मुनेता पुटमुळि
मुने देवुळि इळ्ता बूमतुन, पोग़ोटा बूमतुन पुटिह कीता
1
1 सुरुमुने, देवुळि इळ्ता बूमतुन, पोग़ोटा बूमतुन पुटिह कीता.2 अस्के इद बूममेंड पूरा एग़े मता, एतुन विळ्सिसि इद बूमते बातय इलवा मता, इद बूमि मुर्गंगाते मेर्क्ने मता, बेरा सम्दुरता पोग़ोन देवुळता जीवा वेलियसोर मंदु.
मुनेता दिया देवुळि वेह्च कीता
3 अस्के देवुळि “वेह्च आयि,” इनजोर इता, इतस्केन वेह्च आता. 4 तान ऊळिसि अद वेह्च देवुळतुह्क बेस दिसता, अस्के ईकळताहि वेह्चतुन एग़्पिह कीता. 5 एग़्पिह कीसि अद वेह्चतुन बार पियल इता, ईकळतुन बार नग़्का इता, पया ईकळ मारिस इमा दिया वेह्च आता, इद मुनेता दिया आंदु.
इमा दिया इद बूमतग्डा वळ्गा एतुन पोग़ोन ओता
6 इमा दिया “इद बूमता एग़ु रेंड तूस्क आयलाहि एता नडुमि पैंदा आयि,” इंन्जि देवुळ इता. 7 अस्के अद्रमे, देवुळि एतुन रेंड तूस्क कीसि पैंदा कीता, अव रेंड तूस्कनग्डाहि उंद तूस पैंदाता पोग़ोन अता, उंद तूस इद बूमते मता. 8 अस्के अद पैंदातुन पोग़ोटा बूम इता, पया ईकळ मारिस इमा दिया वेह्च आता, इद दुस्रा दिया आंदु.
मूंड दियाने वतता बूमि ओसो जाळिङ-जबाङ, मराङ पंडटा
9 इमा दिया “इळ्ता एग़ उंद जागा जमा आसि वतता बूमि दिसि,” इंन्जि देवुळ इता, इतस्के अद्रमे आता. 10 अस्के अद वतता जागातुन नेल इता, ओसो वेल्लाय एग़ गुम आस मता, अदिन बार सम्दुर इता, इद देवुळतुह्क बेस दिसता. 11 ओसो “इद बूमते अलग-अलग जातिनाङ, पुंगेह्क पुयनाङ जाळिङ-जबाङ, अनमताङ पोर्ह्काङ, कायाङ आदनाङ पोर्ह्काङ-मराङ पुटिङ,” इंन्जि देवुळ इता. 12 अस्के अद्रमे बूमते सबे अलग-अलग जातिनाङ पुंगेह्क पुयनाङ जाळिङ-जबाङ, कायाङ आदनाङ पोर्ह्काङ-मराङ पुटटाङ, इव सबे देवुळतुह्क बेस दिसताङ. 13 पया ईकळ मारिस इमा दिया वेह्च आता, इव मूंड दियाङ आंदुङ. इर्ङम
नालुङ दियाने पोग़ोटा बूमतगा पोळ्दु, नेला, उकाङ पंडटा
14 इमा दिया “नग़्काताहि पियदुन अलग कीयलाहि पोग़ोटा बूमतगा दींचनाङ आयिङ. इव दींचनव इतेके दियाङ, वर्साङ, पोल्वाङ इविना सीना तोहतलाह आयनुङ,” इनजोर देवुळ इता. 15 अद्रमे इळ्ता बूमतगा वेह्च ईयलाह वने आयनुङ इंन्जि इता, पया अव अद्रमे आताङ. 16 अस्के देवुळि रेंड बेराङ दींचनाङ पंडटा, पियलतुह्क पका दींचलाह बार पोळ्दु, नग़्काटुह्क कम दींचलाह बार नेला. अद्रमे उकाङ वने देवुळि पंडटा. 17 इद बूमतगा वेह्च ईयलाहि अविन देवुळ पोग़ोटा बूमते तासता. 18 देवुळि इव दींचनविन नग़्का-पियलि वेह्च ईयलाहि ओसो नग़्कातुन पियलताहि अलग कीयलाहि तासता, इव सबे देवुळतुह्क बेस दिसताङ. 19 पया पोळ्द अतु, इमा दिया पङवियता, इव नालुङ दियाङ आंदुङ.
