San Marcos
Yaa Juan Mëyajnëbejpë Dios mëdyaꞌaky myëdyaꞌaky
1
1 Jëduꞌun ja oy jemy mëdyaꞌaky choꞌondaꞌaky ma Jesucristo kyapxyëë myëdyaꞌagyëëjën, ja Diosë yꞌUunk.
2 Jëduꞌun nej kyujaayën ma ja Diosë myëdyaꞌaky jëgapxnajxpë Isaías libro jootyën:
Chámëchë ngugapxy jëyëjp ngejxëꞌëky.
Jeꞌejë mnëë mduꞌu xyꞌaꞌixëdyaꞌagánëp.
3 Jim tëꞌëts nëꞌëgáp paktuumë jëyaꞌay tuꞌuk yaꞌaxy:
“Aꞌixëdyaꞌak ja nëë duꞌu ajxy ma ja Mëj Windsë́n gëxpën;
yakꞌoyëëyë ñëë dyuꞌu ajxy.”
4 Jëduꞌundsë Juan Mëyajnëbejpë myejch tëꞌëts nëꞌëgáp paktuum, jim ënajty myëyajnëbéty, a mët ënajty Dios mëdyaꞌaky myëdyaꞌaky ku ajxy jyootꞌwiꞌimbídët ma ja pyojpë kyëdyeey ajxyën a ween ajxy ñëbety jëduꞌun ajxy myëmeeꞌxëëjët. 5 Nëgëxyë jëyaꞌay ajxy ënajty ñëkxy ma Juangën, ja ajxy ënajty tsënaabyë Judea naax jooty mët jim Jerusalén, jimë pyojpë kyëdyeey ajxy ënajty ñëguꞌubë́ky ñëꞌadsoy ma ja Jordán mëj nëëjën, a jëduꞌunë Juan ënajty yajnëbéty.
6 Ja Juan ja wyit tyukxy, camello pëjt ëdyúñ ënajty jeꞌe, animal ak ëdyúñ ënajty wyëënꞌajpy, muꞌu mëdë mëjtsín nëë ënajty kyaapy yꞌuukpy. 7 Nëm ënajty Dios mëdyaꞌaky myëdyaꞌaky: “Ëxꞌaam jeꞌe tuꞌuk jyakmíñ ja yaꞌayëts jeꞌe maas mëj jaanch kejeejëch ëëch; ni weentyëch ngaꞌꞌawinmatsë kuch nnaaxtëgíkët jëduꞌunëchë kyëꞌëk nꞌagejtuutët nebyë moonsë kudoogëꞌëybën. 8 Nëëꞌaamëch mijts nyajnëbéty; pero jeꞌe, Espíritu Santoꞌaam ajxy jeꞌe xyajnëbetaꞌañ.”
Yaa Jesús ñëbety
9 Mënit jwëëpy jëduꞌumbë, mënitë Jesús choꞌoñ Nazaret jim Galilea naax jooty, jim myejch ma ja Jordán mëj nëëjën, a jimë Juan jeꞌe yajnëbejty. 10 Tuunë Jesús ñëꞌënëëbëdsëëmy, mënit yꞌijxy ku ja tsajt yꞌawaach a ku ja Espíritu Santo ënajty ñëgëdaꞌagyëë nebyë palomën. 11 Mënitë kapxy tuꞌuk yajmëdooy tsajtpootyp, nëm ënajty myënaꞌañ: “Miich jeꞌe ndsokyꞌUunk, janteꞌemyjotkujkëch nnëyjwëꞌëyëë ma miich këxpën.”
Yaa Jesús wyinmaꞌantyꞌixyëë
12 A teꞌemmyënítyë Diosë yꞌEspíritu ja Jesús yajnë́kxy jim tëꞌëts nëꞌëgáp paktuum. 13 A jimë Mëjkuꞌu Windsë́n ja Jesús wyinmaꞌantyꞌijxy juxychëgiꞌx xëë, awaꞌan animal agujk ënajty jim, a ja ángeles ja Jesús ajxy ënajty jim mëduump.
Yaa Jesús ja tyuunk kyapxy yajtsoꞌondaꞌaky
14 Tëëyëmë Juan ënajty chuumënë, mënitë Jesús ñëkxy Galilea naax jooty, jëduꞌun nëkxy Dios mëdyaꞌaky myëdyaꞌaky ja oy jemy mëdyaꞌaky ma ja Diosë yꞌaneꞌemdaaktën, 15 nëm ënajty myënaꞌañ: “Tëë ja tiempo yꞌabaady, a tëë ja Diosë yꞌaneꞌemdaakt myëwingóñ. ¡Jootꞌwiꞌimbít ajxy a mëbëk ja oy jemy mëdyaꞌaky ajxy!
