3 अद कबुरता सबेट्‌क मोदुल पोल्‍लोतुन, नाक मुने वेहतपे मीक काग़्हचीतन; अद पोल्‍लो इदे आंदु: देवुळता सास्त्रमतगा मुनेन रासतप लेह्‌का, किर्स्तु मावा पापमतेनाह्‌क मोक आसि डोलतोग़. 4 ओग़ डोलतस्के मन्कलोर ओना सेतातुन गुमयातगा मिसतोर. देवुळता सास्त्रमतगा मुनेन रासतप लेह्‌का मूंड दियाने देवुळि ओन जीवा अर्हचीता. 5 जीवा अरतस्के किर्स्तु पत्रुह्‌क दिसतोग़. पया बारा बळयिरिह्‌क दिसतोग़. 6 ताना पया एयुङ नूह्‌किह्‌काय एक्वा मावोर विस्वसि मन्कलोरिह्‌क उंदिय देबा दिसतोग़. ओर मन्कलोरग्डाहि इंजेक उच्‍वुर डोलतोर, मति वेल्‍लाटोर इंका जीवात मन्ह्‌तोर. 7 ताना पया तनतमोग़ याकुबिह्‌क दिसतोग़. अहे ओसो तनाङ सबेटोर बळयिरिह्‌क दिसतोग़. 8 सबेटोरिह्‌काय पया नाक वने दिसतोग़. नना दुस्रा रीतते किर्स्तुना बळयिनन आतन.^a डोलिस पुटटप लेह्‌का नना देवुळतुह्‌क बातय कबळतुह्‌क अरवोन आंदन. 9 बाराह्‌क इतेके, मुने देवुळता मुडुन नल्ह्‌तना कोह्‌कना कीसोर मतन. अदिनेनाह्‌क बोग़े नाक किर्स्तुना बळयि इनदना लायक इलोन. नना किर्स्तुना बळयिरग्डाह सबेट्‌क उड्‌लोनन इनजोर पुतन. 10 मति नना इंजेके बळयिनन मह्‌नन इतेके, देवुळता दयाते मह्‌नन! देवुळि नाक ईतद दया उगस अनो. किर्स्तुना बळयिर दुस्रोरिह्‌काय एक्वा नना एपुर पेसनाह कह्‌टेम कीतन. तेला मति निटम इतेके नावाय लावते नना केवोन, देवुळि तना देय्वाते नयग्डाहि कह्‌टेम कीता. 11 अदिनेनाह्‌क नना पोकुर कीतेकाय, किर्स्तुना दुस्रोर बळयिर पोकुर कीतेकाय, माट पोकुर कीयनद पोल्‍लो उंदिये: अद किर्स्तु हामुरताहि जीवा अरयनद पोल्‍लो आंदु. ताने मीट विस्वस कीतिर.

12 किर्स्तु डोलतोरग्डाह जीवा अरतोग़ इनजोर मीक पोकुर कीतोम! अह इतेके डोलतोर विस्वसिर ओसो वने जीवा अरवोर इनजोर इद्रम मियग्डाह उच्‍वुरिर बाराह्‌क इह्‌निर?^b 13 डोलतोर ओसो वने जीवा अरवोर इतेके, देवुळि किर्स्तुन वने जीवा अर्हो. 14 किर्स्तु ओसो वने जीवा अरवेक अचोन, माट मीक ओना बेसता कबुर पोकुर कीयनद उगसे आता. मीवा विस्वस वने उगसे आता. 15 इद ओसो पोल्‍लो: देवुळि किर्स्तुन ओसो वने जीवा अर्हता इनजोर मुनेन मीक वेहच मतोम. डोलतोर जीवा अरवेक अचोन, देवुळि किर्स्तुन वने जीवा अर्हता पग़वो. इतेके माट देवुळता लोप्पा जोल साक्सि ईतप लेह्‌कान आता. 16 बाराह्‌क इतेके, डोलतोर जीवा अरवोर इतेके, किर्स्तु वने जीवा अरवोग़ इतप आता. 17 देवुळि किर्स्तुन जीवा अर्हवेके मीवा विस्वस उगसिन आता, इंका वने मीट पापमता कयदेन मह्‌निर, 18 ओसो किर्स्तुन विस्वस कीस डोलतोर वने पूरा देवुळताहि एग़तोर. 19 सिरप इद बूमतगा पिसनद पिसमुळतेनाह्‌क किर्स्तुना पोग़ोन आसा कीतल इतेके, माट सबेटोर मन्कलोरिह्‌काय एक्वा आरेम आतोरल आंदल.

