7 अद वेलाते उंदि सामरि जातता आंचाळि एतुह्‌क वाता. अस्‍के “बायि, नाक उचुन एग़ ईम,” इनजि येसु तान ताल्ह्‌कतोग़. 8 (माट कग़यवालोरोम माक तिनदलाह तिंडि असलाह नाटे अन्‍ज मतोम, अदिह्‌के येसु अगा वग़ोग़े मतोग़, ओन्‍क एग़ तोग़लाह बोग़े इलेग़.) 9 पया अद इता, “चेह, निमा यहुदि जाततोनिन आसि, नाक सामरि जातता आंचानु ‘एग़ उनडलाह ईम,’ इनजोर बेद्रम ताल्ह्‌किह्‌‍निन?” (अद इद्रम इता, बाराह्‌क इतेके यहुदिर सामरितोरिन विटळ तासिंदुर). 10 येसु तान इतोग़, “देवुळ बेद देय्‍वा नीक ‘ईकन,’ इन्ह्‌ता, ओसो ‘उनडलाह ईम,’ इनजोर नीक ताल्ह्‌कवाल बोग़ु, इदिन निमा पुतेके, नाक निमा जीवात मनदनद एग़ ताल्ह्‌केनिन. अस्‍के नना नीक एवेनन.” 11 ओग़ वळ्ह्‌कनद पोल्‍लो तान्‍क पङ्ने तेळियवाह्‌कु अद इता, “दादा, नियगा एग़ तोग़लाहि जेरना वने इले, ओसो चुवातगा एग़वने पकाय इळ्‍न मन्ह्‌ता. इतेके इद जीवात मनदनद एग़ु बेग्डाह वायग़ा? 12 मावा मुनेतोग़ पेदामुय्‍तोग़ याकुबि इद चुवातुन माक ईतोग़, ओग़ कुदि, तनाङ पेकोर ओसो कोंदाङ, गोरेङ इग्डा एतुन उंडुर. बह निमा ओन्काय बेरोनिन मनजि माक इदिह्‌काय बेसतल एग़ ईकिना?” इनजि अद येसुन इता. 13 पया येसु तान इतोग़, “बोग़ाय इग्डा एतुन उटोग़ इतेके, ओन्‍क ओसो एग़ उंडा वसग़ा. 14 मति नना ईयनद एतुन बोर उनडनुर, ओरिह्‌क पया मुर्तिय एग़ उनडा वसो आयग़ा. नना ईयनद एग़ मात्रम ओरा लोप्पा अमेसा पिसलाह ईयनदु ऊता एग़लेह्‌का पोङग़ा,” इनजोर इतोग़. 15 “अह इतेक दादा, नाक बेस्‍केन एग़ उंडा वसनायो, ओसो इगा एवनाह एतुह्‌क वायनायो इनजोरे नाक अद्रमता एग़ ईमु,” इनजि अद ओन ताल्ह्‌कता.

16 अस्‍के येसु तान इतोग़, “निमा अन, अनजि नीवा मुजोन इके केयिस ताय.” 17 “दादा, नाक मुजो इलेग़.” “ ‘नाक मुजो इलेग़,’ इनजोर निमा सेतेम वेहतिन, बायि! 18 बाराह्‌क इतेके निमा एयुङ मल्‍काङ मर्मिङ आसि, नीक एयवुर मुजोर मतोर, इंजेक मनवाल वने नीवा मुजो आयोग़. निमा सेतेमे वेहतिन,” इनजि येसु तान इतोग़.^a

19 “अललेयो, दादा, निमा देवुळता कबुरतोनिन मंदकिन बहे. 20 मावा मुनेतोर पेदल्‍क इतेके इदे गेरजिम इनदनद मेटातगा मोळ्किंदुर. मीट यहुदिरिर मात्रम इह्‌निर, ‘मोळ्‍कना जागा इगा आयो, मति येरुसलेम सहरते मन्ह्‌ता,’ इनजोर इह्‌निर, बोना सेतेम पोयतना?” इनजि अद येसुन इता. 21 अस्‍के येसु तान इतोग़, “ए बायि, नावा गोटटुन बर्वस तासा! मीटु इद मेटातगा आयि, येरुसलेमते आयि, ओसो बेगान आयि, देवुळबाबान मोळ्‍क पग़यकिर, इद्रमताङ दियाङ वायनुङ. 22 मीट सामरियातोरिर पुनवदिन मोळ्किह्‌निर, मति माट यहुदातोरोम पुतदिन मोळ्किह्‌नोम, बाराह्‌क इतेके यहुदिराये संगे देवुळि पिसिह कीस्‍ता. 23 तेला मति सेतेम मोळ्कवालोर देवुळता सेतेम पोल्‍लोतुन पुनजि तमा जीवाते मोळ्कनुर, इद्रमताङ दियाङ एवयनुङ, ओसो एवतपे मन्ह्‌ताङ. बाराह्‌क इतेके इद्रम मोळ्‍कवालोरिने देवुळबाबाल पर्ह्‌किह्‌तोग़. 24 देवुळ इतेके दिसवद जीवा आंदु. अदिह्‌के तान मोळ्‍कवालोरिह्‌क देवुळता सेतेम पोल्‍लोतुन पुनजि जीवाते मोळ्‍क पोयह्‌ता,” इनजि येसु सामरि आंचान वेहतोग़. 25 अस्‍के अद ओन इता, “देवुळ लोहवाल पिसिह केवाल (इतेके किर्स्तु) वायना मन्ह्‌ता इनजि नना पुह्‌नन. ओग़ वातस्‍के माकु इद्रमताङ कतम गोटिङ तेळियिह कीस काग़्हतनोग़,” इनजोर इता. 26 “ओनन ननाने, नीवा संगे वळ्ह्‌कवनन,” इनजोर येसु तान इतोग़.

