अव देवतुल्‍क ओन इताङ, “आयग़ रा! नेटुह्‌क माट गोटुदगाय, बेगाय उंजकोम,” इताङ.

3 मति लोट ऊक-ऊके कोळ्सतप लेह्‌का कींदोग़, अस्‍के देवतुल्‍क ओना पोल्‍लोतुन मान ईसि ओना लोतगा रोमलाह अताङ. लोन अतस्‍के लोट अविस्किह्‌क आरिङ ओग़सि, बेस नेह्‌ना जावा कीसीतोग़. अस्‍के अव बेस तिताङ.

4 पया ओर उंजकोम इनेकेने, इद्रम आता इतेके, “अद सहरमेटोर कोय्तोर, लेया-पेकोर लोटना लोतगा जमा आतोर. जमा आसि वेना लोतुन सर्ने कीतोर, कीसि लोटिन केयिंदुर. 5 नेंड नग़्का नीवा लोते वातोरु बेगाडुर? ओरिन मयेके पलते पेहचीम, ओरा संगे माटु सिंन्‍ड्रि-साट्याल आयकोम,"^a इतोर.

6 लोट लोप्पाडाह पलते पेसिसि तेल्पतुन केहचि, तना अग़दुह्‌क अडम नितोग़. 7 ओग़ु ओर सोदोमतोर लोकुरिन इह इतोग़, “अह केमाट दादालोरिर! नना मीवाङ काल्‍क आय मोळ्‍किह्‌नन, इद लाग्वा कबळ केमाटु. 8 ऊळाट, नावाङ रेंड पिलाङ मन्ह्‌ताङ, अव इंका कुव्राय मन्ह्‌ताङ. अव पिलानु मीक ईय्‍ह्‌नन, अविस्कना संगे मीक बह कीयना मन्ह्‌ता अह कीम्‍ह्‌टु. मति वेर मन्‍कालोरिन मात्रम बातय केमाटु. वेरु नावा लोते वातोर इतेके ओरिन ऊळनदु नावा जबब्‍दार मन्ह्‌ता,” इनजोर इतोग़.

9 अस्‍के सर्ने कीतोर लोकुर वळ्ह्‌कलाह आतोर. “वेग़ बेग्डोग़ रा! वेग़ उंद नाटेनाह वासि, इंजेक माके वेल्‍लाङ काग़्हतलाह आतोग़,” इनजि इतोर. अद्रमे पया लोटिन इतोर, “निमा माक इंजेके अडम आयमा. आतिन इतेके ओर वाता मन्कलोरिह्‌कायि नीक एक्वा तिपल कीकोम” इनजोर ओनु दोबिस ईतोर. ओसो ओना लोता तेल्पतुन विर्ह्‌तलाह ऊळिंदुर.

10 मति लोटिना लोन लोप्‍पा मताङ देवतुल्क अग़दुन तेग़यिस लोटिन लोप्‍पा गुंजताङ, अह कीसि अग़दुन केहचीताङ. 11 पया अवु पलत मनवालोर लोकुरिन गळ्किह्‌क तोववाह कीसीताङ, ओर लोन लोप्‍पा ओळियलाह विचर केवालोर लेयोर कोय्तोर ओसो मुय्तोर बेस तोववाह्‌कु ओरिह्‌क लोता तेल्‍पि दोर्को, दोर्कवाह्‌कु ओर पर्ह्‌किस-पर्ह्‌किस आरेम आतोर, तेला मति आक्रि एवनाह ओरिह्‌क अग़ दोर्कोये.

12-13 पया अव देवतुल्क लोटिन इताङ, “ इद सहर पापमते निंदता इनजि यहोवा देवुळ केंजता, अदिह्‌के माकु इद सहरतुन बूळे कीयलाह लोहता. माट इंजेके इद सहरतुन बूळे कीकोम. अदिह्‌क निमा इद्रम कीमु, इद सहरते नीवाङ जीवाङ-तलानोर, मग़्क-मयास्क, ओसो लामानेर, अद्रम बोर बोर मन्ह्‌तोर ओरिन चट्‌पिट इद सहरतुन विळ्‍सिस वित वेहा,” इनजोर इताङ.

