S-TOꞌON GUAꞌA JESÚS IA KUU CRISTU KUENTA CHÍDOTUNI LUCAS
1
1 Kuaꞌa ñayii nduku modo sa chidotuni tal kuenta kuu xiꞌin taꞌan ndidaa sa taꞌan sa io ndo ndidaa ndo ya. 2 Duꞌua kuenta nakani ndidaa tsa xíni ntsa kuenta kesaꞌa, ndidaa tsa chíntsee ñaꞌan sa na kuvaa toꞌon yaꞌa. 3 Dan nánduku guaꞌa ntseꞌe da ntsa kuenta kesaꞌa san sani ini da sa sa guaꞌa kuu sa chidotuni da ndidaa jaꞌa duꞌua kuenta táꞌan, vi ta Teofilo, 4 ndasa na kini ndaa ni ndidaa sa ndaa dákuaꞌa ñaꞌan jni.
En x-ángel Ndios kaꞌan sa koo en d̶aꞌyiki Elizabet xiꞌin Zacarías
5 Kuenta kúu Herodes rey Judea, ío en tsa kuu dutu Israel, en tsa inani Zacarías san ío tsa grupo en tsa inani Abías san d̶eꞌe Zacarías inani ña Elizabet ña kuu j-raza Aarón. 6 Zacarías xiꞌin Elizabet kuu tsa ñayii io ndaa jnu Ndios, san xu kada tsa sa taꞌvichiion Ndios. 7 Doko ti io d̶aꞌa tsa nduu tsa kuan Elizabet ti xu kachi koo d̶aꞌa ña, san kúu savaꞌa ntseꞌe tsa nduu tsa.
8 En kii ndidaa dutu grupo sa ío Zacarías xinokuachi tsa veꞌe chiñuꞌu ñaꞌan xi Ndios. 9 San kuenta xu kuenchiion ndidaa dutu, chóꞌon tsa suerte san kida tocar ñaꞌan suerte xi Zacarías sa kendoo tsa veꞌe chiñuꞌu ñaꞌan xi ia sa dakayu tsa dusa. 10 Neni Zacarías kaniꞌni tsa dakayu tsa dusa, san ndidaa ñayii xikataꞌvi xi Ndios ndikeꞌe veꞌe chiñuꞌu ñaꞌan xi ia. 11 Danduu en x-ángel ia nanuu jnu Zacarías ichi ladu kuaꞌa sa in altar kayu dusa. 12 San Zacarías yúꞌu ntseꞌe tsa kuenta xíni tsa ángel. 13 Doko ángel sadaa:
—¡Ma yuꞌu yo Zacarías! Kuan ndidaa sa xikataꞌvi yo tsáku xi Ndios, koo en d̶aꞌa yo ndiaꞌan yo san danani ñaꞌan yo Juan jnu. 14 San ku-iꞌni ntseꞌe yo, san kuaꞌa ntseꞌe ñayii ku-iꞌni sa kaku nuyaꞌa. 15 Kuan nuyaꞌa ku kuu en nu kaꞌnu jnu Ndios san ma koꞌo nu vinu nisa alcohol san antika sa kaku nu koꞌon chitu nu Espíritu Santu. 16 San kada nu sa kuaꞌa ntseꞌe ñayii io ñuu Israel naxikokagua sa io Ndios ia ku S-toꞌo nu. 17 San nuyaꞌa koo Espíritu Ndios nu kuenta ío xi profeta nani Elías san kada nu sa na naxikokagua xanaa tadeꞌe xi d̶aꞌa tsa, san ndidaa nu ti xu nchu kininchisa ñaꞌan xi Ndios kininchisa ñaꞌan nu san duꞌua kada nu en ñuu io listo sa kini nchisa ñaꞌan xi nu tsandaꞌa ia.
18 San Zacarías sadaa tsa xi ángel:
—Na modo kini da sa sa ndaa kuu sa kaꞌan ni? kuan dan xiꞌin d̶eꞌe da savaꞌa da nduu da.
19 San sadaa ángel:
—Ntsuꞌu kuu Gabriel nu xinokuachi xi Ndios, ia yukua tsandaꞌa ñaꞌan kuntsu sa na kachitoꞌon ntsu toꞌon guaꞌa yaꞌa yo. 20 Doko vita sa ma kachi ka kaꞌan yo ntsaa na saa kii taꞌan ndidaa jaꞌa, ndasa ti xininchisa yo toꞌon yaꞌa. Doko ndidaa jaꞌa taꞌan na taꞌan kii.
21 Sa ndidaa ñayii ñuu ntsatu xi Zacarías, san ndúkutoꞌon tsa naku ntseꞌe da ku kuee tsa san ti kee tsa veꞌe chiñuꞌu ñaꞌan xi ia 22 Danduu kée tsa sa ti kachi ka kaꞌan tsa, san ndidaa tsa xínituni sa xini Zacarías en sa xini tsa kida Ndios, xiti veꞌe chiñuꞌu ñaꞌan xi ia, dakuiko ndaꞌa tsa jnu ndidaa tsa yaꞌa kuan ti káchi ka kaꞌan tsa.
