यहुदिर गुमसिना मुनेह पोलुना पोग़ोन कसुर्क वाटिह्तोर
24
1 पया एयुङ दियाङ आनेके,
अनन्या पेर्माल ओसो यहुदिराङ उय्तुर पेदल्कु, वेरु तिरतुलु पेदिरतोग़ वकिलिन पोसि केसरिया सहरते वातोर. वासि पेलिक्स गुमसिना मुनेह पोलुना पोग़ोन कसुर तोहतोर.
2-3 पया पेलिक्स पोलुन तता वेहतोग़.
ततस्के तिरतुलु वकिल ओना पोग़ोन इद्रम कसुर वाट बोटटोग़ इतेके,
“ओ पेलिक्स महरज,
निमा राजेम ताकिह कीयनस्केडाह, माट यहुदा पटटोरोम मुर्तिय लळय आयवा मतोम. नीवाय तेल्वतेनाह्कु मावा पटटोर सुद्रेम आसोर दास्तोर, तानेनाह्कु नीक जोहर आयि. माट बेक अतेकाय, नीवा मयगा मनदनद इद गूनमता अमेसा सीता कीय्ह्नोम.
4 नना नीक वेल्लाङे पोल्लोङ वेहच तिपल केवोन, मति नीवा गूनमते मावाङ रेंड पोल्लोना अर्जतुन केंजा.
5 वेग़ मन्कल जग्ळा पुटिह केवाल,
बूममेंड मनवालोर सबे यहुदिरा नडुम कोंटेङ पुटिह केवाल. ओसो वेग़ नासरि पार्टिता पेदा मन्कल आंदोग़.a
6 मावा मंदिरतुन कळ्वोग़ कीयलाह आसोर मतोग़,
मति अद्रम केवाह माट वेन पोयतोम. [अस्के माट मावाङ अडोना लेकाते वेन सिक्सा ईस मनेरोम.
7 मति सीपय्कना मुक्याल लुसियाल वासि मयग्डाहि वेन ऊंदिस ओतोग़.
8 ओसि वेना पोग़ोन कसुर वाटटोरिन नियगा वायलाह वेहतोग़.]
b इंजेके निमान वेन ताल्ह्किस ऊळा, अस्के माट कसुर्क वाटटव सबे पोल्लोन निमा पुनदकिन,” इतोग़.
9 अस्के अगा वास मतोर यहुदिर वने वकिलनेह आसि, इव पोल्लोङ निटमे इनजोर इन्दुर.
पोलु तनाङ पोल्लोङ पेलिक्स गुमसिन वेहतह्तोग़
10 पया गुमसि पोलुन निमा वेहा इनजोर कय तोहतोग़,
अस्के पोलु इद्रम वेहतलाह बोटटोग़ इतेके, “निमा वेल्लाङे वर्साङ मावा यहुदा पटटगा नेयम कीसोर मतिन इनजोर पुतन. अदिनेनाह्क गिर्दाते नना कसुरलेवोनन इनजि तोहतह्नन.
11 नना नेटाहि बारा दियाना मुने देवुळतुन मोळ्कलाह येरुसलेमतगा अन्ज मतन.
इद पोल्लो निटम इनजोर निमा वने ताल्ह्किस पुनदा पग़यकिन.
12 देवुळता पार्तनाताङ लोह्कनगा आयि, मंदिरतगा आयि, सहरतगा आयि, नना बोनाय संगे गिटोगटो आयनद वेर ऊळोर, ओसो लोकुरिन जमा कीसि रोदा पोयपिह कीयनदिन वने ऊळोर.
13 नावा पोग़ोन वेर वाटटोर अव कसुर्कनाङ पोल्लोङ निटमे इनजोर तोहतलाह वेरगा साक्सि वने इले.
14 “मति इद उंद पोल्लो नना कबुल आय्ह्नन.
बेद अग़दुन वेर पार्टि इन्ह्तोर,
अदे येसुसामिन विस्वस कीयनद अग़दे नना ताकिस, मावा तादोर-बाबोरा देवुळतुन माळिह्नन. मोसानाङ अडोनगा, ओसो देवुळता कबुरतोरा सास्त्रमतगा रासतव सबे पोल्लोन माळिह्नन.
