4 पया पङ वीयतस्‍के येसु वासि सम्दुर दडटगा निच मतोग़. तेला मति ओग़ येसु आंदोग़ इनजि माट कग़यवालोरोम पुनोम. 5 अस्‍के येसु आळो कीतोग़, “उचुक तेला मीन्‍क पोयविर रा, पेकोरिर?” “एंह-एंह, माकु उंदाय मीन दोर्को,” इनजोर माट इतोम. 6 “मीटु ओडाता तिनळ बाजे वद वाटाट अले, अस्‍के मीन्‍क दोर्कनुङ,” इनजि येसु माक वेहतोग़. माट पया अहे कीतोम, अस्‍के ऊळाट, वदमेंड मीन्‍क एग़्‍कताह्‌कु माक वद पिळ्‍ङलाह एलो.

7 अस्‍के ओग़ येसुसामिये आंदोग़ इनजि नना पुतन, पुनजि पत्रुन इतन, “ओग़ सामिये आंदोग़, रा!” “सामिये आंदोग़,” इनजोर केंजताह्‌कु, सिमोन पत्रु तना जगातुन नंटुह्‌क ऊर्हचि दोहतोग़ (बाराह्‌क इतेके ओग़ु पूरा गोस्‍कले मतोग़), अह कीसि सम्दुरलोप्पा एतगा बुर डेयिसि दडटेके नारसोर अतोग़. 8 माट पिसतोरोम बारा अद वदते एग़्‍कतव मीन्‍किन पिळ्‍ङसोर-पिळ्‍ङसोर ओडात वातोम, बाराह्‌क इतेके माट वेल्‍ला जेक इलोम आसि, दडटाहि जोक-जोक रेंड नूह्‌क कुटाङ जेक मतोम. 9 पया माट दडटेके पेसिस ऊळतस्‍के, अगा इर्किना किस मता, किसतगा बोळ्‍सतव मीन्‍क ओसो आरिङ इवे दिसताङ.

10 अस्‍के येसु माक इतोग़, “मीट इंजेक पोयतव मीन्‍कनग्‍डाह उचुक इके ताट.” 11 अदिह्‌क पया सिमोन पत्रु ओडाते तग़्ङिसि वदतुन दडटेके पिळ्‍ङिस ततोग़. अवटे नूटा पनास मूंडु (153) बेराङ-बेराङ मीन्‍क मताङ. इचोक मीन्‍क मन्‍जाय वद इतेक अग़वो. 12 पया येसु माक इतोग़, “इव मीन्‍क, आरिङ तिनदकल, वाट रा!” वेग़ सामिय आंदोग़ इनजोर माट पुन्ज मताह्‌कु “निमा बोनिन आंदिन?” इनजोर ताल्ह्‌कलाहि मयग्‍डाहि बोन्‍के दीरा वावो. 13 पया येसु वासि कुद ततव आरिनु, मीन्किनु माक वांटिसीतोग़. 14 इद्रमलेह्‌का येसु हासि जीवा अरतोग़ अस्‍केडाहि इद मुचा केपा माक दिसलाहि आतोग़.

