2 Mololita mbuli malaeka iti, nauli, “Au kupololita ide tou mpuu. Ina ara mbuli talu datu^a au ina moparenta i tampo Persia. Roo ido, ina mesupa wori datu kaiba^b au molambi kuasa hai kapebuku au melumbu hangko i datu au ntanina. Ane mewalimi maroho anti kapebukuna, ia mopari-pari mampoiwali kadatua Yunani.

3 Hai ina ara mbuli hadua datu au keate au ina moparenta i kadatua au mahile ntepuu. Ia ina mobabehi apa pea peundeana. 4 Agaiana kamakuasana iti bara ina mahae. I tempona maroho ntepuumi, kadatuana ina tegaa-gaa mewali iba gaana moula iba pewuia himburu iami ntanda i Raa, ntanda i Lau, ntanda i Mata alo hai ntanda i Katampua alo. Datu au ina mohudahe i ope-ope kadatua iti barahe pemuleana, hai rohonda bara himbela hai rohona, lawi kadatuana ina magero hai mewali kadatua tauna ntanina.^c

5 Datu ntanda i Lau ina mewali maroho, agaiana hadua hangko i olonda tadulako pombealana ina melumbu kamarohona, hai ina moparenta kadatua ntanina ntanda i Raa au ina mewali maroho ntepuu.^d 6 Bahangkia parena hangko indo, ihira ina mopaarahe hambua pohintuwu.^e Tanda pohintuwunda, datu ntanda i Lau mampopotambi anana hai datu ntanda i Raa iti. Agaiana pohintuwu iti bara ina mahae. Ana datu au towawine iti, anana hai ope-ope hawi au meulahe mai iria hangko ntanda i Lau hawe ntanda i Raa ina ratendehe. 7 Hai bara mahae hangko indo, hadua halaluna ana datu towawine au ratende iti ina mewali datu ntanda i Lau.^f Ia ina mampombealaa datu ntanda i Raa,^g mosuaki wanua bentenda hai napombealaahe alanda manangi. 8 Hai ope-ope au rapenombai, watu taunanda, parewa au rababehi hangko i bulawa hai salaka au rapake menomba i anitu, raanti lao i Masiri. Roo ido, bahangkia parena kamahaena ia bara mampombealaa datu ntanda i Raa. 9 Bara mahae, datu ntanda i Raa lao mampombealaa datu ntanda i Lau, agaiana bara nabuku, ido hai mesule hule i tampona.

10 Bahangkia parena hangko indo, ananahe datu ntanda i Raa au tobalilo^h mampasilolongahe ina mombeala hai ina moguluhe surodado au bosa. Hai hadua hangko i olonda ina motadulakoihe surodado iti lao mobungka datu ntanda i Lau. Mebungkahe nodo peumbala owai anti kabosanda. Hai hambela ide batenda hawe i bentenda iwalinda. 11 Pane rumangkami laluna datu ntanda i Lauⁱ iti, ido hai ina laomi mampombealaa datu ntanda i Raa au moanti mai surodado au bosa. Surodado au bosa iti, ranangihe hai ratawanihe surodadona datu ntanda i Lau.^j 12 I kanananginda surodado au bosa iti, datu ntanda i Lau ina mampemahile. Nauri bosahe surodado au napapate, agaiana penangina iti bara ina mantaha.

13 Bahangkia parena hangko indo, datu ntanda i Raa ina mogulu mbuli surodado hai ina melumbu kabosanda hangko i nguru-nguruna. Roo indo,^k ia ina lao mombeala hihimbela hai surodado au bosa hai pampasilolonga parewa pombeala au ngkaia. 14 Tempo iti, bosahe tauna au ina moewa datu ntanda i Lau. Nodo wori hangka to Yahudimu au maseke, ihira ina mampempemahilehe hai moewahe datu iti, lawi rapeinaomi mopabukei hampaka pampetudungia, agaiana tunggaianda bara ina tepabukei. 15 Roo indo, datu ntanda i Raa iti ina hawe moaro petolibua hai ina mobungka wanua au mobente alana nanangihe. Hai surodado ntanda i Lau bara rabuku mantaha, nodo wori surodadonda au tepilei hai au keate ntepuu barapi rabuku meewa. 16 Ido hai datu au mebungka iti ina mobabehi apa pea peundeana hai bara huba hadua au nabuku moewa. Ia ina mampaidai tampo au merae^l hai ina nakuasai ope-ope.

