देवुळता पेदिरते एग़ मीहवाल योहन पोकुर कीतद पोल्लो
(मत्याल 3:1-12; मार्कल 1:2-8; योहन 1:19-28)
3
1 तिबिरिया कय्सर इनवाल पूरा रोम राजेमता बेरोग़ राजाल आसि, पंद्रा वर्साङ आस मतोग़. अस्के पुन्तियु पिलाति इनवाल, यहुदा पटटा गुमसि मतोग़. एरोद अंतिपस इनवाल राजाल गालिल पटटा गुमसि मतोग़.a तना तमोग़ पिलिप इनवाल, इतुरेया ओसो तरकोनीतिस इव पटिना गुमसि मतोग़. लिसानिया इनवाल, अबिलेने पटटा गुमसि मतोग़.
2 अनाल ओसो तना अने कयपाल, वेरु देवुळता पेर्मालोर इनजि मतोर. अद तूकने जकरियाना मग़ि योहनिह्क बाताल आता इतेके, ओग़ पेळ्ह्कल बूमतगा मनदह्पा देवुळता कबुर ओन्क दोर्कता.
3 ओग़ अद पोल्लोतुन पोसि, योर्दन बेरेटा एरे-गूरेताङ सबे नाह्कनगा अनजि इद्रम पोकुर कीतोग़ इतेके, “पापमता अग़दाहि मलसि देवुळता पेदिरते एग़ मीम्ह्टु! अस्के देवुळि मीवा पापमतुन मापि कीयग़ा,” इनजोर केयिंदोग़.
4 इद्रमलेह्का देवुळता कबुरतोग़ यसयाना पुस्तकते वेल्लाय मुने रासतद पोल्लो इंजेके करल आता:
“पेळ्ह्कल बूमतगा केयनद आल्का केंज वायग़ा.
‘सामि मीवा जीवातगा वायना इनजि,
मीट मीवा जीवातुन तयर कीम्ह्टु!
ओसो ओना वायनद अग़दुन कसुम कीम्ह्टु.
5 इतेके सबे लोवाङ निंदिस दायना गावले, सबे मेटाङ ओसो गुड्राङ बराबर आयना गावले.
विकोङ-वकोङ आतव अग़िङ दिग्ने आयना गावले,
बोंदाङ-बोग्ळाङ आतद अग़ि सम्ने आयना गावले.b
6 अस्के लोकुरिन पिसिह कीयलाहि,
देवुळि आचतोनु सबेटोर ऊळनुर.’ ” c
इनजोर रासतद मन्ह्ता.
7 देवुळता पेदिरते एग़ मीयलाह गोह्डिनाङ गोह्डिङ वाता मुडुन योहन इद्रम इतोग़, “एय वीसम तरस्कना लेह्काडोरिर! पापमता अग़दाहि देवुळतके मलवालेवा, वेट देवुळता पेदिरते एग़ मीतेके, देवुळि ईयनद सिक्साताहि माट पिन्ह्ट अरयकोम इनजोर बाराह्क इह्निर?
8 पापमता अग़दाहि मलतोम इनजोर तोहतलाह बेसताङ कबस्क कीम्ह्टु, केवेक अचोन कायाङ आदवाङ मराना लेह्का आयकिर! ओसो ‘माट इतेके अब्रहम मुय्तोना कूळतोरोम आंदोम, देवुळि माक सिक्सा एवो आयग़ा,’ इनजोर मीट बेस्केन इद्रम इनमाट बहा. नना मीकु वेहतह्नन, देवुळि अब्रहम मुय्तोह्क पेकोर इव बंडानग्डाह वने पुटिह कीया पग़यह्ता, पुनविरा?
9 इंजेके मरा मोदुदगा मग़्स तासिस तयरेन मन्ह्ता. बेद मरा बेस आदो, अद मरातुन नळ्किसि, किसतगा वाटमुळ आयग़ा,” इनजोर इतोग़.
10 अगा जमा आता मुलु योहनिन इद्रम ताल्ह्कतोर, “पापमताहि मलयना इतेके माट बाताल कीकोम?” इतोर.
