¹ Zaeng ramhbiucdou tangv, Jisu Kapernaum khou guang bam dat khou, kamei kai khou bam e twmei chu the. ² Mi khou tei meic mpeyna guang kaduaina, kaimun paengc khou tei sini chan mak khe. Mi khou tei Jisu rui meicnunc khou tei lat dinc bam khwan e. ³ Khoutei kapaek theihmei gaanv khat ta gaanv padeih rui puancna Jisu daeng khou guang khwan e. ⁴ Meic geic langv tina Jisu daeng khou puanc guang tangc ngam mak laa thena, Jisu bammei kaanv khou kai nam ra phouna kaniw rui mi pu ta tei kamei zip bammei kazy mpamc mpat key the. ⁵ Khoutei Jisu kaniw ramlum tei how laa khou, "Abung le, nang paap guay kuaklou the," twna kapaek theihmeipu khou tei sa the.

⁶ Mi khou tei Riakdanv tadin gaanv saekc dungc bam khwan e. Kumna kaniw rui kaniw lungning khou mi kumcna kakhanh bam khwan e: ⁷ "Mi pu hei tabui zaeng rui mi hei sa tu cho? Kamei Ravguangc ta thouhsw makpui tuang e. Ravguangc na hamhna thow rui paapc kuaklou ngam nina cho?"

⁸ Mi kumna kaniw kakhanh bammei tei Jisu kalungning khou thay lana kaniw khou sa the, "Tabui zaeng rui nangniw mi kumna kakhanh bam tu cho? ⁹ Kapaek theihmeipu khou hei, 'Nang paap guay kuaklou the,' twna samei chiw ni, 'Nang tuang zy laa thauna tat tho,' twna samei chiw cho? ¹⁰ Meic Nac Mpouh hei paapc guay kuaklou khang kandih khou ngamv nai e twmei nangniw thay khang, (kamei rui kapaek theihmeipu khou tei sa the) ¹¹ ai rui nang khou sa e: Thau tho, nang zy laa thauna nang kai thangc tat tho."

¹² Khoutei kamei thauna katuang zy laa thauna meic guayna hu khou tei tat pat kan the. Kum tina kaniw guay ngakna, "Mi kumhmei hei aniw how zat mak he!" twna sana Ravguangc hym thuanc the.

¹³ Jisu zeihlat paengc khou tei tat pat dat khou meic kangdai kadaeng khou guang khwan e, kumna kamei rui kaniw khou nchamlou bam khwan e. ¹⁴ Khoutei kamei tat pat khou Alphais nac mpouh Levi dihkhav laamei kai khou dungc bammei ta how lana, "Athei lay o," twna kakhou sa the. Khoutei kamei thauna Jisu thei lay the.

¹⁵ Jisu Levi kai khou ^a nap tu khang dungc bam khou dihkhav kakhamei khatni paapcmei meic mpeyna Jisu khatni kaziap nunc lev dungc kariu bam khwan e. Kalam thu kathei laymei mpeyna khwan e. ¹⁶ Riakdanv tadin, Pharisi nunc rui Jisu paapcmei nunc khatni dihkhav kakhamei nunc lev tu nchamc bammei ta how lana, "Tabui swna kamei dihkhav kakhamei nunc khatni paapcmei nunc lev tu nchamc bam tu cho?" twna kaziap nunc khou sa the.

¹⁷ Mi tei chu lana Jisu rui kaniw khou sa the, "Kapumc gaymei nunc khang maipah kage maek e; nnaumei nunc khang de. Ai guangmei thu ravchaptatmei nunc ta kaw khang hamh e; paapcmei nunc ta kaw khang de."

¹⁸ Kaganv akhat khou John tuang ziap nunc khatni Pharisi nunc munthiangc bam khwan e. Khoutei meic gaanv saekc guangna Jisu khou sa the, "John ziap nunc khatni Pharisi nunc ziap nunc thu munthiangc bam ki tabui swna nang ziap nunc thu munthiangh makna bam tu cho?"

¹⁹ Khoutei Jisu rui kaniw khou sa the, "Nowpouc bam khou nowpouc pam nunc tei munthiangc bam ngam di nah cho? Nowpouc tei bam saanv thu kaniw munthiangc ngam ni tu hamh e. ²⁰ Nowpouc ta tei kaniw khou rui laa tat kanmei ganv guang puni, mi nungc kiu kaniw munthiangc puni.

²¹ "Meic gaanv khat na sini sou makmei phey thanh, phey raan khou khuamlou mak e. Kalam thu phey thanh tei rui zay pwkhou kaek kasic ranv puni. ²² Meic gaanv khat na sini gihmuanc raan khou luairyn zouc thanh lou mak e. Kalam thu luairyn zouc tei rui mi muanc tei phungc bak puni. Kumna luairyn zouc tei ni muanh tei ni maan puni. Luairyn zouc thanh thu muanh kathanc khou lou tuang de."

²³ Sabbath akhat khou Jisu laupuk khou tat ruan pat khwan e. Kumna kaniw tat bam khou kaziap nunc nap guy chunc thau the. ²⁴ Khoutei Pharisi nunc rui, "Zauc lo, Riakdanv thei layna Sabbath neic taanc nuh makmei tabui swna kaniw taanc bam tu cho?" twna Jisu khou sa the.

²⁵ Khoutei Jisu rui kaniw khou sa the, "David khatni kamei nunc tei tu khang maekna ndaepcna bampui ganv khou David rui tabui sw kan tu cho twmei nangniw pac zat mak he nah cho? ²⁶ Abiathar Tingkuh sw bampui ganv khou David Ravguangc kai khou gutna amuh nunc na hamhna meic baihmei tu nuh makmei Ravguangc khang katloumei tyan kamei tu khwan e, kumna kathei laymei nunc khang ni tii khwan e."

²⁷ Kumna Jisu rui kaniw khou sa the, "Sabbath neic hei maansei khang swlou tuang de, maansei hei Sabbath khang damclou tu hamh e. ²⁸ Mi zaeng rui, Meic Nac Mpouh hei Sabbath kaipouc ni e."