15 माट कतम तितस्के येसु सिमोन पत्रुन ताल्ह्‌कतोग़, “योनाना मग़निन, सिमोनि, वेर पिसतोर कग़यवालोर बेचोन नाक जीवा कीस्‍तोर, तान्‍काय वीळिस निमा नाक जीवा कीय्ह्‌निना?” “इंगो गूरु, नना नीक जीवा कीय्ह्‌नन इनजि नीक इतेक एर्काये,” इनजोर पत्रु इतोग़. “अह इतेके नावाङ गोरेपिलाना लेह्‌काडोरिन मेहा,” इनजि येसु वेहतोग़. 16 ओसो उंद मल्‍का येसु पत्रुन ताल्ह्‌कतोग़, “योनाना मग़निन, सिमोनि, निमा नाक जीवा कीय्ह्‌निना?” “इंगो गूरु, नना नीक जीवा कीय्ह्‌नन, इदिन इतेक निमा पुह्‌निने!” इनजि पत्रु इतोग़. “अह इतेक नावाङ गोरेना लेह्‌काडोरिन बेस रोसा,” इनजि येसु वेहतोग़. 17 पया मुचा केपा येसु पत्रुन ताल्ह्‌कतोग़, “योनाना मग़निन, सिमोनि, निमा नाक जीवा कीय्ह्‌निना?” इद्रम येसु मुचा केपा ताल्ह्‌कताह्‌कु पत्रु पका जीवा नोतप आतोग़. “सामि, नीक इतेक कतम एर्काय मन्ह्‌ता. नना नीक जीवा कीय्ह्‌नन इनजि निमा इतेक पुतिन,” इनजि पत्रु इतोग़. येसु ओन इतोग़, “अह इतेक नावाङ गोरेना लेह्‌काडोरिन मेहा. 18 इह केंजा, नना वेहतह्‌नन, निमा लेयोग़ मतिन अस्‍के निमा तयर आसि, बेगा विचर वांदु, अगा अंदिन. मति निमा मुय्‍तोग़ आयकिन अस्‍के निमा नीवाङ कय्‍किन आहतकिन, आहनेके दुस्रोग़ मन्‍कल नीकु गुटातगा दोहचि, नीक विचर वावा जागाते पोस ओयनोग़,” इतोग़. 19 (पत्रु बेद्रमता हामुरते हासि देवुळतुन मान ईयनोग़, इदिन मुनेन वेहतलाह येसु इह वळ्ह्‌कतोग़.) इचोन वळ्ह्‌कतस्‍के येसु पत्रुन इतोग़, “नावा सेवा कीसोर वाय!”

20 पया पत्रु पेग़्‍के मल्‍स ऊळतोग़ अस्‍के नना ओरा पेंडेस वातदिन ओग़ ऊळतोग़. (वेग़े पत्रु कोनि येसु हायनामुने, माट ऐंगेन तिनदह्‌पा, सामिन पोस एवाल बोग़ आंदोग़, इदिन पुनदलाह नाक कोंडा चिम्‍चिह कीसि येसुन ताल्ह्‌कलाह वेहच मतोग़.) 21 नना पयाह-पयाह वायनदिन ऊळिसि, पत्रु येसुन ताल्ह्‌कतोग़, “गूरु, वेना बह आयग़ा?” 22 “नना इद बूमते मल्‍स वानाह्‌जोमु ओग़ पिसिस मनदना इनजि नावा विचर मतेकाय, तेना नीकु बाताल वास अरता? निमा नावा सेवा कीसोर वाय!” इनजि येसु पत्रुन इतोग़.

23 येसु इह इताह्‌कु, नाकु ओग़ बेस्‍केन हायोग़ आयनोग़, इद्रमता पोल्‍लो विस्‍वसिरा नडुम आबुर अता. मति नाकु हायोग़ आयनोग़ इनजि येसु इनोग़, सिरप “नना मल्‍स वानाह्‌जोमु ओग़ पिसिस मनदना इनजि नावा विचर मतेकाय, तेना नीकु बाताल वास अरता?” इचोने वळ्ह्‌किस मतोग़.

24 बोन कग़यवान येसु जीवा कीतोग़ कग़यवाल इन्ह्‌तोर, ओनन ननान आंदन, ननाने इव पोल्‍लोङ वेहतह्‌नन, ओसो रासिस तासतन. इव नना रासतव पोल्‍लोङ करलताङे इनजि माक विस्‍वसिरिह्‌क एर्काय मन्ह्‌ता.

25 येसु कीतवु ओसो वेल्‍लाङे कबस्‍क मन्ह्‌ताङ. नावा विचरते अव कतम उंद-उंद रासतेके, अव रासतव पुस्तकिङ तासलाह इद दुनियाते जागा आलो आवल बहे!