17 Datu ntanda i Raa ina mopari-pari bona mokuasai humalele kadatua ntanda i Lau iti. Ia ina mopaara podandi hai datu ntanda i Lau hai mampopotambi anantowawinena hai datu iti^m, agaiana ope-ope tunggaiana iti bara ina tepabukei. 18 Roo ido, ia ina mampombealaa ngamba-ngamba i wiwi ntahi hai bosahe au nanangi. Agaiana hadua tadulako hangko i ngamba ntaninaⁿ ina mampopengkaroo pepapakoina hai ina mohurungi pepapakoina iti. 19 Roo indo, ia ina mesule hule lao i kadatuana au maroho, agaiana ia ina ranangi duuna barapi ara.

20 Ia ina napahuru hadua datu. Datu au mepahuru iti ina mampohawaa taunana meruru asele bona morarangi kapebuku i kadatuana. Agaiana bara mahae hangko indo, ia ina rapapate ngkabuni, bara wori anti pombeala.”^o

21 Mololita mbuli malaeka iti, nauli, “Datu au ina mehurunga moparenta i tampo ntanda i Raa, ia hadua tauna au kadake babehiana au katouana bara hintoto mewali datu.^p Agaiana ia unga pea ina hawe hai mangala-ngala lalunda tauna bona ia mewali datu. 22 Isabuna surodado au mai mobungka datu iti, ina napapatehe, tepesua Tadulako Mpenomba Mahile. 23 Hai ia ina molingkai ope-ope podandi au hangko roo pea nababehi hai ngamba-ngamba ntanina. Ia ina maroho ntepuu, nauri taunana barahe bosa. 24 Bara raisa-isa, unga pea ia ina mosuaki hinangka paidaa au marudu. Ina mobabehi apa au melumbu hangko i babehianda ulu bubuna. Hinangka anu-anu masuli au narampaki hai naala i pombealaa nakira-kira i taunana. Ia mohaoki rara noumba bona peisa mokuasai ope-ope paidaa au ara bentena, agaiana tempona bara mahae.

25 Kamarohona hai kapebaina ina napopaita moewa datu ntanda i Lau, ia ina moanti surodado au bosa. Nauri datu ntanda i Lau iti masilolongami hai surodado au bosa hai maroho ntepuu bona mombeala, agaiana bara nabuku meewa lawi ia ina rapakanawo taunana haduduana. 26 Mogalori tauna au maande sambela peamohe hai ia, ina mepakanawohe. Surodadona ina ranangihe hai bosahe au rapapate. 27 Roo indo, datu ntanda i Lau hai datu ntanda i Raa ina maande sambelahe, agaiana kadake tunggaianda hai mombedongkokihe. Tunggaianda iti bara ina tepabukei, lawi bara mani hawe tempo au tepakanotomi. 28 Hangko indo, datu ntanda i Raa ina mesule i tampona hai moanti ngkaia anu-anu au naperampai. Ia motunggai ina mopatuna atura agama au rapeulai taunana Pue Ala.^q Nababehimi ope-ope moula peundeana hangko mesuleri i tampona.

29 I tempo au napakanoto Pue, ia ina mosuaki hule tampo ntanda i Lau, agaiana apa au mewali i karombelana ide bara ina himbela hai au nguruna, 30 lawi to Roma^r ina hawehe hai kapala tahinda au ngkaia, moewahe datu au hangko i Raa iti, ido hai barapi ara kapebaina.