14 अस्के लोट तनाङ पिलान ताल्ह्‌किस तासिस मतोर, ओर लामनेरिन कलियिस वेहतोग़, “देवुळ इद सहरतुन बोळ्‍सकन इन्ह्‌ता. मीट इगा रोममाट. मीट चट्‌पिट तेदिस सहरता पलते विताटु,” इनजोर वेहतोग़. तेला मति “वेग़ मामाल माक कव्न्डेङ कीस्तोग़ रा,” इद्रम ओर इन्दुर.

15 पङवियनेके अव देवतुल्‍क लोटिन कंद्रेह कीसोर वेहन्दुङ, “ऊळा, इद सहर इंजेक बूळेम आयना मन्ह्‌ता. निमा नीवा मुते ओसो नीवाङ रेंड आस पिलान पोसि इग्डाह चट्‌पिट पलते पेसिस विताट. अस्‍केने मीट पिसकिर, इलवेके पिसविर,” इनजोर इताङ.

16 मति लोट आलिह कीसि अगान तीरम आंदोग़. अदिह्‌के अव देवतुल्क लोटनाङ, ओना मुतेनाङ ओसो रेंड पिलानाङ कय्‍किन पोसि सोदोम सहरतुह्‌क पलते पेहचीताङ. इद्रमलेह्‌का देवुळि ओरिन जीवा लोपिस पिसिह कीयना मता. 17 ओरिन सहरता पलते ओसीतापया, उंद देवतुल इता, “मीवा जीवा पिसना इतेके मीट अव मेटानके विताट. इगा मतेके इद सहरतोरा संगेने मीट वने बूळेम आयकिर. मीट वितनेके मात्रम सहरतेके मल्‍स बह ऊळमाटु. ओसो इद दल्पाते बेगान बह रोममाटु,” इताङ.

18 अस्‍के लोट इतोग़, “आयो महरज, अचोन जेक वितलाह नाक कयदेन आयो. 19 मीट इसि नावा पेटळ पकाय गूनम तोहतिर, ओसो नाक पिसिह कीयलाहि दया वने कीतिरे. मति नना इतेके मेटानगा एवनाह वित पग़वोन, अदिनेनाह्‌कु नना जम्‍ने वितलाह बोटटन इतेके इद सिक्साते नना वन बूळेम आयकन बहा. 20 मति ऊळाट, इगा ऐरेन उंद उड्‌ला नाग़ मन्ह्‌ता, अगा एवनाह माक दायलाह ईम्ह्‌टु. अगा अतोम इतेके मावा जीवा पिसग़ा. मुर्बत कीसि अद उड्‌ला नाग़ इनजोर तान पिसिह कीम्ह्‌टु,” इनजोर इतोग़.

21 अस्‍के अद देवतुल इता, “अह इतेके बाराय आयो, निमा अगा वने अनजि मनदा पग़यकिन. नना अद नाटुन बूळे केवोन आयकन. 22 मति अगा एवनाह चट्पिट विताटु. मीट अगा एवनाह्‌जोम नना इगा बातय केवोन आयकन,” इनजोर इता. (अद नाग़ उड्‌ला मता, अदिह्‌क ताना पेदिर सोवर^b मता.)

23 लोट सोवर नाटे काल वाटनेकेने पोळ्‍द पेसता. 24 पोळ्द पेससोरेने, देवुळि सोदोम-गोमोरा नाह्‌किनु बूळे कीयलाह आता. अस्‍के पोग़ोटा बूमतेनाह मळ्गनव किसतळ्मिङ अरताङ. 25 इद्रमलेह्‌का देवुळि इव रेंड सहर्किनु, अगा मनवालोर सबे आस्‍क-कोय्तोरिन, अद्रमे अद दल्पातेके मतद पूरा गेळा-गुटातुनु बोळ्सिसीता. 26 लोटना लोतोर अग्डाह पेसिस वितनेके, लोटना मुते पेग़्के मल्‍स अद सहरतेक ऊळता, अस्‍केन अद उवुर गुटा मारियता.

