جَگت ری شرُوعات
اِیشوَر رو دھرتی اَن اَکاش نا بݨاوݨ
1
‏1 اِیشوَر شرُوعات میں دھرتی اَن اَکاش نا بݨایا۔ ‏2 اُوئے گھڑی دھرتی رو کوئی نمُونو کونی ہَتو اَن اُوئے تے کئیں وی کونی ہَتو۔ اَن چارے پاخے چھَڑو پاݨی اِی پاݨی اَن اَندھار گھور ہَتو۔ اَن اِیشوَر ری آتما خارے پاݨی تے ہر جگہا ہَتی۔
پہلکو ݙن
اِیشوَر رو اُجاݪے نا بݨاوݨ
‏3 پَچھے اِیشوَر کَہیو، ”اُجاݪو ہو جاوے۔“ اَن اُجاݪو ہو گیو۔ ‏4 اِیشوَر جویو کہ اُجاݪو بھَلو ہے۔ پَچھے اِیشوَر اُجاݪے اَن اَندھارے نا نیارو کریو۔ ‏5 اِیشوَر اُجاݪے نا ݙن کَہیو اَن اَندھارے نا رات کَہیو۔ پَچھے آتھݨ ہوئی اَن خاکݪے ہوئی اَن ایہ پہلکو ݙن ہویو۔
ٻِجو ݙن
اِیشوَر رو اَکاش نا بݨاوݨ
‏6 پَچھے اِیشوَر کَہیو، ”پاݨی رے بِچ میں بِتھی ہووے، جکے خاں ماتھلو پاݨی ہیںٹھلے پاݨی خاں نیارو ہووے۔“ ‏7 اَن اِیئاںج ہویو۔ اِیشوَر ماتھلے پاݨی اَن ہیںٹھلے پاݨی رے بِچ میں بِتھی بݨائی۔ ‏8 اَن اِیشوَر ماتھلی بِتھی نا اَکاش کَہیو۔ پَچھے آتھݨ ہوئی اَن خاکݪے ہوئی اَن ایہ ٻِجو ݙن ہویو۔
تِیجو ݙن
اِیشوَر رو خُوکی دھرتی، سمندر اَن بݨاں نا بݨاوݨ
‏9 پَچھے اِیشوَر کَہیو، ”اَکاش خاں ہیںٹھا آݪو پاݨی ہیک جگہا بھیݪو ہووے کہ خُوکی جگہا ݙِخیجے۔“ اَن اِیئاںج ہویو۔ ‏10 اَن اِیشوَر خُوکی جگہا نا زمین کَہیو اَن جکو پاݨی ہیکی جگہا بھیݪو ہو گیو تو اُوئے نا سمندر کَہیو۔ پَچھے اِیشوَر جویو اَن اُوئے نا بھَلو لاگو۔ ‏11 پَچھے اِیشوَر کَہیو، ”دھرتی ماتھے ہر قسم رو گاخ، ٻِیج آݪا ٻُتھا اَن پھل آݪا بݨ اُگے، جکو آپری آپری جِنَخ رو پھل ݙے اَن ٻِیج راکھے۔“ اَن اِیئاںج ہویو۔ ‏12 پَچھے دھرتی ماتھے گاخ اَن ٻِیج آݪا ٻُتھا اَن پھل آݪا بݨ اُگیا، جکاں را ٻِیج اُوئاں ری جِنَخ جیَہڑا ہَتا۔ پَچھے اِیشوَر جویو اَن اُوئے نا بھَلو لاگو۔ ‏13 پَچھے آتھݨ ہوئی اَن خاکݪے ہوئی اَن ایہ تِیجو ݙن ہویو۔
چوتھو ݙن
اِیشوَر رو خُورج، چاںد اَن تاراں نا بݨاوݨ
‏14 پَچھے اِیشوَر کَہیو، ”اَکاش میں اُجاݪو ݙیوݨ آݪے چیزاں ہووے، جکو ݙن اَن رات نا نیارو کرے اَن جکاں خاں ݙناں، مُداں اَن برخاں ری ٹھاء لاگے۔ ‏15 اَن او اَکاش میں اُجاݪے رے خارُو ہووے کہ اُوئاں خاں دھرتی ماتھے اُجاݪو ہووے۔“ اَن اِیئاںج ہویو۔ ‏16 اِیئاں اِیشوَر ݙن رے خارُو خُورج بݨایو اَن رات رے خارُو چاںد بݨایو کہ جکاں خاں ٹائیم رو ٹھاء لاگے۔ اَن اُوئے تارا وی بݨایا۔ ‏17 اِیشوَر اُوئاں خاراں نا اَکاش میں راکھیا کہ او دھرتی ماتھے اُجاݪو کرے، ‏18 اَن اُوئاں خاں ݙن اَن رات رے فرق فرق ٹائیم رو ٹھاء لاگے اَن اُجاݪو اَندھارے خاں نیارو ہووے۔ اِیشوَر جویو اَن اُوئے نا بھَلو لاگو۔ ‏19 پَچھے آتھݨ ہوئی اَن خاکݪے ہوئی اَن ایہ چوتھو ݙن ہویو۔
