इद सीटटुन रासवाल येसु किर्स्तुना बळयि पोलु आंदोग़. पोलु इपिसुस सहरते मतस्के इद सीटटुन कुरिंततोर विस्वसिरेनाह्‌क रासतोग़. पोलु दुस्रा मल्का किर्स्तुना बेसता कबुर वेहचोर तिरियिह्‌पा कुरिंत सहरते विस्वसिरा मुडुन तयर कीतोग़. इद पोल्‍लो किर्स्तुना बळयिराङ कबस्क 18:1-18 वचनतगा मन्ह्‌ता.

पोलु इद सीटटुन बाराह्‌क रासतोग़ इतेके, ओग़ अग्डा विस्वसिरा मुडगा मतव बेव-बेव लाग्वव पोल्‍लोन केंजतोग़. अग्डा मुडोर मुक्यालोरग्डाहि उंद सीटि वने पोलुह्‌क दोर्किस मता. अद सीटटगा उचुक पोल्‍लोन बह कीयना बह पुनदना इनजोर रासिसि ताल्ह्‌किस मतोर. अव पोल्‍लोना लोप्पा वेहतव पोल्‍लोन पोलु इद सीटटगा रासतोग़. ओसो माट किर्स्तुना मन्कलोरोम इनजोर उगस इनदनद आयो, मति किर्स्तुना मन्कलोरा लेह्‌कान ताकना इनजोर इद सीटटगा रासतद मन्ह्‌ता. ओसो मावा मनमुळि दिनम पवित्रते बेर्ससोर दायना, ओर्विह्‌क-ओर्वोग़ जीवा कीयनदे बेरा पोल्‍लो इनजोर रासतोग़, अहे विस्वसिर जमा आतस्के बह मनदना इनजोर वने रासतोग़.