20 मति निटम पोल्‍लो इद आंदु: देवुळि, किर्स्तुन डोलतोरग्डाह ओसो वने जीवा अर्हता! डोलतोरग्डाहि जीवा अरतोग़ ओग़े मुनेतोग़ आंदोग़.^c 21 अद इद्रमि मन्ह्‌ता: ओर्वोग़ मन्कना मेटे हामुर वाता. अहे दुस्रोग़ मन्कना मेटे बार डोलतोर ओसो वने जीवा अरयनद वाता. 22 इतेके आदम मुय्तोनाहि पुटटोरल माट सबेटोरल हायनल. मति किर्स्तुना संगे जोळेम आतोर मन्कलोरिन बार देवुळि ओसो वने जीवा अर्हतग़ा. 23 मति ओर्वोग़-ओर्वोग़ मन्कल ओर्कुलते जीवा अरयनुर. जीवा अरवालोरग्डाहि किर्स्तुये मुनेतोग़, पया ओग़ ओसो वने वायनोग़ अस्के ओना मन्कलोर जीवा अरयनुर. 24 पया इळ्ता बूमते आयिङ, पोग़ोटा बूमते आयिङ, देवुळता विरुद मनदनव सबे राजेह्‌किन, सबे अदिकरते मनदनविन, सबे लावताङ देयह्‌क-बूतह्‌किन किर्स्तु आरे कीसि, तना राजेम कीयनद अदिकरतुन देवुळबाबाना कयदे ईयनोग़; अस्के बूमता आक्रि आयग़ा. 25 विरुदतव सबेटविन आरे कीयनाह्‌जोम, किर्स्तु राजेम कीसोर मनदनद गर्ज मन्ह्‌ता. 26 हामुरि, इद वने मावा पका विरुद मनदनद आंदु, आक्रिते किर्स्तु तान वने बूळे कीयनोग़. 27 “देवुळि सबेटविन ओना अदिकरते कीसीता,”^d इनजोर तना सास्त्रमतगा रासतद मन्ह्‌ता. “सबेटविन” इनजोर रासतेके, देवुळतुन विळ्सिसि सबेटविन इनजोर बराबर एर्का आयग़ा. इतेके देवुळि सबेटविन किर्स्तुना अदिकरते कीसीतेक तेला, देवुळि तना ओना कयदे इले. 28 सबेटविन ओना अदिकरते कीसीता, मति सबे ओना अदिकरते आतापया, देवुळिये सबेटविन पूरा ताकिह कीयि इनजोर देवुळता मग़ इंका ताना अदिकरते मनदनोग़.

29 डोलतोर विस्वसिर ओसो वने जीवा अरवेके, डोलतोरेनाह्‌क येसुना पेदिरते एग़ मीवालोर पया बह कीयनुर? डोलतोर जीवा अरवेके, ओरेनाह्‌क मन्कलोर बाराह्‌क येसुना पेदिरते एग़ मीस्तोर?^e 30 ओसो माट सेवकिरोम इतेके दोकाते मनजि बेसता कबुरतुन बाराह्‌क पोकुर कीयलाह आतोम? डोलतोर ओसो वने जीवा अरवेके, नग़्का-पियलि अद्रम बाराह्‌क तिपल आवेरोम? 31 मावोर विस्वसिरिर! मावा किर्स्तु येसुसामि नावा मेटे मियगा बेचोटा बेरा कबळ कीतोग़ इनजि नना पोंगसोर मह्‌नन, इद करलता पोल्‍लो. ओसो नावा सेवातेनाह्‌क दिनमे हामुरता दोका नाक वास्ता, इद अचोने करलता पोल्‍लो. 32 इपिसुस सहरतगा, गेळाजन्वर्कना बुदलेह्‌काडोर मन्कलोरा संगे लळेम आतन. डोलतोर ओसो वने जीवा अरवोर इतेके, ओरा संगे नना लळेम आस नाक बाताल पाय्दा दोर्कलि? अह इतेके, इस्रयेलतोर मुने इनदना लेह्‌कान, “नाळ कोनि डोलना मन्ह्‌ता, अदिनेनाह्‌क तिनदकल, उनडकल, गिर्दाते मनदकल,”^f इनजोर मनाह आवालि. 33 अद्रम इनवालोरिन मीक नाळेह कीयलाह एमाटु. लाग्वोरा संगे गोत आतेके, देवुळतुह्‌क विचर वानाह ओर मीक पिसलाह एवोर. 34 इव पोल्‍लोना लोप्पा पुन्ज मन्ह्‌टु. देवुळतुह्‌क विचर वातप बेस बुदते मन्ह्‌टु, पापम कीयनद विळ्साटु. मीक लजा वानाह उंद पोल्‍लो इह्‌नन, मियगा उच्‍वुर मन्कलोरिर देवुळतुन इंका पुनविरे.

