देवुळता किरियातुन करल कीयनदु डायना रिवज
17
1 तेरा वर्साना पया देवुळि ओसोवने अब्रमिन कलयिस वळ्ह्कता. “नना बेरा डीसाता देवुळतन आंदन, तेन निमा सीता तासिस नावा मुनेह कर्तुळते मनु. 2 अह मतिन इतेके नीवा संगे कीतद किरियातुन माट करल कीकल. अद किरिया बेद्रमता इतेके, नीवा जालपितुन लेक पग़वाह आङनाह कीकन,” इनजोर इता.3 अस्के अब्रम देवुळता मुनेह दंडुम अरतोग़. देवुळि ओन इद्रम इता, 4 “नीवा संगे नावा बाताल किरिया इतेके, नीकु वेल्लाङे देसेह्कना पेदामुय्तोग़ कीकन. 5 अदिह्के नना नीवा पेदिरतुनु मिळ्ह्तकन. इंजेटाहि नीवा पेदिर ‘अब्रम’ (इतेके ‘बेरोग़ तपे’) मनो आयग़ा, मति नीकु अब्रहम (इतेके ‘वेल्लाटोरा तपे’) इनदनुर. नना नीकु इद पेदिर बाराह्क तासिह्नन इतेके, निमा वेल्लाङे देसेह्कना पेदामुय्तोनिन आयकिन. 6 नना नीकु वेल्लाये तेग़मुल कीसि, मियग्डाहि पूनाङ देसेह्क पुटिह कीकन. ओसो मीवा कूळताहि राजालोर वने पुटनुर. 7 नीवा नावा नडुमि मनदनद किरियातुन सिरप नीवाय संगे आयो, मति नीवा सबे जालपिलतोरा संगे वने करल कीय्ह्नन. बाराह्कु, नना नीवा ओसो नीवा सबे जालपिलतोरा देवुळतन आयकन. इद किरिया अमेसा अमेसातुह्क आयग़ा. 8 इंगो, निटमे! निमा इंजेके बेद देसेमतगा मनदलाह आतिन, अद कनान देसेम, पूराये नना नीक ओसो नीवा जालपिलतुह्कु अमेसातेनाह्क ईकन, ईसि नना ओरा देवुळतन वने आयकन,” इनजि इता.
9 देवुळि ओसो अब्रहमिन इता, “निमा वने नावा संगे कीतद किरियातुन माळा, नीवा पया नीवा जालपिलतोर वने पीळिनाङ पीळिङ माळिर,” इता. 10 अदिन बेद्रम माळना इतेके, मीवोर पेकोर-कोय्तोर कतमतोरिह्क डायना रिवज कीयाय पोयग़ा. 11 मीटु कोड-तोलातुनु डायिस पोहचीयनदु, इद रिवज मीवा-नावा नडुम आतव किरियाता सीना मनदग़ा. 12 बेस्के पेकाल आट दियानोग़ आयनोग़ अस्के मीट ओना डायना रिवज कीयना. अद्रमे मीवा सबे ओर्युल मन्कलोरा पेकोरिन डायना रिवज कीयनाय गावले, ओर मीवा लोते पुटटोर आयिर, इलवेके दुस्राङ देसेह्कनाहि असिस ततोर आयिर. 13 इद्रम लेह्का मावा किरियाता सीना मीवा मेंदुदगा अमेसा अमेसातुह्क मनदग़ा. 14 बोग़ मन्कल डायना रिवज केवोग़, ओनु मीवा लोकुरग्डाहि अलग विटळ तास पोयग़ा. बाराह्क इतेके ओग़ मन्कल नावा किरियातुन देहतोग़.
इसकिये करल कीतोग़ पेकाल
15 देवुळि ओसो अब्रहमिन इता, “नीवा मुते सारयिनु इंजेटाहि ‘सारय’ इनमाटु, ताना पेदिर ‘सारा’ मनदग़ा. 16 तान्क नना बर्कत ईकन, तानाय मेटे नीक ओर्वोग़ पेकान ईकन. अचोने आयो मति साराह्कु इचोन बर्कत ईकन इतेके अदु वेल्लाङे पूनाङ देसेह्कना तलोग़ आयग़ा. अव देसेह्कना राजालोरु वने तेनाय जालपिलतग्डाहि पुटनुर,” इता.
17 अब्रहम ओसोवने देवुळता मुनेह दंडुम अरतोग़. दंडुम अरसोरेने तनतनाय कवसोर, “नना नूर वर्सानोनन आतान, नावा मुते 90 वर्साना आता. माट इचोन सेळो-मुय्तोग़ आसि बह मग़-मियाळ आया पग़यकोम?” इनजोर आलिह कीतोग़.
18 अद्रम आलिह कीसि अब्रहम देवुळतुन इतोग़, “सामि! वेग़ नावा पेकाल इस्माल इतेके नीवा मुनेह मन्ह्तोग़े, ओन्क नीवा किरियाता बर्कत ईतेके अचोने आयग़ा.”
19 मति ओन देवुळ इता, “आयो, नीवा मुते सारानग्डाहिये नीक पेकाल पुटनोग़. निमा ओना पेदिर ‘इसक’ (इतेके कवयाह्तोग़) तासकिन. इसकना ओसो ओना जालपिलतोरा संगे नना नावा किरियातुन अमेसा अमेसातेनाह्क करल कीकन.
20 “निमा इस्मालना लोप्पा ताल्ह्कतिन, अदिन नना केंजतन नना ओन्क वने बर्कत ईकन. ओन्क वने वेल्लाटोरे मग़-मियाळ ईकन. ओग़ु बारा राजालोरा तपे आयनोग़. ओना कुट्मळताहि वने बेरा देसेम आयग़ा. 21 मति नावा किरिया इसकना संगेने करल आयग़ा. ओग़ पेकानु सारालिये पुटिह कीयग़ा, ओग़ पेग़ेंडु इदे तूकने पुटनोग़,” इनजोर इता. 22 इव सबे पोल्लोङ अब्रहमिन वेहचि देवुळ ओनग्डाह मायता.
23 देवुळ ओन्क मुने वेहतपु ओग़ अदे दिया, तना मग़ि इस्मालिनु ओसो तना लोते मतोर सबे कोय्तोरिन, असतोर ओर्युलतोरिन वने, ओसो ओर्युलतोराङ पेकोरिन वने उंदि मल्काते डायना रिवज कीसीतोग़. 24 अब्रहमना डायना रिवज आनेके ओग़ 99 वर्सानोग़ मतोग़. 25 अस्के ओना पेकाल इस्माल तेरा वर्सानोग़ मतोग़.