Yaa Jesús ja akx majtspëdëjk mëdaaxkë myëjꞌyaꞌaxy
16 Jimë Jesús ënajty ñaxy Galilea mejpyaꞌa, mënitë Simón yꞌijxy mëdë pyuyaꞌay Andrés, jimë kyuꞌujwijptsaay ajxy ënajty pyëdaꞌaky mejy jooty, ix akx majtspëdëjk ajxy ënajty jeꞌe. 17 Nëmë Jesús ja nëmetspë ajxy ñëmaay:
—Ëch ajxy pamiinëk, a jëduꞌun nepy mijts ijty mguꞌujwípyën, jëduꞌun mëwiin mijts nyajtuunkpaadaꞌañ ma ja jëyaꞌay ajxyën, jëduꞌun ajxy myajmínët mach ëëchën.
18 Mënityë kyuꞌujwijptsaay ajxy jyanchnëꞌëgeeky, pyanëkxë Jesús ajxy. 19 Ku Jesús weentyë jyaknëkxy, jimë jëyaꞌay myëwiinkpë yꞌijxkumbë tuꞌ keꞌex, Jacobo mëdë Juan, ja Zebedeo yꞌuunk ajxy; jiipy ajxy ënajty barco jooty kyuꞌujwijptsaay axodsëꞌëy. 20 Mënityë Jesús ja yaꞌay ajxy myëjꞌyaaxy; a ñëꞌëgeek ja tyeety Zebedeo ajxy jiipy barco jooty mëdë myoonsë ajxy, a pyanëkxë Jesús ajxyën.
Tuꞌuk ja jëyaꞌay axëëk poj mëët
21 Mënitë Jesús ajxy myejtsnë Capernaúm. A ku ja sábado xëë yꞌabaaty, nëkxë Jesús jim sinagoga a jim tyëgëëy yajnëꞌixëëbyë. 22 Yakjwëëbyë kuꞌuk ajxy ënajty nepy ënajty yajnëꞌixëꞌëyën, ix mëj kuꞌudujt mëët ënajty yajnëꞌixëꞌëy, kaꞌa jyëduꞌunë nebyë ley yajnëꞌixëëbyëdëjk ajxyën. 23 A nëgoo ja jëyaꞌay tuꞌuk ñëꞌëtëgëëy yaaxpë, axëëk poj ënajty myëët:
24 —¡Miich Jesús, nazaretpë jëyaꞌay!, ¿tii ëjts ku xymyëdsibëꞌëy? ¿Nej paaty të mmiñ ku ëjts xyajkuꞌudëgoyaꞌañë? ¡Nnëjwëëbyëch pën miich! ¡Miich jeꞌe ja Diosë Wyaꞌatspë!
25 Pero yꞌojë Jesús ja axëëk poj, nëm ñëmaay:
—¡Amón, pëdsëm jiipy ma yëꞌë yaꞌayën!
26 Mënitë axëëk poj ja yaꞌay oy oyë yajꞌyajch yajtëëꞌpy, oy oyë yajꞌyaꞌaxꞌooꞌkë, a pëdsëëm jeꞌejën ma ja yaꞌayën. 27 Jyanteꞌemꞌyakjwëëy ajxy jëduꞌun nëgëxyë, a nëm ajxy ënajty ñëmyëyajtëyëë amíñ axyëpy:
—¿Tii ëdaꞌa yëꞌë duꞌun? ¿Nej awinjemy ëdaꞌa yëꞌë duꞌun yajnëꞌixëꞌëyë? ¡Mëj kuꞌudujt mëët yëꞌë yaꞌay yꞌaneꞌemy ëxtë ma yëꞌë axëëk pojën, a mamëdyaꞌakmyëbëjkëp yëꞌë!
28 Janteꞌemkyubákyë Jesús xii yaa tyëgëëy ixyꞌajt mëdoyꞌajtëbë mëduꞌuntyë Galilea naax jooty.
Yaa Jesús ja Pedro myëꞌët ok yajpaꞌamnajxë
29 Tuunë ajxy ñëꞌëpëdsëëmy sinagoga, mënitë Jesús ñëkxy mëdë Jacobo tyadsë Juan ma Simón mëdë Andrés tyëjk ajxyën. 30 Ja Simón ja myëꞌët ok ënajty paꞌam goꞌnaapy, tobyaꞌam ënajty myëët, a mënityë Jesús jëduꞌun yꞌawaanëxë. 31 Mënítëdsë Jesús ja toꞌoxyëjk wyingumedsëëy, myajts kyëꞌë gëxp, jëduꞌun pyuꞌubejty ku tyënaayëꞌëgët; a teꞌemmyënítyë tyobyaꞌam tyeꞌemtyëjch, a tëgëëy ja toꞌoxyëjkë Jesús mëduumbë.
