Daudi hai Sion napilei Pue
132
1 Idemi nani polumaonda tauna lao i Yerusale.
 
O Pue, katuinao Daudi
hai hinangka pantodihana.
2 Ia mosumpami i Pue Au Makuasa,
modandimi i Pue Ala au napenombai Yako, nauli,
3 “Tou mpuu barana ina mesua i soungku;
barana ina mengkadampa i paturuangku,
4 barana ina tekaleli
ba mopalikangaa matangku tekapidi,
5 hangko damanina molambi poaroa souna Pue,
au masuka napaidai Pue Au Makuasa
au napenombai Yako.”
6 I Efrataa mohadike bambari kana i Peti Podandi,
hai tahumba mpuumi i pada Yaar.b
7 “Maikau laoke i paidaana Pue
hai molingkuduke menomba i lindo kadera kadatuaNa.”
8 O Pue, maimoKo maida i souMu
hihimbela hai Peti Podandi, tanda kamarohoMu.
9 Pogiangaahe tadulako mpenomba Irio mampowaru kanoto
hai ope-ope tauna au Nupokaahi matana-tanahe.
10 Anti podandiMu i Daudi, tuduaMu,
ineehe Nuae datu au Nutawimohe.
11 Pue mosumpami i Daudi,
Ia bara ina molingkai podandiNa, Nauli,
“Hadua pemuleamu ina Kupopewali datu,
mopahuruko mohuda i kadatuamu.
12 Ane anamu mekingkihe i podandiKu
hai i atura-aturaNgku au Kupaturoamohe,
kadatuamu ina rapohudai liliu ananda i hae-haena.”
13 Pue mopileimi Sion,*
lawi Napeinao napaidai,
14 Nauli, “Idemi souNgku, i hae-haena;
ina maidaNa inde lawi Kupeinao Kupaidai.
15 Hinangka au raparaluu ina Kukiraiahe melabi-labi,
ope-ope tauna au meahi-ahi
ina Kuweihe paandenda au handaka.
16 Ope-ope tadulako mpenomba i Sion
mopatongawahe pehorema au hangko Iriko,
hai taunanahe au madudu ina monanihe matana-tana.
17 Inditimi pemuleana Daudi ina Kupopewali datu
nodo hulo au mewangka liliu,
tauna au Kutawi ina moparenta hawe i hae-haena.
18 Ope-ope iwalina ina Kupakaeahe,
agaiana i waana ina mengkila songko kadatua.”