پانچووں ݙن
اِیشوَر رو پاݨی رے جِیواں اَن پَکھیاں نا بݨاوݨ
‏20 پَچھے اِیشوَر کَہیو، ”پاݨی ڈھگ خارے مَچھیاں اَن پاݨی میں رہوݨ آݪے جِیواں خاں بھریجے اَن پَکھی اَکاش میں اُݙے۔“ ‏21 پَچھے اِیشوَر موٹا موٹا سمندر را جِیو، مَچھے اَن ہر قسم را چھوٹا موٹا پاݨی را جِیو اُوئاں ری جِنَخ جیَہڑا بݨایا، اَن ہر قسم را پَکھی اُوئاں ری جِنَخ جیَہڑا بݨایا۔ اَن اِیشوَر جویو اَن اُوئے نا بھَلو لاگو۔ ‏22 پَچھے اِیشوَر اُوئاں نا برکت ݙے ری کَہیو، ”تھے بیاؤ بَدھو اَن سمندر رے پاݨی نا بھر ݙو اَن پَکھی دھرتی تے ڈھگ بَدھ جاوے۔“ ‏23 پَچھے آتھݨ ہوئی اَن خاکݪے ہوئی اَن ایہ پانچووں ݙن ہویو۔
چھیووں ݙن
اِیشوَر رو دھرتی رے جِناوراں اَن اِنسان نا بݨاوݨ
‏24 پَچھے اِیشوَر کَہیو، ”دھرتی تے ہر قسم را جِیو ہووے، جاں ہر قسم رو مال، جںگلی جِناور اَن چھوٹا موٹا پیٹ گِخا بہوݨ آݪا جِیو۔“ اَن اِیئاںج ہویو۔ ‏25 اَن اِیشوَر ہر قسم رو مال، جںگلی جِناور اَن چھوٹا موٹا پیٹ گِخا بہوݨ آݪا جِیو بݨایا۔ پَچھے اِیشوَر جویو اَن اُوئے نا بھَلو لاگو۔ ‏26 پَچھے اِیشوَر کَہیو، ”ہمے مھے اِنسان نا آپ جیَہڑو بݨاواں اَن او مَچھیاں، پَکھیاں، مال، ہر قسم رے چھوٹے موٹے جِناوراں اَن خاری دھرتی ماتھے حکُومت کرے۔“ ‏27 پَچھے اِیشوَر اِنسان نا آپ جیَہڑو بݨایو اَن اُوئاں نا نر اَن ناری بݨایا ‏28 اَن اِیشوَر اُوئاں نا برکت ݙِنی اَن کَہیو، ”بیاؤ بَدھو اَن خاری دھرتی تے کھِںڈ جاؤ اَن خارے چیزاں یعنی مَچھیاں، پَکھیاں اَن خارے جِناوراں تے حکُومت کرو۔“ ‏29 پَچھے اِیشوَر کَہیو، ”ہُوں تھاں نا کھاوݨ رے خارُو ہر قسم رو دھان، سبزے اَن پھل ݙئیں وو۔ ‏30 اَن ہُوں خارے جِناوراں نا، یعنی خارے مال اَن جںگلی جِناوراں، خارے پَکھیاں اَن دھرتی تے پیٹ گِخا بہوݨ آݪا جِیواں نا، ہر قسم را پھل اَن سبزے کھاوݨ خارُو ݙئیں وو۔“ اَن اِیئاںج ہویو۔ ‏31 پَچھے اِیشوَر جکو کُجھ بݨایو تو اُوئے نا جویو کہ ڈھگ اِی بھَلو ہے۔ پَچھے آتھݨ ہوئی اَن خاکݪے ہوئی اَن ایہ چھیووں ݙن ہویو۔