27 अचोटेने माट कग़यवालोरोम तिंड पोसि अगा वातोम. अस्‍के वेग़ उंद आंचाना संगे बाराह्‌क वळ्ह्‌किह्‌तोग़, इनजोर बयल आतोम, बाराह्‌क इतेके मावा रिवजते गूरुर आस्‍कना संगे वळ्ह्‌कोर आस्‍तोर. तेला मति, “तानेनाह नीक बाताल गावले? ताना संग बाताङ वळ्ह्‌कतिन?” इनजोर माट बोग़े ओन ताल्ह्‌कोम. 28-29 अस्‍के अद आंचाळि अळकातुन अगान पोहचि नाटे अता, अनजि इनदलाता,़ “नना बाताङ-बाताङ कीतनो, अव कतमे पुतोग़ु वग़ोग़ नाक कलियिस वेहतोग़. ओन मन्‍कन ऊळकिर, दटे! ओग़ देवुळ लोहतोग़ पिसिह केवाल बह आयोग़?” इनजि नाटेनोरिन इता. 30 अस्‍के वेर नाटेनाहि पेसिसि ओनके वायलाह आतोर.

31 अद आंचाळि नाटे अन्‍ज मतस्‍के, माट कग़यवालोरोम येसुनु “अले गूरु, इव नीक तिनदलाह ततोम, तिन,” इनजि इतोम. 32 मति ओग़ु माक इतोग़, “मीट पुनविर, अद्रमता तिंडि नयगा तिनदलाह मन्ह्‌ता.” 33 अस्‍के माटु कग़यवालोरोम माट-माटे “वेन्‍क तिनदलाह बोग़ाय ततोग़ा?” इनजोर वळ्ह्‌किंदोम. 34 मति येसु माक इतोग़, “बोग़ नाक लोहतोग़, ओना विचर मतप कीयना, ओसो ओना कबळतुन पूरा मारिह कीयना, इदे नावा तिंड आंदु. 35 इद तूकने ‘नालुङ नेलाङ पिसताङ, पया कोयाना आयग़ा,’ इनजोर मीट इह्‌निर बहे? केंजाट, नना मीक वेहतह्‌नन, मीवाङ कोंडाङ नाह्‌किस सर्ने ऊळाटु. बोर लोकुर नावाङ पोल्‍लोङ केंजलाह तयर आस्‍तोर, ओरु पका अयतद पंटालेह्‌काडोरु. 36 कोयवाल तना बूत दोर्किह कीस्‍तोग़, ओसो अमेसाता पिसमुळतेनाह्‌कु लोकुरिन जमा कीस्‍तोग़. बाराह्‌क इतेके वीतवाल (इतेके देवुळता पोल्‍लो वेहवाल) ओसो कोयवाल (इतेके पोल्‍लोतुन नमवालोरिन गुम केवल) वेर इर्वुर कलियिस गिर्दा कीयना इनजि. 37 ‘ओर्वोग़ वीतिह्‌तोग़, दुस्रोग़ बारा कोयह्‌तोग़,’ इद्रम इनदनद उंद गोटि मन्ह्‌ता, इद गोटि मीवा लोप्पा करल अरयह्‌ता. मीटवने नावाङ केंजलाह लोकुरिन ततकिर अस्‍के देवुळताहि मीक बूत दोर्कग़ाये. 38 बेदिनेनाह्‌क मीट मुने कह्‌टेम केविर, अदिन कोयालाह नना मीक लोहतन. नना कह्‌टेम कीसि देवुळता पोल्‍लो वेहतह्‌नन, दुस्रोर वने मुने वेहच मतोर, मति मावा कह्‌टेमता पंटा कोयालाह मीटवने कलियतिर,” इनजि येसु माट कग़यवालोरिन वेहतोग़.

