3 पया सोलु अद सीटटुन पोस दमिस्‍क सहरते दायलाह आतोग़.

अद सहरता एरे-एरे एव्स मतोग़, अस्के पोग़ोटाहि उंदिय देबा ओना सर्ने वेह्‌च अरता.

4 वेह्‌च अरतस्के सोलु नेल अरतोग़.

अस्के “ए सोलु,

निमा नाक बाराह्‌क तिपल कीयलाह आतिन?” इनजोर ओन्क उंद आल्का केंज वाता.

5 अस्के सोलु इतोग़,

“सामि, निमा बोनिन आंदिन?” इतस्के येसु इतोग़, “निमा बोन तिपल कीयलाह आतिन, ओग़े येसुनन आंदन.

6 निमा इंजेक इग्डाह तेदिस सहरते अन, बाताल कीयनद अद नीक अगान बोग़ाय वेहतनोग़,” इनजोर इतोग़.

7 सोलुना संगे अनवालोरिह्‌क सिरप आल्का केंज वाता,

मति ओरिह्‌क बोग़े बह दिसोग़. अदिह्‌क ओर रेयिस केमेन निच मतोर.

8 पया सोलु तेदिस कोंडाङ नाह्‌किस ऊळनेके,

ओग़ मुर्तिय तोवोग़. अदिनेनाह्‌क ओना तोळतोर ओनाङ कय्किन पोसि दमिस्‍क सहरतगा ओतोर.

9 अगा ओग़ मूंड दियाङ आनाहि तोववालेवा, ओसो बाताले तिनवा-उनवालेवा मतोग़.

10 पया इद्रम आता,

दमिस्‍क सहरतगा ओर्वोग़ विस्वसि मतोग़.

ओग़ अनन्या पेदिरतोग़ आंदोग़. देवुळि तना वेहतनद लेकाते ओनगा वासि इद्रम इता, “ए अनन्या” इतस्के “बाताल सामि,” इनजोर इतोग़.

11 येसुसामि इतोग़,

“इंजेके तेदिसि सीदा इनदनद अग़दे अनजि,

यहुदा पेदिरतोना लोन अन. अनजि तरसुस सहरतोग़ सोलु बेगा मन्ह्‌तोग़ इनजोर ताल्ह्‌का. ओग़ सोलु इंजेके पार्तना कीयलाह आतोग़.

12 पार्तना कीनेके पया देवुळ तोहतनद लेकाते, ‘अनन्या पेदिरतोग़ मन्कल वासि, नना तोवयना इनजि नावा पोग़ोन कय तासिह्‌तोग़,’ इद्रम सोलु लेका ऊळतोग़,” इनजोर येसु इतोग़.

13 इतस्के अनन्याल इतोग़, “अलो सामि, ओग़ मन्कना पोल्‍लोतुन येरुसलेम सहरतगा बेद्रम नीवा मन्कलोरिन पकाय तिपल कीतोग़ इनजोर वेल्‍लाटोर लोकुर नाक वेहतोर.

14 इगा वने नीक मोळ्कवालोर सबेटोरिन दोहच ओयलाह पेर्मालोर ओन्क अदिकर ईतोर इनजि वने केंतन,” इनजोर ओग़ इतोग़.

15 इतस्के येसु इतोग़,

“आयो, निमा ओनगा अन. बाराह्‌क इतेके नावा पोल्‍लोतुन यहुदिर आयवोर दुस्रा जाततोरगा, ओरा राजालोरगा, ओसो इस्रयेल लोकुरगा इतेके यहुदिरगा एवसिह कीयलाहि, ओग़ नावा आचतोग़ सेवक आंदोग़.

16 नयेनाह्‌क ओन्क बेचोन तिपल आया पोयग़ा इनजि नना ओन तोहतकन,” इनजोर येसु इतोग़.

17 ताना पया अनन्याल येसु वेहतद लोतगा अनजि, सोलुना पोग़ोन कय तासिस इद्रम इतोग़, “ए सोलु तमो, निमा इगा वायह्‌पा अग़दे नीक दिसिस मतोग़, ओग़े येसुसामि, निमा तोवयना ओसो देवुळता पवित्र जीवाते पूरा निंदना इनजि, नाक लोहतोग़,” इनजोर इतोग़.

