4 मति देवुळि तना मग़िन लोहचि, मन्कन बेचोन जीवा कीस्ता इनजि तना गूनम तोहचीता.

5 ओसो माक पिसिह कीता. माट बेसताङ कबस्क कीतल इनजोर माक पिसिह केवो; मति माक ऊळिस तनाय दयाते पिसिह कीता. पापम एडनाह मावा जीवातुन नोग़ता, ओसो तना पवित्र जीवाते मावा जीवातुन पूना कीसि माक पूना पुटमुळ ईता.

6 माक पिसिह केवाल येसु किर्स्तुना मेटे, मावा जीवातगा निंदिस बल्क अरनाह देवुळि तना जीवातुन वळता.

7 इद्रमलेह्‌का देवुळि माक दया कीसि सेतेमतोर कीता, कीताह्‌कु माट इंजेके तानग्डाहि अमेसाता पिसमुळता तूस दोर्किह कीकल इनजोर आसा कीयलाह आतल.

8 इंजेके नना रासतन अव पोल्‍लोङ जोलताङ आयोङ. नना नीक वेहतह्‌नन, इव मोदुल पोल्‍लोङ इनजि इविस्किन तेळियिह कीसोर मन. अस्के देवुळतुन विस्वस कीतोरु बेसताङ कबस्क कीयना सीतातेन मनदनुर. नना वेहतव पोल्‍लोङ सबेट्काय बेसताङ, ओसो मन्कलोरिह्‌क पाय्दाताङ पोल्‍लोङ आंदुङ.

9 मति उगसताङ पोल्‍लोने गिटोगटो आयनगा, जोला-जमाताङ लेकाङ-जोकाङ कीयनगा, यहुदिराङ अडोना लोप्पा जग्ळा-बोबा कीयनगा अनमा. अव पोल्‍लोङ उगसताङ, पाय्दालेवाङ आंदुङ.

10 विस्वसिरा संगे गिटोगटो आसि कोंटेङ पुटिह केवाल मन्कन उंद-रेंड मल्काङ अद्रम केमा इनजोर वेहच ऊळा. ओग़ केंजवेके ओन जेक तासा.

11 इद्रमतोग़ बेसता अग़दाहि लेसतोग़, ओग़ कुदि कसुर आतोग़ इनजोर ओनाय पापम तोहता, इदिन निमा पुतिन.

12 नना नीवा बद्लाते ओर्विन कबळ कीयलाहि लोहतकन: अरतिमास^a इनवान इलवेके आसिया पटटोग़ तुकिकुसिन^c. ओरग्डाह बोग़ाय अके वातेके, निमा नयगा नीकुपुलिस^b सहरते वायलाह तयर आयकिन. नना इर्ङमतस्के नीकुपुलिस सहरते मनदलाह विचर कीतन.

13 जेनास^d इनवाल वकिल ओसो अपुलोस^e, वेर इर्वुर मियेके वासि रोमनुर. वेरा पय्नमते वेरिह्‌क बेस-नेह्‌ना सार-बार कीस लोहा. वेरिह्‌क बातालतये कमि आयमाकि.

14 इद्रमलेह्‌का मावोर विस्वसिर बाताले कबळतुह्‌क अरवा मनदनद आयो, पका गर्ज मता मन्कलोरा गर्जतुन पूरा कीयनासाटि बेसताङ कबस्क कीयलाह कग़यसोर मनिर.

15 इगा नयगा मनवालोर सबेटोर नीक जय येसु वेहतलाह आतोर. ओसो माक जीवा केवालोर मावा तोळतोर विस्वसिरिन पोलु जय येसु वेहतोग़ इनजोर वेहा. मीट सबेटोरिह्‌क देवुळि देय्वा ईयि.