¹ Ravmaengc khang khaengloumei zanc twmei lam khou tei thu: Kaniw rui samei kumcna, "Aniu meic guayna khou thaymei nai e," twmei aniu thay e. Mi kumhmei ramthai tei rui lianti e, tiki nzianmei rui thu tidaic thau e. ² Thowkumhmei kamei thay the twna ningpui mei tei kamei thay nimei tei thay lamc makna e. ³ Ravguangc ta nzianpui mei ta tei Ravguangc thay e.

⁴ Kumna ravmaengc khang katloumei zanc twmei lam khou thu: ravmaengc hei thu nai changhmei rav hamh e; Ravguangc thu akhat na de; baihmei maek e twmei aniu thay e. ⁵ Rav the twmei tingkauh khou ni, kandih khou ni nai bam geic nuh e. "Rav" khatni "kaipouc" mpeyna nai bam changh e; ⁶ tiki aniu khang thu Pu Ravguangc akhat na de; mi kiu ramh katana damcloumeipu, kumna aniu kakhang ringc bammeipu hei e. Kaipouc ni akhat na de; mi kiu kapaan rui ramh guayna damcloumeipu khatni kapaan rui aniu ringc bammeipu Jisu Khrista hei e.

⁷ Tiki mi hei meic katana thay mak e. Meic gaanv saekc thu ravmaengc khou gut minc langvlou lana, ntaw nganv kaniw mi kumhmei zanc tei tu pwkhou, mi tei ravmaengc tuang zanc the twna ning e. Mi kumna kaniw ramthai suanpui zaeng rui, mi zanc tei rui kaniw ta sw-mphuam the twna ning e. ⁸ Taektw rui thu aniu ta Ravguangc daeng khou tituanc tiduh khang hamh e; mi tei tu tii makna aniu khang maan thuai mak e, tu tina ni gaeng thuai tuang maek e.

⁹ Nangniw mi kumcna nyngsw nuhmei hei rui suanmei nunc ta tiphaysuy mak khang thu ramhthay o. ¹⁰ "Thaymei" nang rui mi kumna ravmaengc tuang ravkai khou tu bammei ta thaymei khou suanmei gaanv khat rui howlou e thei, mi tei rui kata ravmaengc khou katloumei zanc tu khang tibauclou pw lak nah cho? ¹¹ Mi kumna, Khrista kakhang rui theicloumei, suanmei nang chana ta tei nang ramthai tei rui swmaan puni. ¹² Mi kumna kaniw tuang suanmei lungning ta tei tikabiulouna, nangniw chana nunc ruc khou paapc taancloumei hei rui Khrista ruc khou paapc taanclou the. ¹³ Mi kumna taektw rui achana khat ta tiphaysuy e thei, achana khat ta tii phaysuy mak khang ai zanh tu dat lak khe.