23 Danduu kuenta xíno ndidaa kii xinokuachi tsa san kunuꞌu tsa xeꞌe tsa. 24 San Yaꞌia ndidaa kii yukua san Elizabet d̶eꞌe Zacarías ñóꞌon ña daꞌyiki, san oꞌon yoo ti kée ña san xu kachi ña: 25 “Ndios duꞌua kida ia da ndasa ma kuakuntsaa ñaꞌan ndidaa ñayii da.”
Duꞌua taꞌan kuenta kaꞌan ángel sa kaku Jesús
26 Yoo ku iñu ñoꞌon Elizabet daꞌa, tsandaꞌa Ndios ángel Gabriel en ñuu nani Nazaret sa kuu en xuun Galilea, 27 sa ío en nu ndee ii inani María san sa io sa tandaꞌa nu xiꞌin en nu inani José j-raza rey David, 28 ángel kuyii sa io nu san sadaa:
—Kaꞌan ntsu yo, yoꞌo nu xini guaꞌa Ndios; Ndios io xiꞌin yo, guaꞌadiko yo sa kuxi ndidaa ka ñadeꞌe.
29 María yúꞌu ntseꞌe nu sa tsaku jnu toꞌon yaꞌa san sáni-ini nu nasa nchukachi toꞌon yaꞌa. 30 Danduu ángel sadaa:
—Ma yuꞌu yo María kuan Ndios xiniguaꞌa ñaꞌan ia yo. 31 Vita koꞌon yo daꞌa san koo en d̶aꞌyiki yo san danani ñaꞌan yo JESÚS nu. 32 Ku kuu nu en ñayii kaꞌnu ntseꞌe san kunani nu d̶aꞌa Ndios ia kaꞌnu ntseꞌe, san Ndios kadañaꞌa ia nu en tsa tastuni kuenta kida ñaꞌan ia xi David. 33 Ndasa na tastuni nu ndidaa ndidaa ñayii kuu raza Jacob, san sa tastuni nu ma ndeꞌe ma kuita.
34 Danduu María ndukutoꞌon nu xi ángel:
—Na modo duꞌua taꞌan da san ti io da xiꞌin nisa en tsie?
35 Ángel sadaa:
—Espíritu Santu kixi sa io yo, san sa tastuni Ndios ia kaꞌnu ntseꞌe chindati ñaꞌan yo, juandiku nu yiki na kaku ku nani nu, nu ii xiꞌin d̶aꞌa Ndios. 36 Xayii yo Elizabet koo en d̶aꞌa nu san sa yee nu, sa kuu iñu yoo ñoꞌon nu daꞌyiki nu kaꞌan ñayii sa ti kachi koo d̶aꞌa xi. 37 Kuan ti io nisadana sa ma kachi kada Ndios.
38 Danduu María kachi nu:
—Dan na kuinokuachi da jnu Ndios san Ndios na kada ia sa kachi ni. Danduu ángel kunuꞌu.
María saꞌan nu sa koto ñaꞌan nu xi Elizabet
39 Ndidaa kii yukua ndeꞌe ntseꞌe kuaꞌan María en ñuu io tinduu Judea. 40 Kuyii nu xeꞌe Zacarías san kaꞌan nu xi Elizabet. 41 Kuenta tsaku xi Elizabet sa kaꞌan María san daꞌyiki sandagua nu xiti ña, san ña yaꞌa chitu ña Espíritu Santu, 42 san kána ña sa kachi ña:
—¡Xini guaꞌa ñaꞌan Ndios ka ncha sa kuxi ndidaa ka ñadeꞌe, xiꞌin guaꞌadiko daꞌyiki ñoꞌon nda xan! 43 Andu kuu ntsuꞌu juandiku kixi nana ku Toꞌo ndi ya ki koto ñaꞌan ña ku ndi? 44 Kuan tsaku ku ndi sa kaꞌan nda, san daꞌyiki ñoꞌon ndi ya, ku-iꞌni chi san sandagua chi. 45 Ndios taxi ia sa guaꞌa nda kuan xininchisa nda sa kachi ia sa taꞌan.
46 San María kachi nu:
Kida kaꞌnu da ku Toꞌo ndo,
47 san xanaa da ku-iꞌni xiꞌin Ndios ia kuu ia taxi sa nanitaꞌvi da,
48 kuan Ndios xini guaꞌa ñaꞌan ia da, dan xinokuachi da xi ia,
sa vita, xiꞌin ndidaa tiempu danani ñaꞌan ña, ña xiniguaꞌa ñaꞌan Ndios xi,
49 Kuan ia tastuni ntseꞌe kída ia kuaꞌa ntseꞌe sa naꞌnu d̶a.
San ia ii kuu ia.
50 Ndios ndidaa ndituꞌu tiempu kunda-ini ia ndidaa ñayii kidakaꞌnu ñaꞌan xi ia.
51 Xiꞌin sa tastuni ia kida ia sa naꞌnu kuan
datani ia ndidaa sa nchu kada ndidaa ña iꞌni.