18 अस्केडा-अस्केन सोलुनाङ कोंडानाहि उय्का अरतप लेह्‌का बातालो अरता.

अस्के ओनाङ कोडाङ पङ्ने आसि ओग़ तोवयलाह आतोग़, ताना पया येसुना पेदिरते एग़ मीतोग़.

19 पया गाटो तितोग़ अस्के ओन्क लाव वाता.

20 अगा मनेके सोलु यहुदिरा पार्तनाताङ लोह्‌कनगा अनजि, येसुये देवुळता मग़ि इनजि पोकुर कीया बोटटोग़.

21 ओना पोल्‍लोतुन केंतोर सबेटोर पका बामिसि,

“वेग़े आयोया, येरुसलेम सहरतगा येसुन मोळ्कवालोरिन बूळे कींदोग़, इगा वने येसुन मोळ्कवालोरिन पेर्मालोरगा दोहच ओयलाह वास मतोग़!” इनजोर तमतमाय इन्दुर.

22 मति सोलुना दीरा वेल्‍लाय वीळसोर अता, येसुना पोल्‍लोतुन ओग़ वेहचोरे अंदोग़, दमिस्‍क सहरतोर यहुदिरिन येसुये देवुळ लोहतोग़ पिसिह केवाल किर्स्तु आंदोग़ इनजि बेस नेह्‌ना सास्त्रमताहि वेहतोग़, अदिह्‌क ओर पकाय एक्बेक आतोर.

23 अद्रमे वेल्‍लाङे दियाङ आतापया यहुदि मुक्यालोर सोलुन हव्कलाह कोहन्दुर.^b

24 मति अद आय्डा सोलुह्‌क एर्का आता.

ओरु ओग़ सहरताहि पेसतस्के ओन हव्ककल इनजोर सहरता अग़दगा नग़्का-पिळ्‍विळ, पियल-पोळ्‍द केपिंदुर.

25 ओनाङ कग़यवालोर बाताल कीतोर इतेके, नग़्का सोलुन ओसि उंद कुचातगा उदिह कीसि, सहरता सर्ने दोहतद किलेता किळ्कि-बूकातग्डाहि ओन पलते नेल रेहचीतोर.

26 अस्के पया सोलु येरुसलेम मल्स वातोग़, वासि अगा विस्वसिरिन कलियलाह ऊळतोग़, मति वेग़ सोलु वने येसुन विस्वस कीतोग़ इनजि ओन बोरे नमोर आंदुर, अदिह्‌क सबेटोर ओन रेयिंदुर.

27 मति बार्नबस सोलुन पोसि बळयिरगा ओतोग़, ओसि दमिस्‍क सहर दायनद अग़दे सोलु येसुन बेद्रम ऊळतोग़, येसु ओना संगे बेद्रम वळ्ह्‌कतोग़, ओसो दमिस्‍क सहरतगा बेद्रम सोलु मुर्तिय रेयवालेवा येसुना पोल्‍लोतुन पोकुर कीतोग़, इव सबे पोल्‍लोन ओरिह्‌क वेहतोग़.

28 अस्के पया सोलु विस्वसिरा संगे कलियसोरेन मंदोग़.

कलियिसि येसुना पोल्‍लोतुन रेयवालेवा पोकुर कीसोरे, पूरा येरुसलेम सहरते तिरियिंदोग़.

29 पया सोलु युनानि पोल्‍लो वळ्ह्‌कवालोर यहुदिरिह्‌क वने येसुना पोल्‍लोतुन वेहचोरेन मंदोग़.

वेहनेके,

युनानि पोल्‍लो वळ्ह्‌कवालोर यहुदिर वेना संगे ईनाह-आनाह पोल्‍लोने गिटोगटो आंदुर. अदिनेनाह्‌क ओर ओन हव्कलाह अग़ ऊळिंदुर.

30 मति विस्वसिर इद पोल्‍लोतुन केंजिसि, सोलुन सम्दुर कचुल केसरिया सहर एवनाह ओसीतोर, पया अग्डाहि ओन ओडाते उदिह कीसि तना नाग़ तरसुस सहरते लोहचीतोर.

