Galatia iami hambua propinsi i kadatua Roma. Ope-ope tauna au ara i propinsi Galatia, barahe to Yahudi. Nguru-nguruna menombahe i anitu. Agaiana i kahawena Paulu mopahawe Ngkora Marasa, hangko ararihe au mepoinalai i Pue Yesu.

Kapaduna Paulu hangko i tampo Galatia, hawe worimohe tauna au mepaguru kana i paturo au sala. Guru au mepakanawo iti mopahawe kadana handa ane mepoinalai peahe i Pue Yesu, agaiana hangangaa ratile worihe hai mampeulaihe atura agama au nauki Musa bona mewalihe manoto i peitana Pue Ala. Hai rauli wori, Paulu bara surona Pue Yesu, lawi ia bara tepesua surona Pue Yesu au nguru-nguruna i Yerusale.

I lalu sura ide taita noumba Paulu moewa paturo au mepawuli iti. Nguru-nguruna Paulu mouli notona, noumba kamewalina surona Pue Yesu (kirana 1-2). Roo iti, napakanoto ntepuu paturo i Ngkora Marasa au manguli: ikita mewali manoto i peitana Pue Ala anti kanapahurunta Pue Yesu hai anti pepoinalainta Iria, bara hangko i poulanta atura ba ada (kirana 3-4). Kahopoana, Paulu mopaguruahe to Galatia babehia au hintoto i to Sarani (kirana 5-6).