Yunu
Yunu bara moula hawana Pue Ala
1
1 Hambela tempo Pue mololita i Yunu, anana Amitai,* 2 Nauli, “Laomoko i wanua Niniwe, wanua au mahile iti. Nupopaingahe lawi Kuisami kakadakena babehianda.” 3 Agaiana Yunu padu hangko i lindona Pue, laori i paidaa au karao i boea Yafo. Inditi, Yunu molambi hambua kapala tahi au ina lao i Tarsis. Liliu nabaiari pesarona hai mengkahe i kapala iti bona padu karao hangko i lindona Pue. 4-5 Roo indo, mendaulumi Yunu i paidaa au i woi ntepuu i kapala iti hai maturu indo duuna leta mposo. Tangana Yunu leta mposo, Pue mopaarami angi mata i tanga tahi, alana rumihimi balumba. Ido hai, kapala iti ina mageromi narumpa balumba.Topobago i kapala iti langa ntepuuhe hai mongare-ngarehe merapi tulungi i anitunda hadua-hadua hai motendemohe antianda hanggaa i tahi bona mongaahi kapalanda.
6 Topoanti kapala iti mendaulu lao i woi mampombelambia Yunu, nauli, “Noumbari hai peisako leta mposo? Pearo! Mekakaeko i Pue Ala au nupenombai. Merapi tulungiko Iria, mole ba maahi irikita bona barake marugi.” 7 Pengkahenda Yunu hai topoanti kapala iti lao i wongko, topobago i kapala iti mololitahe hadua hai hadua, rauli, “Tapetandaka modadu bona taisa kahemana au masala i olonta paneke ina marugi.” Hai Yunumi au kana tetudo. 8 Roo nodo, rauliangaami Yunu, “Tou pae anti babehiamu paneke ina marugi? Hangko iumbako mai? Toapako? Moapari hai pane arako inde?” 9 Nahanai Yunu, “Iko to Ibaranina. Menombana i Pue, Pue Ala au ara i suruga au mampopewali tahi hai lore.” 10 Hangko indo, napololitami noumba pane melangka mokaraohi Puea.
Karahadina peami topobago i kapala, langa ntepuuhe pane rauliangaa, “Pebai mpuuko mobabehi nodo!” 11 Tempo ido, himburu napohingka rumihiri, pane topobago i kapala mekunehe iria, rauli, “Ina kipanoumbako bona himburu kebuu ide mengkaroo?” 12 Mehana Yunu, nauli, “Nitendemona i tahi bona himburu kebuu ide mengkaroo, lawi kuisa anti kaikona panekau narumpa himburu kebuu.” 13 Agaiana topobago i kapala mopari-pari manihe mobohe kapalanda bona hawe i lore. Agaiana mbero-mbero pea, lawi himburu au rumihi katetambaiari. 14 Idomi hai mekakaehe i Pue, rauli, “O Pue, kiperapi bona ineengkai Nuhuku anti popapatengki tauna ide au bara ara salana irikami. Lawi ope-ope ide mewali hintoto hai peundeaMu.” 15 Ratende mpuumi Yunu i tahi, pane himburu au rumihi liliu mengkaroo, hai tahi iti mewali lene. 16 Topobago i kapala iti langa ntepuuhe i Pue, pane mohuhuhe popenombanda hai modandihe i lindona Pue.
17 Anti popakanotona Pue, hawemi hambaa bau au mahile moame Yunu, hai ia ara i lalu tai bau iti talu alona talu wengina kamahaena.*