11
Lwmmei
1 Aniu rui lwmgay bammei tei suai mak khe twna laamei, aniu mik rui how makmei puat ta nai e twna laamei hei lwmmei kiu the. 2 Reynungc mei guay tei kaniw ramlum khou rui Ravguangc rui kaniw ta kwmlou kan tuang e.
3 Mi mbaanv hei Ravguangc lat rui damclou tuang e; aniu how bammei hei how makmei khou rui damclou tuang e twmei lwmmei paan rui aniu thay e.
4 Lwmmei paan rui Abel tei Kain tuang khang suangc gaymei puatkat Ravguangc khang kat khwan e. Kumna Ravguangc rui kata ravchaptatmei e twna laaloumei hei karam lwm paan rui kamei laatow tuang e. Kalam thu Ravguangc rui katuang puatkat tei laalou the. Kamei theic kan sini katuang lwmmei taanv tei rui kamei aniu khou sa bam e.
5 Lwmmei paan rui Enok ta tei laa thau kan the. Kamei theic kan mak khe. Kata ariw dat mak khe; kalam thu Ravguangc rui laa thau kan the. Kata laa thau makmei hu khou kamei rui Ravguangc ta tipianlou the twna nthanmei latrik rui sa e. 6 Lwmmei maekna thu Ravguangc ta tipian ngam mak e. Ravguangc daeng khou guang nimei guay, Ravguangc nai e khatni kakhou guangmei guay khang tiilou e twmei lwm nina e.
7 Guang punimei kamut kamaimei khou rui chamdaanv khang Ravguangc rui sapui ganv khou, Noa tei kamik rui how mak sini, lwmmei paan rui hihdai kasiamhna kakai kaikhunc ta gulou kan e. Mi kumna mbaanv ruc khou nkhuaimei latzan keylou kan the. Kumna lwmmei paan rui tiiloumei ravchaptatmei tei kakhang laa kan the.
8 Kakhang tii nimei kandic thangc tei tat khang Ravguangc rui kaw pwkhou, lwmmei paan rui Abraham mi tei piuna tabui thangc tat nina cho twmei thay makna kamei tat pat khwan e. 9 Kakhang tii puni twna nrianhloumei kandic khou tei lwmmei paan rui kamei gin swna, mi kandic tei laa nimei Isaak khatni Jakob lev pheykai khou lungc bam khwan e. 10 Abraham tei Ravguangc rui kamaengc rangcna kasiamhloumei kaidai, kachac dat lakmei kaidai ta nkhwan bam khwan e.
11 Abraham tei lwmmei paan rui pu akhat sw khwan e. Sara tei katingkwm kagat ri khou lwmmei paan rui kapumc nrit khwan e. Ravguangc thu kalatryan suai ni tu hamh e twmei kamei lwm khwan e. 12 Kumna kapumc theic tangmei kumhmei Abraham khou rui kakikta gaanchuangcna zu khatni kasing thay makmei duipui syniang zu cha pat khwan e.
13 Kaniw hei Ravguangc rui nrianhloumei tei laatow kan mak e. Tiki duh thangc rui kaniw mi tei phaengc howna riulouna, kaniw mi kandic khou thu gin swna bam tuang de twna salouna lwmna theic kan the. 14 Mi kumna saloumei nunc hei rui kaniw lungc nimei kandic ta nzwan tat bam e twmei nthanna lyan e. 15 Kaniw tat patmei kandic ta tei kaniw tuang e twna ning bam khwan e thei, hanc dat khang kadouchamei ariw kan ni tuang de. 16 Tiki kaniw gay ranvmei kandic, tingkauh kandic ta kahaw the. Mi zaeng rui Ravguangc rui kata kaniw Racguangc e twna kaw khang zak mak khe. Kumna kaniw khang kaidai akhat chamdaanvlou the.
17 Abraham tei Ravguangc rui kata nchanv pwkhou, kakhou swloumei latryan tei nai sini, lwmmei paan rui kanac mpouh akhat namei Isaak ta khaeng the. 18 "Isaak khou rui nang kikta cha pat puni," twna nrianhlou khwan sini, kamei Isaak ta khaeng khang nuh the. 19 Ravguangc thu theihmei ta tiringcthaulou dat ngam de twmei Abraham lwm khwan e, kumna Isaak ta theihmei khou rui laatow dat changh kan the.
