नोहाना लोतोर ओडातगा नेङिह्तोर
7
1 पया ओडा मारतस्के यहोवा देवुळि नोहा मुय्तोन इता, “निमा नीवा लोतोरा संगे ओडातगा नेङाट, बह इतेके इद पीळतोर सबे लोकुरग्डाहि निमाय नाक सेतेम दिसतिन. 2-3 ओसो सबे जातिनाङ जन्वर्कना, पिटेना विजा पिसिसि पूरा बूममेंड आयलाह इनजि, मोक ईयलाह पोलनव जन्वर्कनग्डाहि एळुङ जोळिङ तलोग़-पोतलि, अद्रमे मोक ईयलाह पोलवव जन्वर्कनग्डाहि रेंड-रेंडु तलोग़-पोतलि; अहे सबे जातिनाङ पिटेनाङ एळुङ जोळिङ तलोग़-पोतलि, इद्रम ओडातगा ओळ्हा. 4 बाराह्क इतेके बेचोन नरुळतुन नना पंडटन अदिन इद बूमताहि बूळे कीयलाहि वारममेटा पया नग़्का-पियलि रेंड वीसाङ दियाङ पेग़ अर्हतकन,” इनजि देवुळ इता. 5 देवुळता इद पोल्लोतुन केंजिस नोहा मुय्तोग़ सबे अहे कीतोग़. 
नोहाना ओडातगा जन्वर्क नेङिह्ताङ (7:8-9)
6 इद बूमते बेरा उड्रा वातस्के नोहा मुय्तोग़ आरुङ नूह्क वर्सानोग़ मतोग़. 7 ओग़ तनाङ मग़्कु, मुते, कोयास्कना संगे उड्राताहि पिसलाहि ओडातगा नेङतोर. 8-9 अद्रमे देवुळ नोहान वेहच मतपु मोक ईयनाङ, मोक एवाङ जन्वर्क, पिटेङ, कोरियनाङ-बेङनाङ सबे जन्वर्कनग्डाहि जोळिङ-जोळिङ आसि तलोग़-पोतलि ओडातगा नोहानेके अताङ.
बेरा उड्रा वास्ता
10 एळुङ दियाना पया इद बूमते उड्राता पेग़ वायलाह बोटटा. 11 बेस्के नोहा मुय्तोग़ आरुङ नूह्क वर्सानोग़ मतोग़, अद वर्साता दुस्रा नेलाता सत्रा तारिकते अदे दिया,
इळ्ता बूमताङ कनिर्क बल्नेन पेसताङ.
पोग़ोटा बूमता पेग़ जोरिनाङ-जोरिङ अरता.
12 अस्के रेंड वीसाङ दियाङ नग़्का-पियलि इद बूमते पेग़ अरसोरेन मता. 13 पेग़ अरतदे दिया नोहा मुय्तोग़, तना मुते, मुवुर मग़्कु सेम, हाम, यापेत ओसो मूंड कोयास्कु ओडातगा नेङतोर. 14-16 ओसो सबे जातिनाङ गेळाताङ जन्वर्क, अय कीयनाङ जन्वर्क, इळ्तुह्क बेङनाङ-कोरियनाङ जन्वर्क, सबे जातिनाङ पिटेङ ओसो मारेने पग़यनवु इव सबे ओडातेके अताङ. देवुळ वेहतपु उंद-उंद जोळि तलोग़-पोतलि इद्रम ओडातगा नोहा मुय्तोनेके अताङ, अस्के पया देवुळि ओडाता तेल्पतुन केहचीता.
17 इद्रमलेह्का रेंड वीसाङ दियाङ पेग़ रोमवालेवा अरता, इद बूमतगा उड्रा बेर्ससोर अता, अहे एता पोग़ोन ओडा तेदसोर अता. 18 अद उड्रा पूरा बूमतुन मुळ्हता, अह आसि एता पोग़ोन ओडा तेलसोर मता. 19-20 इद बूमताङ सबे बेराङ-बेराङ मेटाह्कु पंद्रा कुटाङ पोग़ोन एग़ अता, कतम मेटाङ मुळ्न्ताङ. 21-22 अस्के बेव-बेव इद बूमते जीवात मताङ अव सबे बूळेम आताङ: सबे अय कीयनाङ जन्वर्क, गेळाताङ जन्वर्क, इळ्तुह्क बेङसोर-कोरियसोर दायनाङ जन्वर्कु, सबे पिटेङ, सबे मन्कलोरु, उड्राते मुळ्न्दिस बूळेम आतोर. 23 इद्रमे देवुळि मन्कलोरिन, जन्वर्किन, पिटेनु, सबे इद बूमता नरुळतुन बूळे कीता, कतमतोरिन बूळे कीता देवुळि! मात्रम नोहाना लोतोर पिसतोर, ओना संगे ओडाते मताङ सबे जन्वर्क वेने पिसताङ. 24 पया डेडानूर दियाङ एवनाहि उड्रा बूमतुन मुळ्हचि निच मता.