Mt 9.9-13; Lc 5.27-32)
13 Danduu saꞌan nituku Jesús sa io mar, san kuaꞌa ntseꞌe ñayii saa sa io ia, san dákuaꞌa ñaꞌa ia tsa ndidaa tsa. 14 San ichi yaꞌia ia xini ñaꞌan ia xi en tsayee nani Leví tsa yaꞌa kuu d̶aꞌa en tsayee nani Alfeu, intsaku tsa teyaꞌvi tsa sa sakuntsaku ndidaa tsa teen yaꞌvi tuini sa kuxi Roma. San Jesús sadaa ia:
—Kunchiko ñaꞌan ku ntsu.
Tsa yaꞌa ndukuin tsa sa nchiko ñaꞌan tsa kuaꞌan.
15 San taꞌan kuenta intsaku Jesús saxi ia xeꞌe Leví, san kuaꞌa ntseꞌe tsa teen yaꞌvi tuini xiꞌin kuaꞌa ka ñayii io x-kuachi xi yeꞌe mesa xiꞌin Jesús xiꞌin ndidaa tsa kuaꞌan xiꞌin ia, kuan kuaꞌa ntseꞌe ñayii nchiko ñaꞌan xi Jesús. 16 San xini ndidaa tsa dakuaꞌa ñaꞌan ley xiꞌin ndidaa fariseu sa saxi ia xiꞌin ndidaa ñayii io x-kuachi xi, san sadaa tsa xi ndi uxi-uu tsa nchiko ñaꞌan xi ia:
—Naku saxi maestru yo xan xiꞌin ndidaa tsa teyaꞌvi tuini sa kuxi Roma xiꞌin ndidaa ka ñayii io x-kuachi xi xan?
17 San tsaku xi Jesús san sadaa ia s-tsa ndidaa tsa:
—Ndidaa tsa io guaꞌa ti nandeꞌe doctor xi, maska sa ñayii kuꞌu xi. Ti vaj da ki kana da ñayii sani-ini sa kuu ñayii guaꞌa, vaj da ki kana da ñayii na kininchisa sa io x-kuachi xi.
Duꞌua dadana ñaꞌan Jesús sa na koonchitsa ñayii
(Mt 9.14-17; Lc 5.33-39)
18 En kii ñoꞌon nchitsa ndidaa tsa nchiko ñaꞌan xi Juan xiꞌin uu fariseu san uu ñayii saꞌan sa io Jesús san ndukutoꞌon tsa:
Naku sakoo nchitsa ndidaa tsa nchiko ñaꞌan xi Juan xiꞌin ndidaa fariseu san ndidaa tsa nchiko ñaꞌan xi mee ni xan ti sakoo nchitsa tsa ndidaa tsa?
19 Sadaa Jesús:
Ama guaꞌani koo nchitsa ndidaa tsa io viko tandaꞌa neni io nuyee tandaꞌa kuan sa io tsa ndidaa tsa ña? Neni io nuyee tandaꞌa kuan sa io tsa ndidaa tsa ma koo nchitsa tsa. 20 Doko kixi kii sa dita ñaꞌan xi nuyee kuan. San kii yukua koo nchitsa tsa ndidaa tsa.
21 Ti en na kikuntsaa taꞌan titsaa saa xiꞌin titsaa tuꞌu. Kuan ora ndoo titsaa saa san nakendii san xitakaa ñaꞌan xi titsaa tuꞌu san kuiꞌia ka sa kagua sa na ndata. 22 San nisa en ñayii ti choꞌon vinu tinchiꞌio saa xiti ñee tuꞌu. Kuan ora xisa vinu tinchiꞌio saa, san katu ñee san sakuintsayu vinu tinchiꞌio san ñee kuaan xita. Guaꞌa ka vinu tinchiꞌio saa na kee xiti ñee saa.
Jaꞌa taꞌan ndi uxi-uu tsa nchiko ñaꞌan xi Jesús kuenta saꞌnu tsa yoko trigu en kii kachi ley sa ndexavi ndidaa ñayii ñuu Israel
(Mt 12.1-8; Lc 6.1-5)
23 En sábado, yaꞌia Jesús xiti en itu io trigu, san ndidaa tsa nchiko ñaꞌan xi ia kesaꞌa tsa saꞌnu tsa xoko trigu sa kaj s-tsa. 24 San ndidaa fariseu sadaa tsa:
—Ntsaꞌa ka, naku kida nu sa ti guaꞌa sa kada nu kii yaꞌa?
25 San sadaa Jesús:
—Ama ti kaꞌvi yo sa kída David kuenta kuíta tsa xiꞌin ndidaa tsa kuaꞌan xiꞌin tsa kuaan ña; 26 Kuan Abiatar kuu dutu kunaꞌnu kuenta sayii David xeꞌe Ndios san saj tsa ita-stila sa doko xi Ndios, sa ndidaa ni dutu nitaꞌvi sa kaxi, san David sañaꞌan tsa xi ndidaa tsa kuaꞌan xiꞌin tsa?
27 San sadaa ia tuku:
—Sábado ya kuguaꞌa sa kuxi sa guaꞌa xi ñayii, san adi ñayii kuguaꞌa sa kuinokuachi xi kii yaꞌa. 28 Juandiku ia nduu ñayii ñuyii yaꞌa tastuni ñaꞌa nu xi sábado ya tuku.