11 इतस्के, “बोनगा रेंड जगाङ मन्ह्ताङ, ओग़ उंद जगातुन जगालेवोन्क ईयेग़. बोनगा तिंड-बंड मन्ह्ता, ओग़ वने लेवोना संगे तूसिस तिनेग़,” इनजोर इतोग़.
12 अगा देवुळता पेदिरते एग़ मीयलाह सिद्वा एनवालोर वने वास मतोर, ओर पका लोकुराङ कोताङ तिनदुर. वेर वने “गूरु! माट बाताल कीकोम?” इनजोर ताल्ह्कतोर.
13 ताल्ह्कतस्के ओरिनु “मीक बेचोन सिद्वा एता वेहतोर, अचोने एनाटु! लोकुरिन मुळ्हमाटु,” इतोग़.
14 उय्तुर सीपय्क वने ओनगा वासि, “माट बाताल कीकोम?” इनजोर ताल्ह्कतोर. ताल्ह्कतस्के ओरिन वने वेहतोग़, “मीकु बेचोन पगर दोर्किह्ता, अचोने पगरते मुयोग़ आयवा मन्ह्टु. बोरिने बह डारेह कीसि, इलवेके जोल कसुर वाटिसि, कोताङ एनमाटु.” इनजोर वेहतोग़.
15 इंजेके देवुळ लोहवाल पिसिह केवाल वायनोग़ इनजोर आसा कीस लोकुर अग़ ऊळिंदुर. अदिनेनाह्क योहनिन ऊळिसि, सबेटोर “वेग़ ओग़े बह आयोग़?” इनजोर तमा तमाय विचर कींदुर.
16 अदिन पुनजि योहन सबेटोरिन इद्रम इतोग़, “नना इतेक लोकुरिह्क देवुळता पेदिरते एतेन मीहतलाह आतन. मति ओर्वोग़ बार वायलाह आतोग़, ओग़ नाकाय वीळिसि बेरा लावतोग़ आंदोग़, ओना कादुन इटलाह वने नना ओप्पोन, अचोन नना उड्लोनन! ओग़ देवुळता पवित्र जीवाते ओसो किसते मीक मीहवाल आयनोग़.
17 बेद्रम वंजिनगा दोर्बे मतेके, एतते एह्चिस तीह्र्कमुळ आस्ता, अद्रमलेह्कान ओना कयदे एत मन्ह्ता. ओग़ तना कळातग्डाङ वंजिन बेस एह्चिसि, डोमेते दोसनोग़, दोर्बेतुन बार बेस्केन पिववद किसते बोळ्सिसीयनोग़, अद्रमलेह्का ओग़ माक वने कीयनोग़,” इतोग़.
18 इद्रमलेह्का योहन ओसो वेल्लाङे पोल्लोने लोकुरिन बुदिङ काग़्हचोर, बेसता कबुरतुन पोकुर कीतोग़.
देवुळता पेदिरते येसु एग़ मीस्तोग़
(मत्याल 3:13-17; मार्कल 1:9-11)
19-22 पया योर्दन बेरेटगा, योहन वेल्लाटोर लोकुरिन देवुळता पेदिरते एग़ मीहचोर मतोग़. अस्के येसुवने अगा वातोग़, ओन वने देवुळता पेदिरते योहन एग़ मीहतोग़. मीहतस्के बाताल आता, देवुळबाबाना संगे येसु वळ्ह्कनेके, अस्केडा अस्केन पोग़ोटा बूमि पङ्ने आता. पङ्ने आता अस्के देवुळता पवित्र जीवा परेवा पिटे लेह्का दिसिसि, ओना पोग़ोन रेगता. पया पोग़ोटाहि देवुळता आल्का इद्रम वाता इतेके, “निमा नावा मग़निन आंदिन, नीक पका जीवा कीय्ह्नन! नीवा लोप्पा नना पका गिर्दा आतन,” इता.