15 देवुळि उंद दिया हातोरग्डाहि सेतेमतोरिन, लाग्वोरिन तेग़्किह कीयग़ा इनजोर वेर देवुळता पोग़ोन आसा तासतप लेह्का नना वने आसा तासिह्नन.
16 अदिह्क देवुळता मुनेह आयि, लोकुरा मुनेह आयि, अमेसा जीवाताहि कसुरलेवप मनजि, ताकलाह ऊळिह्नन.
17 “नना वेल्लाङे वर्साङ येरुसलेम इलवा मतन, मति इंजेके मावा गरिब यहुदि मन्कलोरेनाह्क जमा कीतद दर्मम एवसिह कीयलाह ओसो मंदिरतगा देवुळतुह्क मोक ईयलाहि येरुसलेम वास मतन.
18 मंदिरतगा एडना रिवजतुन मारिह कीतापया ओर नाक मंदिरतगा ऊळतोर.
अस्के अगा नावा संगे वेल्लामुल इलोर आसि, बातय रोदा वने इलो.
19 मति आसिया पटटोर उय्तुर यहुदिर अगा वास मतोर,
ओरे रोदा पोयलाह बोटटोर. नावा बातालाय तप मतेक अचोन, नयगा कसुर वाटलाहि ओर इगा वास मनेर.
20 अले वेर इगा नितोरे वेहिर, येरुसलेमते तग्वाङ केवालोरा पंच, अद दिया नावा बाताल कसुर दोर्किह कीतोर.
21 आं ‘डोलतोर वने जीवा अरयह्तोर इनजोर नना विस्वस कीताह्कु नाक पर्ह्किस ऊळिह्निर अय!’
इनजोर इद उंद पोल्लोतुन मात्रम निटमे ओरा मुनेह जोरते केयिस वेहतन,” इनजोर पोलु इतोग़.
22 पेलिक्स इतेके येसुसामिन विस्वस कीयनद पोल्लोतुन बेस केंजिस मतोग़, अदिह्क “सीपय्कना मुक्याल लुसियाल वातापया नीवा पोल्लोता पय्सल कीकन,” इनजोर वेहच मारिह कीतोग़.
23 पया दरोगान इद्रम उकुम ईतोग़, “पोलुन दोहवालेवा जेलतगा तासा, ओसो ओना तोळतोर बातालाय ईयलाह वातेके ओरिन रोमिह केमा,” इनजोर इतोग़.
पेलिक्स, दुरुसिलाह्क पोलु येसुना पोल्लोतुन वेहतह्तोग़
24 उचुक दियाना पया पेलिक्स तना मुते,
यहुदि आंचाळ दुरुसिलान पोस वातोग़.c पया पोलुन केय लोहतोग़, पोलु वातस्के येसु किर्स्तुन विस्वस कीयनद पोल्लोतुन आळ इर्वुर केंजसोर मतोर.
25 अस्के देवुळता सेतेमते बेद्रम ताकना,
मेंदुदा उळ्बेतुन बेद्रम आव्रे कीयना, देवुळ आक्रिते दुनियामेटोरा नेयम बेद्रम कीयग़ा इव पोल्लोन पोलु वेहतोग़. पया इव पोल्लोङ केंजिस पेलिक्स पकाय रेयिस पोलुन इतोग़, “इंजेके आस्ता, निमा अन, नाक पुर्सत दोर्कतेक अचोन नीक केयकन,” इनजोर ओन लोहतोग़.
26 पोलु जेलतग्डाह पेसलाह कुस्क्ने नावा कयदे कोताङ ईयनोग़,
इद्रम गुमसिना आसा वने मंदु. अदिह्क ऊक-ऊके ओन केयिस गोटिङ कींदोग़.
27 मति रेंड वर्साङ आनेके पुरकियुस पेस्तुस पेदिरतोग़ पेलिक्सना जागातगा गुमसि आतोग़.
d पया पेलिक्स दायह्पा, पोलु कसुरलेवोग़ इनजोर पुन्ज तेला, यहुदिरिन गिर्दा कीयलाह पोलुन जेलतग्डाह विळ्सवाय अतोग़.