31 अस्के पया,

यहुदा पटटे,

गालिल पटटे, सामरिया पटटे, विस्वसिरा मुडुन बोरे तिपल केवोर, अदिनेनाह्‌क ओरिह्‌क सुकम दोर्कता, ओर विस्वसते बेर्ससोर अंदुर. येसुसामिन रेयिस ताकिंदुर. पवित्र जीवा ईतद तोळते ताकिंदुर, वेल्‍लाटोर येसुन विस्वस कीसि ओरा मुडा संगे कलियिंदुर.

32 पया इद्रम आता इतेके पत्रु सबे इके-अके वेलियसोर, सारोन एरियाता लुदा नाटे येसुन विस्वस केवालोरगा अतोग़.

33 अतस्के अगा एनिया पेदिरतोग़ कय्‍क-काल्‍क वावोग़ मन्कल कलियतोग़, ओग़ आट वर्साङ कटुदग्डाहि मुर्तिय तेदोग़ आसि.

34 पया पत्रु ओन इतोग़,

“ए एनिया,

येसु किर्स्तु नीक सव्रे कीस्तोग़. अले तेदिसि नीवा कटुदुन उळ्हा,” इनजोर इतोग़. इताहे एनियाल अस्केडा-अस्केन तेदिस नितोग़.

35 लुदा नाटेनोर, सारोन एरियातोर वेल्‍लाटोर एनियाल सव्रेम आतदिन ऊळिसि येसुन विस्वस कीतोर.

36 अद्रमे पया सारोन एरियाता यापा नाटेनगा उंदि विस्वसि आंचाळ मता.

^c ताना पेदिर तबिताल आंदु,

तान दोरकास वने इन्दुर.^d अद आंचाळि नाटेनगा आस्क-कोय्तोरिह्‌क अमेसा बेसताङ कबस्क कीसि ईन्दु, लेवोरिह्‌क दर्मम कींदु.

37 अद तूकने अद आंचाळि उंद दिया दुक अरस डोलता.

डोलतस्के नाटेनाङ आस्कु ताना सेत्तातुन एग़ मीहचि पोग़ोटा मिदेता अरातगा तासताङ.

38 इंजेके लुदा नाग़ इतेके यापा नाटेनाहि एरेन मता.

पत्रु लुदा नाटेनगान मन्ह्‌तोग़ इनजि अग्डोर विस्वसिरिह्‌क एर्का आता, इद पोल्‍लोतुन केंजिसि इर्वुर मन्कलोरिन “पत्रु चट्‌पिट वायेग़” इनजि ओनेके कबुर लोहतोर.

39 अस्के पत्रु ओरा संगे अतोग़,

यापा नाटेनगा एवतस्के, ओन पोग़ोटा मिदेता अरातगा ओतोर. अगा मताङ सबे रांडे आस्कु ओनगा जमा आसि, तबितालि जीवात मनदह्‌पा अविस्किह्‌क कोटटव सबे जगाङ, गेंदेनु तोहचोर अळ्न्दुङ.

40 पया पत्रु सबेटोरिन पलते पेहचि,

मिंडाङ कोटिस देवुळतुन अर्जि कीतोग़. कीसि पया सेत्तातके ऊळिस, “ए तबिता, तेदा,” इतस्के अद आंचाळि कोंडाङ नाह्‌किस पत्रुन ऊळता, ऊळिसि तेदिस उदता.

41 पया पत्रु ताना कयदुन पोस तान निल्पिह कीतोग़, कीसि रांडे आस्किनु, दुस्रोर विस्वसिरिन केयिसि, तबिताल इंजेक जीवा अरसि निता इनजि तोहतोग़.

42 इद पोल्‍लो यापा नाटेनगा पूरा पोकुर आता.

आताह्‌कु अग्डोर वेल्‍लाटोर लोकुर येसुन विस्वस कीतोर.

43 ताना पया पत्रु यापा सहरतगान, तोलाङ ओळ्हवाल ओर्वोग़ सिमोन पेदिरतोनगा वेल्‍लाङे दियाङ रोमिस मतोग़.^e