पया मनेक मनेक बह आता इतेके, एरोद अंतिपस गुमसि, तना दादाल पिलिपd जीवात मनेकेन वेना मुते एरोदियसि इनदनदिनु तन्क ततोग़. ओग़ तना अंगेना संगे कीतद पापमतेनाह्कु ओसो वेल्लाङे दुस्राङ लाग्वाङ कबस्कनेनाह्क योहन ओन तेर्हन्दोग़. अदिनेनाह्क कोनि एरोद अंतिपस गुमसि, योहनिन जेलते वाटटोग़.e वाटिसि तना मुने कीतव लाग्वाङ कबस्कना लेह्का इद ओसो उंदि लाग्वा कबळ कीतोग़.
योसेपना तादोर-बाबोराङ पेदिर्क
23 अद्रमे पया येसु तना सेवा सुरु कीतोग़, अस्के जोक-जोक डेडा वीसा वर्सानोग़ मतोग़. लोकुरा विचरते येसु योसेपना मग़ि आंदोग़, मति ओग़ देवुळताहि पुट वातोग़. योसेप इतेके एलिना मग़ि मतोग़.
24 एलि मतातना मग़ि, मतात लेविना मग़ि, लेवि मलकिना मग़ि, मलकि यनालना मग़ि, यनाल योसेपना मग़ि.
25 योसेप मतिताना मग़ि, मतिताल आमोसना मग़ि, आमोस नहूमना मग़ि, नहूम असल्याना मग़ि, असल्याल नोगाना मग़ि.
26 नोगाल मतुसना मग़ि, मतुस मतिताना मग़ि, मतिताल सिमिना मग़ि, सिमि योसेकना मग़ि, योसेक योदाना मग़ि.
27 योदाल योनाना मग़ि, योनाल रेसालना मग़ि, रेसाल जरुबाबेलना मग़ि, जरुबाबेल साल्तियाना मग़ि, साल्तियाल नेरिना मग़ि.
28 नेरि मलकिना मग़ि, मलकि अद्दिना मग़ि, अद्दि कोसमना मग़ि, कोसम इलमोदमना मग़ि, इलमोदम एराना मग़ि.
29 एराल यहोसाना मग़ि, यहोसाल इलाजरना मग़ि, इलाजर योरिमना मग़ि, योरिम मतातना मग़ि, मतात लेविना मग़ि.
30 लेवि सिमोनना मग़ि, सिमोन यहुदाना मग़ि, यहुदाल योसेपना मग़ि, योसेप योनमना मग़ि, योनम एल्यकिमिना मग़ि.
31 एल्यकिमि मलेयाना मग़ि, मलेयाल मिनाना मग़ि, मिनाल मताताना मग़ि, मताताल नातानना मग़ि, नातान दाविद राजाना मग़ि.
32 दाविद राजाल यीसाना मग़ि, यीसाल ओबेदना मग़ि, ओबेद बोहजिना मग़ि, बोहजि साल्मोनना मग़ि, साल्मोन नहसोनना मग़ि.
33 नहसोन आमिनदाबना मग़ि, आमिनदाब अरनयना मग़ि, अरनय एस्रोनना मग़ि, एस्रोन पर्साना मग़ि, पर्साल यहुदाना मग़ि.
34 यहुदाल याकुबना मग़ि, याकुब इसकना मग़ि, इसक अब्रहमना मग़ि, अब्रहम तेरहाना मग़ि, तेरहाल नाहोरना मग़ि.
35 नाहोर सरुगना मग़ि, सरुग रहुना मग़ि, रहु पेलेगना मग़ि, पेलेग एबेरना मग़ि, एबेर सेलाहना मग़ि.
36 सेलाह केनानना मग़ि, केनान अर्पक्सदना मग़ि, अर्पक्सद सेमना मग़ि, सेम नोहाना मग़ि, नोहाल लामेकना मग़ि.
37 लामेक मतुसेलाना मग़ि, मतुसेलाल हनोकना मग़ि, हनोक यारेदना मग़ि, यारेद महललेलना मग़ि, महललेल केनानना मग़ि.
38 केनान एनोसना मग़ि, एनोस सेतना मग़ि, सेत आदमना मग़ि, आदमिन देवुळि पंडटा.