20 Lwmmei paan rui, Isaak rui Jakob khatni Esau khou thei thangc guang nimei khang suaihiamlou khwan e.
21 Jakob kamei theic zaic ni khou, lwmmei paan rui Joseph nac mpouh nei khou suaihiamlou khwan e, kumna katuang builwang nsunna Ravguangc ta kalum khwan e.
22 Joseph kamei theic zaic ni khou, lwmmei paan rui Israelmei nunc Ijipt khou rui tat pat nimei lam khou sana, kaniw karou phungc tat khang kadylou khwan e.
23 Mousi ta puanclou pwkhou, lwmmei paan rui kapui kapu rui guangh tuang latdanv ta ping makna, kalwn kachav gaymei angana ta tei bw thumh nkamhlou khwan e.
24 Mousi kamei daicthau pwkhou, lwmmei paan rui kamei Pharau nac aluhpui nac mpouh sw nii mak khe. 25 Matak khat na paapc khou amanvmei suangc, Ravguangc mei nunc lev ryanra nchamcmei tei kamei kahaw khwan e. 26 Khrista khang zakmei khaengvloumei hei Ijipt tuang lanv guay suangc nthukmei e twmei kamei laa e. Kalam thu thei thangc naimei swan ta kamei zauc khwan e.
27 Mousi lwmmei paan rui guangh lungpuam ta ping makna, Ijipt mpatlouna tat pat the. How makmei Racguangc ta how kumcna kamei hanc dat mak khe. 28 Lwmmei paan rui Kaanpatpui Ngai tei lingc thau the, kumna mpouh nareimei ta sw luaimei baanchara tei rui Israelmei ta kahi mak khang zei kazinhlou khang latdanv pat the.
29 Lwmmei paan rui Israelmei Ntou Duipui khou ramkiang khou kumc kaan pat khwan e. Kaniw thei lay nzwan gutmei Ijiptmei nunc thu dui rui liak binna theic ngam khwan e.
30 Jeriko kaidai raengc tei Israelmei rui zaeng chanei tat haengvlou pwkhou pangv kanmei tei lwmmei paan rui e. 31 Ravguangc lat liammei guay ta swluaimei khou, mangcsangmeiluc Rahab duak kanmei tei lwmmei paan rui e. Kalam thu kamei rui Israelmei gwanrummei nunc ta chuzaenghna laalou khwan e.
32 Lwmmei lam khou sa bam kho twna cho? Gideon, Barak, Semsan, Jephtha, David, Samuel, khatni muhzwng nunc mpeyna nai e. Tiki kaniw lam khou sa bam khang kaganv maek khe. 33 Lwmmei paan rui kaniw rihngamna guanghdic laa khwan e, nchumhna dihsin khwan e, Ravguangc rui nrianhloumei laatow khwan e. Kaniw kamangliangpui mwang kakaplou khwan e, 34 maipui maidai sw mit khwan e, baengsaeng mun khou rui duak khwan e. Suan bam khwanmei khou rui tanc thau lana baengtanc rihlianghmei sw khwan e, kumna tasangmei ricmei nunc ta alay ganclou khwan e. 35 Ntumei nunc kaniw lwmmei paan rui kaniw kai kaikhuncmei ta tiringclou dat kanmei nai e.
Gaanv saekc rui gay ranvmei panty khou ringcthau dat khang, nyngswmei suangc rairiu khaengvna theic kan the. 36 Gaanv saekc rui sinnuimei, bairaimei, kangriang rui bangcloumei, khatni kangkai khou bangcloumei khaengv kan the. 37 Kaniw ta ntauh kwamluai kan the, kapaek saat kan the, kaniw ta baengsaeng rui swluai kan the. Kaniw ta rai kasiclou tina, lungcsina, lauziu gic khatni ziuh gic runna ruan tat bam khwan e. 38 Mi mbaanv hei kaniw khang biuh mak e! Kaniw kai lau maekna tazikramv khou khatni chyng ramv khou ruanna khowlang khatni khunh kai khou lungc tat bam khwan e.