4 “मुने नावाय लोकुरा नडुम मनजि अहे पया येरुसलेमते वने, उड्‌लस्केडाहि नावा मनमुळ बेद्रम मता, इदिन वेल्‍लाटोर यहुदिर पुतोर.

5 मावा यहुदि दर्मताङ अडोन सबेट्काय पका नोमनद तुंगातोनन आंदन,

इतेके परुसिरा तुंगातोनन, इदिन यहुदिर बेस पुतोर. इद पोल्‍लो निटम इनजोर तमा विचर मतेके साक्सि ईयिर.

6 इंजेक इसि इद्रम आता इतेके, देवुळि मावा तादोर-बाबोरिह्‌क मुनेन बेद करल कीस मता, अदे करल निटम आयग़ा इनजि नना आसा तासतन, तासताह्‌के नावा नेयम आस्ता.

7 देवुळ इदे करलतुन निटम कीयनद आसाते मावाङ बारा कूळिनोर इस्रयेल लोकुर,

देवुळतुन नग़्का-पिळ्‍विळ पियल-पोळ्‍द मोळ्कसोरे, पोल्‍लो विळ्सतदिन अद निटम कीयग़ाये, इनजोर माळसोरेन केपिह्‌तोर. ओ राजा, नना वने अद्रमे आसा तासतन, इदिना लोप्पा यहुदिर नावा पोग़ोन कसुर वाटटोर.

8 ‘देवुळि हातोरिन जीवा अर्हतनद पोल्‍लोतुन नना पोकुर कीसोर मह्‌नन,’ इदिन मीट यहुदिरिर बाराह्‌क नमविर?

9 “नना वने मुने अद्रमे नासरेत नाटेनोग़ येसुन विस्वस केवालोरिन पका तिपल कीयना इनजोर विचर कीसोर मतन.

10 पया नना अद्रमे येरुसलेमतगा कीतन.

सामिना वेल्‍लाटोर मन्कलोरिन जेलते वाटलाहि नना पेर्मालोरग्डाहि अदिकर ताल्ह्‌किस जेलते वाटटन.

तग्वाङ केवालोर ओरिन हव्कना सिक्सा ईयह्‌पा, ओरिन हव्काट इनजोर इंदन.

11 बेगा-बेगा देवुळता पार्तनाताङ लोह्‌क मताङ,

अगा बेचानाह किर्स्तुनोर येसुन पास्कोर, अचानाह नना ओरिन पका सिक्सा कींदन. ओसो यहुदिरा बूमतुह्‌क अबर मतव सहर्कनगा वने अनजि ओरिन तिपल कींदन, अचोन ओरा पोग़ोन ओङ आंदन.

12 “अद्रमे उंद देबा पेर्मालोर नाक दमिस्‍क सहरते येसुना विस्वसिरिन पोयतलाह अन इनजोर वेहचि,

अद कबळतुन कीयलाहि अदिकर ईतोर. अस्के नना अनजोर मतन.

13 अनेके नेक निच मता, अस्के पोग़ोटाहि पोळ्दता वेह्‌चतुह्‌काय एक्वा दींचतद वेह्‌च नावा ओसो नावा तोळतोरा पोग़ोन सर्ने वेह्‌च अरतदिन ऊळतन.

14 अद वेह्‌च अरतस्के माट सबेटोरोम नेल देळ्ब अरतोम.

अरतस्के नना उंद आल्का इब्रि पोल्‍लोते इद्रम केंतन इतेके,

‘ए सोलु, निमा नाक बाराह्‌क तिपल कीयलाह आतिन? कोंदा तूतिरतुन लाता ईतेक बेद्रम गडिह्‌ता,^b अद्रमलेह्‌का नावा पोल्‍लोतुन अडम आसोर मतेके निमान आरेम आयकिन,’ इता.

15 पया ‘सामि निमा बोनिन आंदिन?’

इनजोर नना इतन.

अस्के ओग़ इतोग़, ‘निमा बोन तिपल कीयलाह आतिन, ओनने येसुनन आंदन.

16 अले तेदिस निल्म, बह इतेके निमा नाक ऊळतद पोल्‍लोतुनु ओसो नीक तोहतकन अव पोल्‍लोनु, लोकुरिह्‌क वेहतलाह नावा सेवक इनजोर नीक इंजेक निल्पिह कीय्ह्‌नन.

17 यहुदिरगा ओसो यहुदि आयवोरगा नीक लोहतह्‌नन, नीक बाताले आयवाह ओरा कयदाहि पिसिह कीकन.