35 मियग्डाहि बोग़ाय इद्रम इनेग़: डोलतोर ओसो वने बेद्रम जीवा अरयह्‌तोर? जीवा अरतापया ओरिह्‌क बेद्रमता मेंदुल मनदग़ा इनजोर ताल्ह्‌केग़! 36 अद्रम ताल्ह्‌कवानिन बुदलेवोनिन! निमा वीतिह्‌निन अद पेनेमि, डोलतप लेह्‌का बूमता इळ्‍न मतेक कोनि ओसो मोळ्यिह्‌ता! 37 निमा गोह्‌काय, इलवेके बेव दुस्राङ विजाङ वीततस्के, मोदुदुन वीतविन, वेट पेनेह्‌किने वीतिह्‌निन. 38 मति अद मोळ्यिह्‌पा, देवुळि तना विचरते अद पेनेमतुह्‌क मोदुल ईस्ता. उंद-उंद पेनेमतुह्‌क अलग-अलग मोदुल मन्ह्‌ता. 39 अद्रमे मन्कलोरा मेंदुल दुस्राये, जन्वर्कना मेंदुल दुस्राये, पिटेना मेंदुल दुस्राये, मीन्कना मेंदुल दुस्राये. 40 ओसो पोग़ोटा बूमतगा मनदनव मन्ह्‌ताङ, इद बूमतगा मनदनव मन्ह्‌ताङ. पोग़ोन मनदनविस्कना सोबा दुस्राये, इद बूमतगा मनदनविस्कना सोबा दुस्राये. 41 पोग़ोन पोळ्दता वेह्‌च दुस्राये, नेलाता वेह्‌च दुस्राये, उकाना वेह्‌च दुस्राये. उकाना वेह्‌च वने अलग-अलग मन्ह्‌ता.

42 डोलतोर ओसो वने जीवा अरयनद वने अद्रमे. इद मेंदुलि आक्रिते कळियग़ा, मति देवुळि तान ओसो वने जीवा अर्हतस्के, अद मेंदुल बेस्केन बूळेम आयो आयग़ा. 43 इद मेंदुलता अचोन कदर मनो, तान्क तक्वा लाव मन्ह्‌ता. मति देवुळि तान ओसो वने जीवा अर्हतस्के ताना पका सोबा मनदग़ा, तान्क पकाय लाव मनदग़ा. 44 मावा मन्कना लावतद मेंदुलतुन मन्कलोर पोहतह्‌तोर, मति देवुळि तान ओसो वने जीवा अर्हतस्के, अद देवुळता लावतद मनदग़ा. मन्कना लावतद मेंदुल माक इंजेक मन्ह्‌ता. अद्रमे देवुळता लावतद मेंदुल वने मनदग़ा. 45 देवुळता सास्त्रमतगा इद्रम रासतद मन्ह्‌ता: मुनेतोग़ मन्कल आदम जीवाता मान्वल आतोग़^g इनजोर रासतद मन्ह्‌ता. अद्रमे पयाडोग़ आदम, इतेके किर्स्तु, देवुळता पिसमुळ ईयनद जीवा आतोग़. 46 मति देवुळता लावतद मेंदुलि मुनेता मेंदुल आयो. मुने मनदनद मेंदुलि मन्कना लावतदु. पयाडा मेंदुलि देवुळता लावतदु. 47 मुनेतोग़ मन्कल बूमता तोळ्योते पंडटोग़ु, मति पेग़्केडोग़ मन्कल किर्स्तु, पोग़ोटोग़ आंदोग़. 48 बूमतोर सबेटोर मन्कलोर, तोळ्योते पंडटोग़ मन्कन लेह्‌कान आतोर. देवुळता पिसमुळ दोर्कतोर मन्कलोरगा बारा, पोग़ोटोग़ मन्कना बुद मन्ह्‌ता.^h ओरिह्‌क, पोग़ोटोग़ मन्कन लेह्‌कान मेंदुस्क वने मनदनुङ. 49 इंजेके माट तोळ्योते पंडटोग़ आदमना लेह्‌कान मह्‌नल. पया माट पोग़ोटोग़ मन्कल किर्स्तुना लेह्‌कान मनदकल.ⁱ

50 मावोर विस्वसिरिर! इदे पोल्‍लो वेहतलाह आतन: मन्कना लावतद मावा मेंदुलि देवुळ राजेम ताकिह कीयनगा मनदा पग़वो. इतेके कळियनद मेंदुलि, कळियवदिनगा मनदा पग़वो. 51-52 इद केंजाट! इचानाह मन्कलोर पुनवद पोल्‍लोतुन मीक वेहतह्‌नन: माट मन्कलोरग्डाहि उच्‍वुर मन्कलोरल डोलवल, मति आक्रिता अकुम ऊरतस्के, माट सबेटोरल बद्‌लेम आयकल. आक्रिता अकुम केंज वायग़ा. अस्के देवुळि डोलतोर विस्वसिरिन, बेस्केन कळियवद मेंदुल अग़्के अस्केडा-अस्केन ओसो वने जीवा अर्हतग़ा, अस्के माट जीवात मनवालोरल बद्‌लेम आयकल. 53 मावा इद मेंदुलि डोलनदु, ताना पया कळियनदु; मति इद डोलवद, कळियवद मेंदुल मारियना गावले. 54-55 अद्रम आतस्के देवुळता सास्त्रमतगा मुनेन रासतद पोल्‍लो करल आयग़ा: