Uki i rindi
5
1 I tempona Datu Belsyasar moparenta, nakakiomohe hasabu taunana au mapangka lantinda maihe mosabiki susa mahile hai meawa au nababehi. I posusa ide, maenu-enu sambelahe anggoro. 2 Anti kamalangunami Datu Belsyasar maenu anggoro, napohawaamohe tauna moanti mai paenua hangko i bulawa hai salaka. Paenua iti au narampaki mai Nebukadnesar, umanaa, hangko i souna Pue Ala au malelaha i Yerusale. Tunggaiana datu bona taunana au mapangka lantinda, hai towawinenahe hai towawine au natendahe maenu hangko i paenua iti. 3 Hangko indo, raantimi ope-ope paenua iti iria, hai rapaenuimi. 4 Maenuhe anggoro hai motoiahe anitu au rababehi hangko i bulawa hai salaka, tambaga, besi, kau hai watu.5 I tempo iti peawomi, unga pea raita taie tauna mouki i rindi sou kadatua au nasimbaki hulo. Ido hai datu moita maroa taie au mouki iti. 6 Liliu datu, matemimi lindona, hai anti kawulina pekirina, langami, malede hai morada kuntuna. 7 Hangko indo, mekakiomi datu maoni-oni bona ope-ope tomapande, topedodi, au raisa mampeita betue raantihe lao iria. Kateruhunda, mololitami datu i ope-ope tomapande i Babeli, nauli, “Hema-hema au nabuku mobasa uki ide, hai au naisa mouliangaana lempona, ina kuwei waru kadatua hangko i bana au malentoro hai eno bulawa, hai ina kulanti mewali tauna au katalu hangko iriko, moparenta i lalu kadatuangku.” 8 Hawemohe ope-ope taunana datu au mapande, agaiana bara rabuku mobasa hai mouliangaa datu lempona uki iti. 9 Hangko indo, rumihi ntepuumi kamasusana laluna Datu Belsyasar, hai tetambaimi kamatemina lindona; nodo wori taunana au mapangka lantinda tingkarahe.
10 Anti pogewo-gewonda datu hai taunana au mapangka lantinda, mesuami inana datu i hologa posusaa hai mololita, nauli, “Datu, mononomi tuwona ampuku datu! Inee ampuku napakasusa pekirina ampuku. Inee ido mopamatemi lindona ampuku, 11 lawi i lalu kadatuana ampuku, ara hadua tauna au nanini inao au makuasa hai au malelaha! I tempo poparentana umana ampuku, tauna iti ara kapande hai kanoto pekiri nodo kapande au makuasa i suruga. Tauna iti nalantimi Datu Nebukadnesar, umana ampuku, mewali tadulakonda ope-ope tomapande, topedodi, topangisa, hai tauna au raisa mampeita betue. 12 Tauna iti melumbu kamapandena hai kamatopana, ido hai nabuku molempo pangipi hai mopatongawa hinangka au tewuniangi, hai naisa mopakanoto apa au mapari. Hangana Danieli, napahuru datu Nebukadnesar mewali Beltsasar. Maroa ane ide-ide Danieli iti nikakio mai bona ia ina mopahawe i ampuku apa lempona uki iti!”
Danieli mopatongawa lempona uki i rindi souna datu
13 Raantimi hoholiga Danieli i datu. Mekunemi datu i Danieli, nauli, “Oiomi pae Danieli, hadua au natawaniko mai datu Nebukadnesar, totuangku, hangko i tampo Yehuda? 14 Kuhadimi lolitakana, oio naniniko inao au makuasa i suruga hai au malelaha, hai irio ara kapande hai kanoto pekiri au melumbu. 15 Ope-ope tomapande hai topangisa kukakio hahamohe bona mobasahe uki ide, hai rauliangaana lempona lolita au teuki iti, agaiana bara ara au rabuku mopahawe lempona. 16 Agaiana kana irio, kuhadimi oio nubuku mopatongawa hinangka au tewuniangi hai nuisa mampekiri au mapari. Idomi hai ane nubuku mobasa uki iti hai nuuliangaana lempona, ina kuweiko badu kadatua hangko i bana malentoro hai eno bulawa, hai ina kulantiko mewali tauna au katalu hangko iriko, moparenta i lalu kadatuangku.”
17 Hangko indo, Danieli mohanai datu, nauli, “Au ina nuweina iti, nawolimi hampai ampuku. Nuwei peamohe tauna ntanina, agaiana batena ina kubasaa datu uki iti, hai kuuliangaa ampuku lempona. 18 Ampuku datu, Pue Ala au makuasa, mokiraia Nebukadnesar, totuana ampuku, kamakuasa, kamahile hai kameawa. 19 Anti kamahilena kuasa au nawei Pue Ala iria, idomi hai ope-ope tauna i hinangka ngamba, lembo hai basa, langahe iria. Hai hema pea au natunggai napapate, batena napapate. Ane naunde mohorema tauna, batena nahorema. I lalu poparentana, naangka hai napopendaulu hema pea au natunggai. 20 Agaiana anti kamatuana laluna hai pantindorana, mampemahilemi. Idomi hai rapopendaulu hangko i kadatuana, hai peawana raala hangko iria. 21 Ia rawura hangko i olonda tauna, hai pekirina mewali himbela hai pekiri binata. Ia tuwo hihimbela hai kalide maila, hai maande hehi nodo japi. Watana mawuru, lawi naturu-turu gawu. Ope-ope ide mewali alana napangaku kaPue Alana pea au makuasa i kadatua manusia hai au mowei kadatua iti i hema pea au Napilei. 22 O Belsyasar, hinangka au mewali i totuamu, naisa haha ampuku, lawi ampunako. Nauri nodo, bara woriko mengkaiwoi. 23 Ampuku, mantindorako i Pue Ala au makuasa i suruga. Paenua au rapamuru mai hangko i souna Pue Ala, napopeanti mai ampuku. Paenua iti rapaenuimi ampuku, ope-ope tauna au mapangka lantinda, sambokonahe ampuku, hai towawine au natendahe ampuku. Ampuku mototoiami anitu au rababehi hangko i salaka, bulawa, tambaga, besi, kau hai watu. Anitu iti barahe meita, barahe mehadi, hai barahe moisa apa pea. Agaiana Pue Ala au mokingki inaona ampuku hai au mopakanoto hinangka rara katuwona ampuku, bara nubila.
24 Idomi hai Pue Ala motudu mai taie iti mouki popahaweNa iti.
25 Idemi au teuki iti:
MENE, MENE, TEKEL, UPARSIN
26 hai idemi lempona:
MENE: lempona: ‘raimba’ lawi tempo poparentana ampuku Naimba Pue Ala, hai Napahopomi.
27 TEKEL: lempona: ‘ratimba’ lawi babehiana ampuku ratimba hai popetimba, hai tongawa ara mani kamakurana.
28 UPARSIN ba PERES: lempona: ‘ragaa’ lawi kadatuana ampuku ragaami hai rakirami i to Media hai to Persia.”
29 Roo nodo, naparentaimohe Datu Belsyasar ope-ope topobagona bona mobadui Danieli hai juba malentoro hai raenoia eno bulawa. Rapahawemi i tauna bosa kanaangkanami datu mewali topoparenta au katalu hangko i datu.
30 I kaindi iti peawomi,b Belsyasar datunda to Babeli rapapate.