Mewali roo ido, datu ntanda i Raa iti mesulemi hai rumihi mpuu karumpuna, ido hai nadandimi ina mopatuna taunana Pue Ala. Ia ina mampeulai paturonda tauna au mokabahamohe pepoinalainda i Pue Ala.

31 Surodadona datu ntanda i Raa ina laohe mopakedai souna Pue Ala au Malelaha. Ina mampopengkaroohe popenomba alo-alona i Pue Ala hai ina mampopeangkahe anitu i lalu souna Pue Ala.^s 32 Datu ntanda i Raa iti, ina mangala-ngalahe lalunda tauna bona mokabahahe agamanda hai meulahe iria. Agaiana tauna au mepoinalaimohe i Pue Ala, ina maroho liliuhe hai moewahe datu iti. 33 Hai ope-ope tauna au manoto lalunda i olonda taunana Pue Ala ina moweihe paturo i tauna bona moisahe lempona apa au mewali iti. Agaiana i bahangkia tempo kamahaena, arahe au ina mate anti pombeala hai ara worihe au mate naande api. Bahangkia mbulihe ina ratawani hai rarampaki anu-anunda. 34 Tangana pepapate iti mewali, taunana Pue Ala ina molambihe haodi petulungi, bosa tauna au lao mampohintuwuahe agaiana barato hangko i lalunda. 35 Hanggaa hangko i tauna au matopa ina rapapatehe, agaiana ope-ope iti ina mewali pampetandaka i taunana Pue Ala bona mewalihe malelaha, hawe i kahopoa dunia, iami i tempo au napakanotomi Pue Ala.”^t

36 “Datu Siria ina mobabehi apa pea peundeana. Ia ina mantintindora hai mampopelumbu-lumbu kamahilena tuwona hangko i ope-ope anitu; ia ina mohowara lolita au bara hintoto i Pue Ala au Makuasa. Ope-ope iti ina nabuku nababehi hawe hopo karumpuna Pue Ala lawi apa au napakanotomi Pue Ala batena ina mewali. 37 Datu iti bara ina mobila ope-ope anitu au rapenombai ulu bubuna, tepesua anitu au rapomahile towawine, ba anitu au ntaninahe; lawi naimba, watana pea haduduana au melumbu hangko i anitu-anitu iti. 38 Agaiana, ia ina mampenombairi anitu au bara rapenombai ulu bubuna, iami anitu au mokampai hinangka bente. Ia ina mampopenomba bulawa, salaka, paramata hai popenomba ntanina au masuli holona. 39 Ia ina mobungka bahangkia wanua au maroho ntepuu bentena, i lalu petulungina anitu au napenombai iti. Hema au menomba i anitu iti, ina rakiraia kamakuasa au mahile, lanti au mapangka hai tampo, napokamba saro.

40 Kahopoana^u, datu ntanda i Lau ina mampombealaa datu ntanda i Raa. Datu ntanda i Raa ina mohurungi pebungka iti hai kareta pombeala, dara, hai kapala au ngkaia. Ia ina mepombealaa nodo peumbala owai, lawi rumihi kabosanda; hai ngkaia tampo au ina nakuasai. 41 Mogalori tampo au merae^v, ina nasuaki hai bosa tauna au ina mate. Agaiana i pebungkana iti, kadatua Edom, Moabi hai tadulako i kadatua Amon ina tekabahahe hangko i taiena. 42 Ia ina mokuasai ngkaia tampo, tepesua tampo Masiri. 43 Ia ina mokuasai anu-anu bulawa, salaka hai mampopengaa anu-anu i tampo Masiri au masuli holona. To Libia hai to Etiopia ina mengkoruhe iria. 44 Agaiana mampopengaa bambari au hangko i Pembetoa alo hai hangko ntanda i Raa au metingkarai, moparumangka laluna ido hai ina padumi lao mepombealaa hai mopapate bosa tauna. 45 Ia ina moaro bambaru i olo tahi hai bulu Sion au merae hai malelaha. Bambaru iti ina napopeawali sou kadatuana agaiana ia ina mate lawi bara huba hadua tauna au motulungi.”