18 ओरिन ईकळताहि देवुळता वेह्‌चतगा वायनदु,

देयमदीपता लावताहि देवुळतके वायनदु, अग़ तोहतलाह नीक लोहतह्‌नन. ओर नाक विस्वस कीतेके ओरा पापमता मापि आयग़ा, अहे देवुळ आचतोर लोकुरा संगे ओरिह्‌क जागा दोर्कग़ा,’ इनजोर इतोग़.

19 “अद्रमे अग्रिपा राजा, पोग़ोटाहि देवुळि नाक तोहतद लेकाते वेहतदिन बेस केंजिसि, येसु नाक ईतद उकुमतुन माळतन.

20 अदिह्‌क मुने दमिस्‍क सहरतोर यहुदिरिह्‌क, पया येरुसलेमतोर यहुदिरिह्‌क, पया पूरा यहुदिरा बूमतगा ओसो यहुदि आयवोरिह्‌क इंका ‘पापमता अग़दाहि मलसि देवुळतगा वाटु, वासि माट मलतोम इनजि बेसताङ कबस्क कीस तोहाटु,’ इनजोर इद पोल्‍लोतुन पोकुर कीसोर मतन.

21 इदिनेनाह्‌के उय्तुर यहुदिर नाक मंदिरतगा पोसि हव्कलाह आसोर मतोर.

22 मति नेंड एवनाह देवुळि नाक तोळ ईता,

अदिह्‌क उड्‌लोर बेरोर सबेटोरिह्‌क साक्सि ईयलाह आतन.

देवुळता कबुरतोरु ओसो मोसा मुय्तोना सास्त्रम, येसुसामि बाताल कीय्ह्‌नोग़ इनजि मुनेन वेहच मतोर. अद सास्त्रमतुन विळ्सिस नना बेदे वेहोन.

23 अद सास्त्रम बाताल वेहतह्‌ता इतेके,

‘देवुळ लोहवाल पिसिह केवाल किर्स्तु तिपल आस डोलनोग़. डोलिसि ओसो वने डोलतोरग्डाहि सबेटोरिह्‌क मुने जीवा अरसि, ओग़े यहुदिरिह्‌क, यहुदि आयवोरिह्‌क बेसतल कबुरता वेह्‌च तोहवाल आयनोग़,’ इनजोर सास्त्रमते रासतद मन्ह्‌ता,” इनजोर पोलु इतोग़.

24 इद्रम पोलु तना बयन वेहतह्‌पा पेस्तुस इतोग़, “ए पोलु निमा कोन बय्माङ आतिन डा, पका कग़यतिन अदिह्‌क पिसाङ आतिन बहे,” इनजोर जोरते केयतोग़.

25 अस्के पोलु इतोग़, “आयो पेस्तुस महरज नना पिसानन आयोन, सेतेमतुन बेसता बुदते वेहतलाह आतन.

26 इव पोल्‍लोङ बोग़े पुनवाह आतव आयोङ,

इनजि अग्रिपा राजाल वने इव पोल्‍लोन बेस पुतोग़, इद्रम नाक आसा मन्ह्‌ता. अदिह्‌क मुर्तिय रेयवालेवा ओना मुनेह वेहतलाह आतन.

27 ओ अग्रिपा राजानिन,

निमा बाताल इह्‌निन?

देवुळता कबुरतोर मुने रासतव पोल्‍लोन विस्वस कीय्ह्‌निना, केविन? निमा विस्वस कीय्ह्‌निन इनजोर नना पुतन,” इतोग़.

28 अस्के अग्रिपा राजाल पोलुन इतोग़, “गळ्किह्‌के नाक किर्स्तुना विस्वसि कीयलाहि ऊळिह्‌निन अय?”

29 इतस्के पोलु इतोग़, “गळ्किह्‌क आयि, वेल्‍लाय जोमते आयि, सिरप निमान आयो, इंजेके इगा नावा पोल्‍लोतुन केंतोर सबेटोर इव नाक दोहतनव गोल्स्किन विळ्सिसि नावा लेह्‌का येसु किर्स्तुना विस्वसिर आयिर इनजोर देवुळतुन अर्जि कीय्ह्‌नन,” इतोग़.

30 पोलु इद्रम इतापया राजाल, गुमसि, बेर्निके ओसो ओरा संगे उदिस मतोर सबेटोर तेदतोर.

31 तेदिस अग्डाह अबर अनजि तमतमा इद्रम वळ्ह्‌कलाह आतोर, “वेन हव्कना इलवेक जेलते वाटना लायकता बाताले वेग़ कसुर केवोग़,” इतोर.

32 अग्रिपा राजाल पेस्तुसिन इतोग़, “ ‘कय्सर राजाना मुनेह नावा नेयम आयि’ इनजोर वेग़ नीक अर्ज केवेक अचोन, वेन विळ्सनाह आस मनालि,” इतोग़.