6
Khat Khat Puat Phungc Nkhav o
1 Chana thiu, thowkumhmei nkhuaimei khou keylou bammei ta ariw e thei, bumaengh khou bammei nangniw rui lungh zaenghna kata zay ntwnlou dat o. Nangniw ta ni nthiam pw ramc e twna ramhthay o. 2 Nangniw khat khat puat phungc nkhav karyna Khrista tuang latdanv tei piu nina e.a 3 Thowkumhmei kamei ramh khat sini hamh lana, kamei ramh khat di the twna ning e thei, karana kata guat bam tuang e. 4 Meic katana karana katuang taanv ta tei zauc nina e. Gay e thei, kamei rui taanclou kanmei khang tei gaengh sw nuh e; mi tei meickai taanv ta lev kida khang hamh e. 5 Meic katana karav karana katuang puat phungc nina e.
6 Nangniw khang nchamlou bammei nunc khang tei nangniw tuang nai naimei piu nzanh o. 7 Nangniw rana nangniw ta guat rio. Ravguangc ta kiauc lac nuh mak e. Kamei kamei rui nrouloumei tei tay dat puni. 8 Meic pumc rui kahawmei thei layna taanhpui mei tei theic puni; Bumaengh rui kahawpui thei layna taanhpui mei tei ringcsuangmei laa puni. 9 Mi zaeng rui, gaymei taanh khang liat lak ri kho; aniu tut makna bam e thei, kathai laa nimei ganv guang puni. 10 Mi zaeng rui, aniu khang kadouchamei ariwpui kathuic, aniu meic katana khou, nkunna lwmmei khou kaikhunhmei nchamc pang khou gaytaanv taanclou kho.
Kady Kanavmei Lat
11 Abaanc kahak rui kahiak daicna hymei hei nangniw how the. 12 Nangniw ta gihruamc khang sa bammei nunc tei mpaeng mikzaw khou na howgay khang sw lyan bammei nunc e. Mi tei kaniw ta Khrista tuang theihchouc zaeng rui rai mak khang twna sw bam tuang e. 13 Mi gihruamhmei nunc tei ni Riakdanv piumei nunc hamh e; nangniw ta gihruamc tu laa niimei kiu, nangniw gihruamc the twmei khou na tei kaniw gaengh sw nii lana e.
14 Tiki akhang thu, ai gaengh sw nimei kiu aniu Poubauhmei Jisu Khrista tuang theihchouc lam khou na de. Kalam thu mi theihchouc paan rui atuang mbaanv tuang swmei theic the; ai mi mbaanv khou theic the. 15 Gihruamhmei, gihruamc makmei rui ramh khat sini hamh e; tiki nthukmei thu meic kathanc swmei hei de. 16 Mi riak thei layna tatmei mei nunc, Ravguangc tuang Israelmei nunc khou chuzaenghmei khatni zauzian naimei sw diu!
17 Nkhamh khou ai rui sa nimei thu: meic gaanv khat na rui sini ata swkatuakclou dat mak kan di tho. Apumc khou nai bammei achinc guay hei rui ai hei Khrista bangc e twmei lyanmei tuang the.
18 Chana thiu, nangniw khou aniu Poubauhmei Jisu Khrista zauzian nai diu tho! Amen.