52 Dita ia ndidaa ña tastuni ntseꞌe
san sani ñaꞌan ia nino xi ndidaa ña ku ndaꞌvi xininchisa ñaꞌan xi Ndios.
53 Kuaꞌa ntseꞌe sañaꞌan ia xi ndidaa ña kuita,
san danuꞌu duꞌua ia ndidaa ña kuika.
54 Chíntsee ia ñayii io Israel, ña xinokuachi xi ia,
san ti dana ñaꞌan ia sa kada ia sa guaꞌa xi ña yaꞌa.
55 Duꞌua kuenta sadaa ia xi ku tadeꞌe ndo,
Abraham xiꞌin ndidaa ka ñayii nchiko vaxi.
56 María ío nu xiꞌin Elizabet uni yoo danduu kunuꞌu nu xeꞌe nu.
Duꞌua kída sa kaku Juan tsa dakuendutsa ñaꞌan
57 Taꞌan kii kaku Elizabet san káku ña en nuyee yiki. 58 Ndidaa ñayii io yachi xiꞌin xayii ña ku-iꞌni xiꞌin ña. 59 San kuenta kuu una kii sa ntsaka tsa daꞌyiki sa na kada circuncidara ñaꞌan jnu, san nchuu danani ñaꞌan tsa Zacarías jnu, kuenta nani s-tata nu. 60 San j-nana nu kachi ña:
—¡Ñaꞌan! na kunani chi Juan.
61 Sadaa ndidaa ñayii io jukua:
—Doko nisa en xayii ni ti duꞌua nani.
62 Danduu ndukutoꞌon xi s-tata nuyiki nasa nchoj s-tsa sa na kunani nu. 63 San xíka tsa en tabla sa chidotuni tsa: sa na kunani nu Juan. San ndidaa xayii tsa yuꞌu. 64 Danduu kikii ni káꞌan Zacarías, san kesaꞌa tsa kidakaꞌnu tsa Ndios. 65 Ndidaa ñayii io kuenta duꞌua kída, kíxi sa dayuꞌu ñaꞌan s-tsa, san ndidaa ñayii io ndidaa tinduu Judea nitoꞌon sa duꞌua taꞌan ya. 66 Ndidaa tsa xu tsaku xi san xu kani-ini tsa:
—Nasa ku kuu nuyee yiki yaꞌa?
San Ndios xu chintsee ñaꞌan jnu.
Sa kaꞌan Zacarías
67 Zacarías s-tata nuyiki chítu tsa Espíritu Santu san káꞌan tsa sa sadaa Ndios sa taꞌan, san kachi tsa:
68 Na kukaꞌnu Ndios chiñuꞌu ndidaa ntsoo ñayii Israel
kuan váxi ia sa na nanitaꞌvi xuun ia.
69 Tsándaꞌa ia en tsa kaꞌnu kada sa nanitaꞌvi ndo
en xayii David tsa xínokuachi jnu ia.
70 Jaꞌa kuu sa kachi ia sa kada ia ntsa díꞌna sa káꞌan ndidaa x-profeta ii ia.
71 Sa natavi ñaꞌan ia ku ndo xi ndidaa tsa xini-uꞌu ñaꞌan ku ndo xiꞌin ndidaa tsa ti tai-ni ñaꞌan ku ndo,
72 duꞌua kida ia ndasa kunda-ini ñaꞌan ia xi ku ta deꞌe ndo xiꞌin
ti dana ia sa kuu tratu kída ia.
73 San jaꞌa kuu sa chonaꞌa ia xi ku tata ndo Abraham, sa taxi ia ku ndo,
74 san natavi ñaꞌan ia ku ndo xi tsa xini-uꞌu ñaꞌan ku ndo,
ndasa na kuu kuinokuachi ndo xi ia san ma yuꞌu ndo,
75 san na koo ndoo ndo xiꞌin na koo ndo modo nchoxi ia, ndidaa kii nakoo ndo ñuyii.
76 San yoꞌo vi daa ku kuu yo x-profeta Ndios ia kaꞌnu ntseꞌe,
kuan kundodonuu yo kiꞌin jnu ia san danuna yo xichi ia;
77 ndasa na kadaa yo xi xuun ia nasa kada ia
ndasa na niꞌi tsa sakaꞌnu-ini sa saꞌa x-kuachi tsa;
78 kuan ku Ndios ndo kunda-ini ñaꞌan ia ku ndo juandiku neꞌe ia
ntsa nino yukua sa dayeꞌe sa kuxi enka kii saa;
79 ndasa na yeꞌe xi ndidaa tsa ndinoo sa naa xiꞌin ndidaa tsa xika sa io x-kondati ndii;
ndasa na kaka ndo ichi guaꞌa ichi diko.
80 Nuyee yiki saꞌnu nu san niꞌntsee nu xiꞌin sa xininchisa nu Ndios san ío nu desiertu ntsa kii tsandaꞌa ñaꞌan Ndios ñuu Israel jnu.