6 बोग़ देवुळताहि इद बूमतगा वातोग़, वासि देवुळता पेदिरते एग़ मीतोग़ ओसो हव्कनागुटातगा नेतुर पोहचि मोक आयलाह वास मतोग़ ओग़ येसु किर्स्तुय आंदोग़. ओग़ बोग़ आंदोग़ इनजि सिरप ओना एग़ मीयना रिवजिये तोहो, मति ओना नेतुर पोहच मोक आयनद कबळ वने तोहतह्‌ता. इद्रम देवुळता पवित्र जीवा इद पोल्‍लोता साक्सि ईस्ता. बाराह्‌क इतेके देवुळता पवित्र जीवा सेतेमता मन्ह्‌ता.^a

7-8 येसुना साक्सि ईयनव मूंड मन्ह्‌ताङ, पवित्र जीवा, देवुळता पेदिरते मीतद एग़ु ओसो येसु पोहतद नेतुरि. इव मूंड आस कलियिसि साक्सि ईस्‍ताङ.

9 माट इतेके मन्कलोर ईतद साक्सितुन केंजिसि इद सेतेमे मन्ह्‌ता इह्‌नल, मति देवुळि ईयनद साक्सि इतेके मन्कलोरा साक्सितुह्‌काय बेचोनो वीळिस बेरा ओसो पका बर्वसलायकता आंदु. बह इतेके देवुळि तना मग़ना लोप्पा साक्सि ईता.

10 अदिनेनाह्‌क देवुळता मग़ि येसुसामिन बोग़ विस्वस कीस्तोग़, ओग़ इद साक्सितुन तना जीवातगा तासिह्‌तोग़. मति बोग़ विस्वस केवोग़, ओग़ देवुळतुन जोल इन्ह्‌तोग़. बाराह्‌क इतेके देवुळ कुद तना मग़ना लोप्पा ईतद साक्सिता पोग़ोन ओग़ विस्वस केवोग़.

11 देवुळि ईतद साक्सि इद्रम मन्ह्‌ता इतेके, देवुळि माक अमेसाता पिसमुळ ईता, अद पिसमुळि ताना मग़ि येसुसामिनगा दोर्किह्‌ता.

12 बोग़ येसुसामिना संगे तुंडिसि मन्ह्‌तोग़, ओनगा अद पिसमुळ मन्ह्‌ता. मति बोग़ येसुसामिन विस्वस केवोग़, ओनगा मात्रम अद पिसमुळ इले.

13 देवुळता मग़ि येसुसामिना पोग़ोन विस्वस केवालोरिर, अमेसाता पिसमुळ इंजेके मियगान मन्ह्‌ता, इनजि मीट पुनदना इनजोर रासलाह आतन.

14 देवुळता विचर मतपु माट तान बातालाय ताल्ह्‌कतेके, अद मावा पोल्‍लोतुन केंजिह्‌ता इनजोर माक दीरा मन्ह्‌ता.

15 देवुळि मावा ताल्‍ह्‌कनदिन केंजिह्‌ता इनजोर माट पुह्‌नल, इतेके माट बाताल तान ताल्ह्‌कतल अद माक दोर्कताये इनजोर वने माक एर्का मन्ह्‌ता.

16 बोग़ाय तना तोळतोग़ विस्वसिनु देवुळताहि एग़िह केवद पापम कीयह्‌पा ऊळतेके, ओनेनाह्‌क ओग़ पार्तना कीयना गावले. पापम केवाल पापमताह मलतेके देवुळि ओन्क पूना पिसमुळ ईयग़ा. इद्रमता पापमते बोर दल्गिस मन्ह्‌तोर, ओरिन अद पापम देवुळताहि एग़िह केवो आयग़ा, ओरेनाह्‌के नना इव पोल्‍लोङ वेहतलाह आतन. मति बेद पापम देवुळताहि एग़िह कीस्ता, अद पापमतेनाह्‌क मीट पार्तना कीम्ह्‌टु इनजोर नना वेहोन.^b

17 सबे लाग्वाङ कबस्कु पापमे आस्ताङ, मति सबे पापम कबस्‍कु देवुळताहि एग़िह केवोङ.

18 बोरु देवुळताङ मग़्क-मयस्क आस्तोर, ओर पापम कीसोर मनोर इनजोर माक एर्काय मन्ह्‌ता. देवुळता मग़ि येसुसामि ओरा ऊळेवाळे कीस्तोग़, देयह्‌कना मुक्याल ओरिन बोय पग़वो.

19 ताना कयदे इद पूरा लाग्वा दुनिया मन्ह्‌ता, मति माट इतेके देवुळता लोकुरल आंदल इनजोर माट पुह्‌नल.

20 देवुळता मग़ि येसुसामि इद बूमतगा वासि, सेतेम देवुळतुन पुनदना इनजि ओग़ माक बुद ईतोग़. माट इंजेके इदे निटम देवुळता संगे जोळेम आतल, इतेके ताना मग़ि येसु किर्स्तुना संगे जोळेम आतल. सेतेम देवुळ ओसो अमेसाता पिसमुळ एवाल वेग़े आंदोग़. माक विस्वसिरिह्‌क इव सबे पोल्‍लोङ एर्काय मन्ह्‌ताङ.

21 अदिनेनाह्‌क पेकोरिर, मीटु सबेटव जोल पेन-बोमानग्डाह जेक मन्ह्‌टु.