Yunu moulami hawana Pue
3
1 Mololita mbulimi Pue i Yunu, 2 Nauli, “Laomoko i wanua Niniwe, wanua au mahile iti, hai nupahaweahe apa au Kuuliangaamoko.” 3 Hambela ide Yunu mampeulaimi hawana Pue pane laomi i Niniwe, hambua wanua au mahile ntepuu. Ane talumaohi wanua iti, talu alona kamahaena. 4 Yunu mesua i lalu wanua iti, hangaloami molumao, napepongkami mololita, nauli, “Iba pearai pulona alona, Niniwe ide ina magero!”5 To Niniwe iti mampoinalaihe lolitana Pue Ala. Idomi pane ope-ope tauna hampepekiri bona mopuasahe, maroa tosae, maroa anangkoi, mopakehe hampi hangko i karu bona mopatongawahe pampenosoinda dosanda. 6 Kanahadina datu Niniwe bambari iti, ia mendaulu hangko i kadera kadatuana hai mowosui waru kadatuana, mopake wori waru ngkasusa hai mohuda i awu. 7 Datu mopaara hawa au rapahawe i humalele Niniwe moula pobotusina datu hai ope-ope tauna au mapangka lantinda. Hawa iti node, “Ope-ope tauna, japi, dimba hai binata au ntanina bara peisa maande hai maenu. 8 Ope-ope tauna hangangaa mampohampihe waru ngkasusa, tanda penosonda. Nodo wori ope-ope binatanda hangangaa rahampiihe waru ngkasusa. Ope-ope tauna hangangaa mekakaehe i Pue Ala hangko i lalunda mpuu. Ihira wori hangangaa mobalikihe babehianda au kadake hai babehia au buke dosa, 9 babila tebalikito tunggaiana Pue Ala hai barapi ina masodo alana wanua ide bara ina Naropui.” 10 Naitami Pue Ala tou-tou mpuu pampenosoinda babehianda au kadake, ido hai Nabalikimi tunggaiaNa hai barapohe Nahuku.