Bhihita Metaa Nebuhino Markus
Kaatono Wamba
Bhihita Metaa aini nobuhie Markus. Ane doangkafi tula-tula pata tibuhino, Markus noposabhangkaꞌao Petrus weo foleleꞌano Bhihita Metaa, dadiꞌanomo sabhaha nefetingkeno ne Petrus nebuhinomo dua ne kitabi aini. Ambado dobuhie we kotano Roma. Padamo dua noposabhangka bhe Paulus bhe Barnabas (Tul 13:1-13). Kiha-kiha Markusmo dua ini anaꞌi moꞌane milei kalembi-lembino wakutuu dohako Yesus (14:51-52).
Kabuhino notandakie peda aini: “Ainimo Bhihita Metaa metula-tulaꞌaono Yesus Kristus, Anano Lahataꞌala.” Markus nofotiwoha putae Yesus kotu-kotuꞌu Mesias Omputo Fosalamatino, Anano Lahataꞌala (1:1, 11, 24; 3:11; 5:7; 8:29; 9:7; 14:61-62; 15:39).
Markus nofotiwoha kaitae dua peda amai kabhalano kuasano Yesus nofofoinaꞌu, nefekaꞌosa mie mosaki, bhe neꞌamponi dhosa. Weo kitabino ini Markus nefosibhala mpuu nehabuno Yesus, noliuꞌe wambano kafoinaꞌuno. Patudhuno dua kitabi aini namekamatangka lalontoomu mie marasaeano, damangkafi Yesus o ae maka dua so newisekintoomu (8:34-38; 10:29-31).