39 पया बार आता. “नना बाताङ-बाताङ कीतनो, अविन कतम पुतोग़ु वग़ोग़ नाक वेहतोग़,” इनजि वेहतनद अद आंचाना गोटटुन केंजिसि, अद नाटेनोर सामरि जाततोर वेल्‍लाय मुल देवुळ लोहतोग़ राजाल येसुये आंदोग़ इनजि नमतोर. 40 ओर सामरियातोर येसुनगा वातोर, वासि ओन इनदलातोर, “ए गूरु, मयगान निद्रा कीम,” इनजोर इताह्‌कु पया माट ओरगा रेंड दियाङ आनाह मतोम. 41 येसुनाङ पोल्‍लोङ केंजिस ओसोवन वेल्‍लाय मुल ओन नमतोर. 42 ओर नाटेनोर अद आंचान इतोर, “सिरप निमा वेहताह्‌के माट नमोम, मति इंजेके माट कुदि ओनाङ केंजतोम, केंजिसि दुनियातोरिन पिसिह केवाल निटम वेग़े आंदोग़,” इनजोर माट पुह्‌नोम.

43 अव रेंड दियाङ आतस्के, माटु अग्‍डाहि पेसिसि मावा गालिल पटटे वातोम. 44 देवुळता कबुरतोन्‍क तनाय देसेमते बेस्‍केन कदर दोर्को, इनजोर येसु कुद वेहच मतोग़. ओग़ वेहतपु अहे आता. 45 इंजेके गालिल पटटोर वेल्‍लाटोर पंडुम मतस्‍के येरुसलेमतके अन्ज मतोर. येसु अगा बेचोक बामिह कीयनाङ कबस्‍क कीस मतोग़, अव कतमतविनु वेर अस्‍के ऊळिस मतोर. अदिह्‌के नेंडवने अद्रमताङे ऊळलाहि येसु गालिल पटटे वातस्‍के, वेरु गिर्दाते ओन कलियतोर. 46 पया येसु ओसोवने गालिल पटटा काना इनदनद नाटे वातोग़. इदे नाटे कोनि ओग़ मुने एतुनु अंगुर जोमा पंडिस मतोग़. गालिलता कापेर्नाटे, सर्करता ओर्वोग़ साय्बाल मतोग़, ओना पेकाल पका दुक अरस मतोग़. 47 येसु यहुदा पटटाहि गालिल पटटे वातोग़ इनजोरे ओन्‍क साय्बाह्‌क कबुर दोर्कता, दोर्कताह्‌कु, ओग़ येसुन कलियलाह काना नाटे अतोग़. येसुन कालगडेम पोसि इतोग़, “दादा, नावा मग़ि गय्‍क इतेक हायनोग़, ओन सव्रे कीसीकिन, दय,” इनजोर इतोग़. 48 मावा गालिल पटटोरा बुद पुनजि, येसु ओन इतोग़, “बामिह कीयनाङ सीनाङ ऊळवालेवा मीटु मुर्तिय विस्‍वस केविर आयकिर!” 49 वेग़ साय्बाल येसुन इतोग़, “ए दादा, नावा पेकाल डोलनामुनेन दय.” 50 “अन, नीवा पेकाल पिसतोग़,” इनजि येसु ओन इतोग़. येसु अह इताह्‌कु, ओना पोल्‍लोतुन नमिसि, ओग़ मल्‍स अतोग़. 51 इमा दिया, ओग़ अग़ पोस अनजोरेन मतोग़, अचोटेने ओना साकुर केवालोर कलियतोर, कलियिस पया “नीवा पेकाल डोलोग़, बेसे मन्ह्‌तोग़, महरज!” इनजोर वेहतोर. 52 अस्‍के “बेद वेलाते ओग़ सव्रेम आयलाह बोटटोग़?” इनजि ओग़ साय्बाल ओरिन ताल्ह्‌कतोग़. अस्‍के “निने, नेक निचि बह्‌ट अरतस्के ओना दंड विळ्सता, महरज” इनजोर इतोर. 53 इदिन केंजिसि, “बेद वेलाते येसु नाकु ‘नीवा पेकाल पिसतोग़,’ इनजोर इतोग़, अदे वेलाते नावा पेकाल सव्रेम आतोग़,” इनजोर ओग़ पुतोग़. अदिनेनाह्‌कु ओग़ु ओसो ओरा लोतोर कतमतोर येसुन नमतोर.

54 इद्रमि ओसो उंद मल्‍का येसु यहुदा पटटाहि गालिल पटटे वासि, सीना तोहतोग़.