एयुङ दियाने एतगा मनदनाङ जन्वर्क ओसो पग़िनाङ पिटेङ पंडटा
20 इमा दिया “एतगा मनदनाङ सबे जन्वर्क पुटिसि निंदिङ, अद्रमे पोग़ोटा बूमतगा पग़िनाङ पिटेङ वेने पुटिङ,” इंन्जि देवुळ इता. 21 अद्रमे देवुळि सबे जातिनाङ उड्लाङ-बेराङ एतग वेलियनाङ जन्वर्क पुटिह कीता, अहे सबे जातिनाङ पोग़ोट्क पग़िनाङ पिटेङ वेने पुटिह कीता, इव सबे देवुळतुह्क बेस दिसताङ. 22 इव सबेटविन देवुळि बर्कत ईसि इता, “एतगा मनदनाङ जन्वर्क वेल्ला जालपिल आसि, सम्दुरमेंड तेग़ आयिङ, अहे पिटेङ वेने जालपिल आसि बूममेंड तेग़ आयिङ,” इंन्जि इता. 23 पया पोळ्द अतु, इमा दिया पङवियता, इव एयुङ दियाङ आंदुङ.
आरुङ दियाने बूमतगा जन्वर्किन ओसो मन्कन पंडटा
24 पया देवुळ इता, “वततद बूमतगा सबे अलग-अलग जातिनाङ मूकोदोयोङ, गेळाताङ जन्वर्क, बूमतगा कोरियनाङ-बेङनाङ जन्वर्क, पुटिङ,” इता. इतस्के अव अद्रमे पुटटाङ. 25 देवुळि सबे जातिनाङ मूकोदोयोङ, गेळाताङ जन्वर्क, बूमतगा कोरियनाङ-बेङनाङ जन्वर्क पंडटा, इव सबे देवुळतुह्क बेस दिसताङ. 26 ओसो देवुळ इता, “नावा जीवा बेद्रम मन्ह्ता, अद्रमे मान्वन पंडिसि ओन्क जीवा ईयिङ, सबे सम्दुरताङ मीन्कु, पोग़ोट्क पग़िनाङ पिटेङ, मूकोदोयोङ, इव सबेटविना पोग़ोन, अहे पूरा बूमतगा ओसो बूमतगा ताकनवु कतमतविना पोग़ोन ओरा अदिकर मनदग़ा,” इंन्जि इता. 27 इद्रमलेह्का
देवुळि तना जीवा बेद्रम मन्ह्ता,
अद्रमे मान्वन पंडिसि ओन्क जीवा ईता.
आंचाळ-कोय्तोग़ इद्रम ओरिन पंडटा.
28 पंडटापया ओरिन इता, “मीटु मग़मियाळ आसि इद बूममेंड आम्ह्टु, ओसो इद पूरा बूमि नीवा कय इळ्न मनदग़ा. सम्दुरताङ मीन्कु, पोग़ोट्क पग़िनाङ पिटेङ, मूकोदोयोङ, इव सबेटविना पोग़ोन अदिकर तासाट,” इंन्जि देवुळ ओरिन बर्कतताङ पोल्लोङ इता. 29 इंन्जि ओसो उंद पोल्लो देवुळ इता, “केंजाट, इद बूमते मनदनाङ सबे पुंगेह्क पुयनाङ जाळिङ-जबाङ, अनमताङ पोर्ह्काङ, कायाङ आदनाङ पोर्ह्काङ-मराङ नना मीक ईतन, अव मीक तिनदलाह आयनुङ. 30 अद्रमे बेविस्कनगा जीवा मन्ह्ता इतेके इद बूमताङ सबे जन्वर्क, सबे पिटेङ, कोरियनाङ-बेङनाङ इव सबेटविह्क नना इद बूमताङ जाळिङ-जबाङ तिनदलाह ईतन,” इता. अस्के अद्रमे आता. 31 पया देवुळ बाताल-बाताल पंडटा अदिन ऊळता, इव सबे देवुळतुह्क पका बेस दिसताङ.
पया पोळ्द अतु इमा दिया पङवियता, इव आरुङ दियाङ आंदुङ.