Yaa Jesús ja jëyaꞌay may yajpaꞌamnáxy
32 Nëgooyë wyindsuꞌujëëñë, ku xëë kyuꞌunajxnë, mënitë Jesús yajnëmejtsë mëduꞌuntyë ajxy ënajty pyëgyëë, mët ja ajxy ënajty të myëjkuꞌujottëgëꞌëyëëjëbë. 33 Nëgëxyë kajpt jëyaꞌay ajxy myaymyujky cham ajxy ënajty ñëyꞌaguj ñëyꞌaboonëꞌëyëë, ëxtë tëgꞌaaw jooty paaty ajxy ënajty. 34 A mayë Jesús yajpaꞌamnajxy ja ajxy ënajty maydyuꞌu paꞌam bëjkëbë, a mayë mëjkuꞌu yakjotpëdsëëmy, a kabë mëjkuꞌu ënajty ñëꞌëgëyajkápxy, ix ñëjwëëpy ajxy ënajty jeꞌe pënë Jesús ënajty.
Yaa Jesús Dios mëdyaꞌaky myëdyaꞌaky jim Galilea naax jooty
35 Mëbaatnë ënajty, jeꞌenë ënajty wyingoodsë, mënitë Jesús pyëdëꞌky, anëdyuꞌumduum ñëkxy kojxtënaabyë. 36 A ja Simón mët ja ajxy ënajty myëëtpë, tëgëëy ajxy jeꞌe Jesús ëxtaabyë. 37 A ku ajxy pyaaty, nëm ajxy ñëmaay:
Nëgëxyë ënaꞌk cham xyjawëꞌëyꞌëxtaꞌay.
38 Pero nëm ajxy ñëmaayë:
—Jam ajxy ma ja kajpt winduum agonbën, jëduꞌunëch jim nëkxy nDios mëdyaꞌaky myëdyaꞌaky, ix jeꞌe gyë́xpëch yaa të nmiñ të nmech.
39 Këjxëdsë Jesús ja Galilea naax wyinꞌwëdity, jim sinagoga ënajty Dios mëdyaꞌaky myëdyaꞌaky a yakjotpëdsëëmbyë mëjkuꞌu ënajty.
Yaa Jesús ja lepra puꞌuts paꞌam bëjkëbë yajpaꞌamnáxy
40 Tuꞌugë jëyaꞌay myejch ma Jesusën lepra puꞌuts pëjkëp ënajty, mënit wyinjijkëdaaky, a nëm ñëmaay:
—Pë mdsojpy jëduꞌun, óyëch xyajꞌwaꞌats xyajtségët.
41 Ñajtsꞌëyowëëyë Jesús ja yaꞌay, xyajtëëwë kyëꞌë, mënit ñëꞌëdooñ, a nëm ñëmaay:
—¡Ndsojpyëch jëduꞌun! ¡Waatsnë tsejnë!
42 Tuunë Jesús jëduꞌun ñëꞌëmënaañ, teꞌemmyënítyë lepra puꞌuts paꞌam yꞌadëgoyëëy, waꞌats oy ja yaꞌay myëꞌëmëëñë. 43 Mënityë Jesús ja yaꞌay tyeꞌemñëmaay ku ñë́kxët, pero jëyëjp oy oy myëgapxy yꞌaneꞌemy, 44 nëm ñëmaay: Ukꞌix, kaꞌa pën mnëꞌëgëꞌawaanë, jagoo mëbëky nëkx nëgyapxkëꞌëxëꞌëgëë ma ja teedyën, a manëkx ja yojxëëk ku të mwaꞌach të mdseky, jëduꞌun nebyë Moisés yꞌaneꞌemyën, jëduꞌun mdëyꞌajtꞌyégët ma ja wyinduum ajxyën.
45 Pero tuunë ja yaꞌay ñëꞌënë́kxy, mënityë jeꞌe tyëgëëy amëdyaagëëbyë nepy jaty ënajty të jyadyëë të tyuñëë, paadyë Jesús ënajty mëjtuum maydyuum kyaꞌadeꞌemtyëgëꞌëwánë ma jatyë kajpt ënajty, jim ënajty myëꞌëmëëñë jëgemduum ma jëyaꞌay kyaꞌityën; pero ooy jyajëduꞌunë ñënëkxypë tsaan guꞌuk ja Jesús ajxy ënajty, winduꞌumgyajpt ajxy ënajty chooñ.