Bhihita Metaa Nebuhino Matius
Kaatono Wamba
Bhihita Metaa aini nobuhie Matius. Anoa ini seemie maiꞌaono ne rasulu ompulu hoduano (Mat 9:9-13). Weo kitabino Markus bhe Lukas dokonae Lewi, seemie mealano sewa (Mrk 2:13-17; Luk 5:27-32). Weo kitabino ini Matius notalesaane putae Yesus maitu Mesias Omputo Fosalamatino, sampuꞌano Daud, toka nedhandiꞌaono Lahataꞌala mpini dhamani wawono. Weo kitabi aini Yesus nentela dokonae Anano tawa Sampuꞌano Daud (1:1; 9:27; 12:23; 15:22; 20:30-31; 21:9,15; 22:41-45).
Nobhahi dua pakuno Matius notalesaane putae toka nekosuahaꞌaondo ana-anabii dhamani wawono nokoꞌulamo ne dadino Yesus. Nentela notibuhi “Aini nokadhadhia mbali nokoꞌulaꞌao bhoasaono Ompu nefosampendo anabii” (1:22-23; 2:5-6, 15, 17-18, 23; 3:3; 4:14-16; 8:17; 12:17-21; 13:35; 21:4-5, 16; 26:31; 27:9-10). Pedamo anaꞌa nentalea sepaliꞌa putae Yesus maitu Omputo Fosalamatino nedhandiꞌaono Lahataꞌala bhe nemantaa-ntaaꞌaondo miendo Israel.
Weo kitabi aini nandoo lima honda kafoinaꞌu bhalano peda aini:
1. Kafoinaꞌuno Yesus te wawono kabhawo (psl 5-7).
2. Kafoinaꞌuno Yesus ne anaguhuꞌino dakumala daefolele Bhihita Metaa (9:35 - 11:1).
3. Kafoinaꞌuno Yesus nepake kapalenda, notalesao maꞌanano Kafopahintaꞌano Lahataꞌala (13:1-52).
4. Kafoinaꞌuno Yesus nopulaoꞌao sifati medando ae mantasiꞌano so mie mangkafie (psl 18).
5. Kafoinaꞌuno Yesus nopulaoꞌao so kumadhadhiaꞌano mada kaowu (psl 24 - 25).