San Mateo
Jesucristo yꞌap tyeety ajxy
1
1 Ëdaa jeꞌe lista ma jëduꞌun myiñën kujaay ja Jesucristo yꞌap tyeety ajxy, jeꞌe ja David yꞌapꞌajt yꞌokꞌajt, jeꞌe ja Abraham yꞌapꞌajt yꞌokꞌajt.
2 Ja Abraham jeꞌe ja Isaac tyeedyꞌajt, ja Isaac jeꞌe ja Jacob tyeedyꞌajt, a ja Jacob jeꞌe ja Judá tyeedyꞌajt mëdë pyuyaꞌay ajxy. 3 Ja Judá mëdë Tamar, jeꞌe ja Fares mëdë Zara ajxy tyajꞌajt tyeedyꞌajt, ja Fares jeꞌe ja Esrom tyeedyꞌajt, a ja Esrom jeꞌe ja Aram tyeedyꞌajt. 4 Ja Aram jeꞌe ja Aminadab tyeedyꞌajt, ja Aminadab jeꞌe ja Naasón tyeedyꞌajt, a ja Naasón jeꞌe ja Salmón tyeedyꞌajt. 5 Ja Salmón medë Rahab, jeꞌe ja Booz tyajꞌajt tyeedyꞌajt, ja Booz mëdë Rut jeꞌe ja Obed tyajꞌajt tyeedyꞌajt, a ja Obed jeꞌe ja Isaí tyeedyꞌajt. 6 ja Isaí jeꞌe ja rey David tyeedyꞌajt, ja rey David mët ja Urías tyoꞌoxyëgꞌajtëbë jeꞌe ja Salomón tyajꞌajt tyeedyꞌajt.
7 Ja Salomón jeꞌe ja Roboam tyeedyꞌajt, ja Roboam jeꞌe ja Abías tyeedyꞌajt, a ja Abías jeꞌe ja Asa tyeedyꞌajt. 8 Ja Asa jeꞌe ja Josafat tyeedyꞌajt, ja Josafat jeꞌe ja Joram tyeedyꞌajt, ja Joram jeꞌe ja Uzías tyeedyꞌajt. 9 Ja Uzías jeꞌe ja Jotam tyeedyꞌajt, ja Jotam jeꞌe ja Acaz tyeedyꞌajt, ja Acaz jeꞌe ja Ezequías tyeedyꞌajt. 10 Ja Ezequías jeꞌe ja Manasés tyeedyꞌajt, ja Manasés jeꞌe ja Amón tyeedyꞌajt, ja Amón jeꞌe ja Josías tyeedyꞌajt. 11 Ja Josías jeꞌe ja Jeconías mëdë pyuyaꞌay ajxy tyeedyꞌajt, mënit ajxy jeꞌe myiiñ gyaꞌay mënabë israelpë jëyaꞌay ajxy yajnëkxyëëjën tsumy myach Babilonia naax jooty,
12 Ja Jeconías jeꞌe ja Salatiel tyeedyꞌajt; tëëyëm ajxy ënajty yajnë́kxënë tsumy myach Babilonia naax jooty, mënit ja Salatiel myiiñ gyaꞌay; a ja Salatiel jeꞌe ja Zorobabel tyeedyꞌajt. 13 Ja Zorobabel jeꞌe ja Abiud tyeedyꞌajt, a ja Abiud jeꞌe ja Eliaquim tyeedyꞌajt, ja Eliaquim jeꞌe ja Azor tyeedyꞌajt. 14 Ja Azor jeꞌe ja Sadoc tyeedyꞌajt, ja Sadoc jeꞌe ja Aquim tyeedyꞌajt, ja Aquim jeꞌe ja Eliud tyeedyꞌajt. 15 Ja Eliud jeꞌe ja Eleazar tyeedyꞌajt, ja Eleazar jeꞌe ja Matán tyeedyꞌajt, ja Matán jeꞌe ja Jacob tyeedyꞌajt. 16 Ja Jacob jeꞌe ja José tyeedyꞌajt, ja María ñëꞌëyꞌapꞌajtëbë ma Jesús myiiñ gyaꞌayën, ja ajxy ënajty yajxëꞌajpyë Mesías.
17 Jëduꞌunts ajxy të chënaꞌay të jyuꞌukyꞌáty. Jim choꞌondaꞌaky mënabë Abraham jyuꞌukyꞌátyën ëxtë mënabë David jyuꞌukyꞌátyën, nëmajmákts ajxy ñajxy; jim choꞌondaꞌaky mënabë David jyuꞌukyꞌátytën ëxtë mënabë ajxy tsumy myach yajnëkxyëëjën Babilonia naax jooty, nëmajmákts ajxy ñajxpë; jim choꞌondaꞌaky mënabë judíos ajxy yajnëkxyëëjën Babilonia naax jooty ëxtë mënabë Mesías myiiñ gyaꞌayën, janë nëmajmákts ajxy ñajxpë.
Nebyë Jesucristo myiiñ gyaꞌay
18 Jëduꞌun jeꞌe jyajtë tyuunë mëná Jesucristo myiiñ gyaꞌayën: Ja María, ja Jesusë tyaj, tëë ënajty jeꞌe yajnëdëgëꞌëy jëduꞌunë José myëtpë́gët, pero kajnë ajxy ënajty yꞌametsmukñë, mënitë María myaxꞌuunkpaaty Espíritu Santoꞌaam. 19 Ja José, ja María ënajty ñëꞌëyꞌapꞌadaambyë, janteꞌemyꞌóy ënaꞌk ënajty jeꞌe, a kabë María ënajty yajtsëꞌëdyuꞌumbaadaꞌañ ma ja tsaan guꞌugën, mënit jyanëꞌëgeꞌegáñ ameeꞌch. 20 Jimnë José ënajty jeꞌe duꞌun wyinmaꞌantyꞌátyñë, mënitë Mëj Windsënë yꞌángel tuꞌuk wyinꞌijxy agumaꞌayꞌaam ku yꞌagëꞌëxëꞌëgëëy, nëm ñëmaayë:
—José, miichë David xyꞌapꞌajp xyꞌokꞌajp, kaꞌa mdsëꞌëgëꞌëy, toꞌoxyëjnëbë́k yëꞌë María, ix Espíritu Santoꞌaam yëꞌë të myaxꞌuunkpaady. 21 Pyaadaambyë María uunk tuꞌuk, Jesús myajxëꞌátët, jeꞌe gyëxpë ku ja jyëyaꞌay ja pyojpë kyëdyeey ajxy yajnëꞌëwaꞌadsánnë.
22 Paaty ëda duꞌun këjx jyadyëë tyuñëë, jëduꞌun tyëyjádët nebyë Mëj Windsë́n myënaañën ja Diosë myëdyaꞌaky jëgapxnajxpëꞌaam:
23 “Tuꞌugë këxyii ënaꞌk myaxꞌuunkpaadaꞌañ,
yaꞌay ënaꞌk yajleeꞌkꞌadaampy,
a Emanuel yajxëꞌataꞌañ.”
Jëduꞌun ëda duꞌun myëdyaꞌaktyëgëꞌëy “Dios ajxy xymyëdꞌijtëm”. 24 Ku José myaꞌabyëdëꞌky, mënit jyanchkudyuuñ nebyë Mëj Windsënë yꞌángel ënajty të yꞌaneꞌemyën, a wyinkpëjk ja María. 25 Pero kap ajxy ñëmyëtmaawë nebyë jëyaꞌay yꞌametsënaꞌayën ëxtë kunë María kyoꞌobꞌuunk yajmiiñ, a Jesús jeꞌe yajxëbejty.