27 अदे दिया अब्रहम तना टमताहि सकरिने तेदिसि, मुनेटा दिया बेद जागातगा देवुळता संगे गोटिङ कीस मतोग़, अगान अतोग़. 28 अगान अंजनेह्‌कु सोदोम-गोमोरा सहर्कनेके ऊळतोग़, ऊळतस्‍के अव दल्पानेनाह कुम्ने पोया उनडनद ओन्‍क दिसता.

29 इद्रमलेह्‌का देवुळि अद दल्पाताङ सहर्किन बूळे कीनेके, अब्रहम ताल्ह्‌कतद पोल्‍लोतुन सीता कीसि, लोटिन ओसो ओना लोतोरिन अव सहर्कना पोग़ोन वातद सिक्साताहि पिसिह कीता.

30 इद्रमलेह्‌का आतस्के लोटिह्‌कु सोवर नाटे मनदलाह रेय वेसता, अस्‍के ओग़ तनाङ रेंड पिलान पोसि मेटातेके अनजि उंद बंडा पांजातगा मनदलाह अतोर. 31 उंद दिया माळा पिला तना एलान इता, “इद बूमते सबे आंचाळ-कोय्तोग़ मर्मिङ कीस्‍तोर, मति इगा एरे-गूरे मावा संगे मर्मिङ आयवालोर बोरे मन्‍कालोर इलेर, मावा बाबाल इतेके मुय्तोग़ आस्तोग़, इंजेके बेदिने तवोग़ आयनोग़ बहे. 32 अदिनेनाह्‌कु मावा कूळतुन पिसिह कीयलाह बाबाह्‌क पका कल उहचि, ओग़ ओचतस्‍के ओनगा अनजि उंजकल, अस्‍के माट मग़-मियाळ आसि मावा जालपिल आङग़ा,” इनजोर इताङ.

33 अदे दिया नग़्का तपेनगा अनजि ओन पका कल ऊहताङ. ओग़ु‍ रिमा आतस्के मुनेटा पिला तपेनगा अनजि उंता. मति ओग़ कल रिमाते मतोग़ अदिह्‌क मुर्तिय पुनोग़.

34 दुस्रा दिया मुनेटा पिला तना एलान वेहता, “नना निने नग़्का बाबानगा अनजि उंतन, नेंड नग़्का वने बाबान पका कल उहतकल. पया नग़्का निमा ओनगा अनजि उंजकिन. इह कीतेके माट मावा बाबाना जालपिलतुन मुनेह आङनाह कीकल,” इता. 35 अस्‍के पया अदे नग़्का अव रेंड पिलाङ तपेन पका कल ऊहताङ. पया उड्‌लद पिला तपेना जागातगा अनजि उंता. अद वेर्ह्‌काते तपे कल रिमाते मनजि नावा मयाळ नयगा वासि उंता इनजोर पुनोग़.

36 इद्रमलेह्‌का लोटनाङ रेंड आसि पिलाङ तमा तपेनाहि नेलाङ हव्किस मेंदुद मताङ. अविस्कना तपेये ओर पेकोराङ वने तपे मतोग़. 37 मुनेटा पिलातुह्‌कु पेकाल पुटटोग़, अस्‍के ओना पेदिरि ‘मोवब’^c इनजोर तासता. ओग़े पया मोवब देसेमता पेदामुय्तोग़ आतोग़. 38 अहे उड्‌ला पिलातुह्‌क वने पेकाले पुटटोग़, ओना पेदिरि ‘बेन-अमि’ (इतेके नावा जीवातोना मग़ि) इनजोर तासता. ओग़े बेन-अमि अमोनि देसेमता पेदामुय्तोग़ आतोग़.