Pampetudungia kaiba: Karanji hai wuangkau
8
1 Idemi au napopaita Pue ALA iriko, Amos. I lalu pampetudungia iti kuita hambua karanji au buke hai wuangkau au mangka. 2 Hai mongkorami Pue iriko, Nauli, “Amos, apa au nuita?”Kuhanai, “Hambua karanji buke wuangkau au mangka.”
Mongkora mbuli Pue iriko, Nauli,
“Himbela hai wuangkau au mangka au temponami rapupu,
nodo worihe to Isaraeli, hawemi temponda ina Kuhuku.
Barapohe ina Kuampungi.
3 I tempo iti, toponani towawine au monanihe i lalu katana-tana i sou kadatua
ina moteriahe mewiwiorai,
lawi iumba-umba pea hingkandulimohe tomate au ratende,
hai au motendehe barahe mowotu-wotu.”
Nodomi ngkorana Pue Ala.
Pue Ala ina mohuku to Isaraeli
Dosanda topebuku
4 Mololita mbuli Amos, nauli,
“Nipehadingi, ikamu au mopakaparikau
tuwonda tauna au meahi-ahi i tampo ide alanda tunahe!
5 Mololitakau i lalumi haduduami, niuli,
‘Impirami ina hopo alo posusa mahile ide,
bona peisake mobalu-balu pare?
Mahae gaga alo posusa mahile ide.
Impira alo penomba ide ina hopo,
bona peisake mampobalu tapu,
au tahoka pea hai bele au kokoi,
hai mopakeke popetimba au mebagiau,
bona malahe taakalangi?
6 Pare au barapi maroa, peisa tapobalu masuli.
Tahaokihe tauna au meahi-ahi au barapi rabuku mobaiari indanda,
nauri indanda iti sukana pea hai holona hapari sandale,
hai taholohe bona tapopewalihe hawi.’
7 Pue au rapomahile to Isaraelia mosumpami, Nauli,
‘Babehianda au kadake iti bara ina naliu inaoNgku!
8 Idomi pane tampo ina moringki,
hai ope-ope tauna ina wulungahe.
Humalele tampo ina moenggo-enggo
nodo pobalumbana owai Nil.’ ”
Dunia ina makaindi
9 “Node ngkorana Pue ALA:
‘Ina hawe tempona, tangana pualo mbongo
alo ina Kupamatanta,
pane dunia ina mewali makaindi i tempo mabaa.b
10 Alo posusami ina Kubaliki mewali alo kapari,
hai hinangka nanimi ina mewali pandawi.
Ope-ope tauna ina mopakehe hampi au hangko i karu
hai ina mokouhe weluanda tanda kamapepena hulenda.
Ikamu ina nodokau to hamboko
au moteriahihe kapatena ananda au ana sadudua.
Kahopoana, alo iti ina mewali kapari hai kawiora au rumihi.’
11 Node ngkorana Pue ALA:
‘Ina hawemi tempona Kupaara kapari i tampo ide.
Tauna ina marimihe
agaiana barahe marimi hai paande.
Tauna ina mangkadouhe
agaiana barahe mangkadou hai owai.
Ihira ina marimihe hai mangkadouhe i ngkoraKu.
12 Tauna ina molumaohe hangko i Raa hawe i Lau,
hai hangko i Mata alo hawe i Katampua alo
mohaokihe ngkoraKu,
agaiana bara ina ralambi.
13 I tempo iti, mogalori tauna au mangura hai maroho manihe,
ina malimpuhe anti kamangkadounda.
14 Tauna au merapi tulungi i Asima anitunda to Samaria,
hai au mololitahe node: “I lalu hangana anitunda to Dan!”
hai “I lalu hangana anitunda to Barseba!”
ina madungkahe hai barapi ina rabuku mearo.’