4
1 Mewali, halalu: ane pandirina ara hadua anantuana au kokoi mani, ia nodo hadua hawi, nauri ope-ope anu-anuna umana, ia ampuna. 2 Ia nodo hadua hawi lawi tauna ntaninari au mokadipura hai mourusi anu-anuna duuna hawe tempo au napakanotomi umana. 3 Nodo wori ikita halalu: hangko damanike moisa Pue Ala, nodoke anangkoi iti, lawi mengkoruke i ada hai hinangka kuasa dunia ide. 4 Agaiana i tempo au Napakanotomi Pue Ala, Ia motudumi AnaNa mai i dunia, au napoanaka hadua anantowawine, hai Ia tuwo nodo to Yahudi au mengkoru i Aturana Musa. 5 Pue Ala motudu AnaNa mai i dunia bona mokabahake hangko i Aturana Musa hai peisake mewali anaNa.6 Mewali, anti kanapoananta Pue Ala, Ia motudumi Inaona AnaNa maida i lalunta. Anti pobagona Inao Malelaha iti i lalunta, ido hai peisake mokakio Pue Ala, “Uma!” 7 Mewali, ide-ide barapoke hawi, agaiana Napoanamoke Pue Ala, hai ane Napoanamoke Pue Ala batenta molambi pewati au Napasilolongaamoke.
Ada hai atura-atura bara mopamanoto tauna i peitana Pue Ala
8 Hangkoia hangko damanikau moisa Pue Ala, mengkorukau i anitu, au bara makuasa. 9-10 Agaiana ide-ide moisamokau Pue Ala. Moleri Pue Alami au ioru moisakau! Mewali, moapari hai moula hulekau ada hai hinangka kuasa dunia ide? Nipeulai ope-ope ada agama to Yahudi, mokadipurakau alo, wula hai parea au rapakanoto i lalu Aturana Musa. Ada hai atura iti bara mopaara pewati, hai barakau ina tekabaha hangko i dosami anti peulami i atura iti. Mewali, moapari hai nipeulai hule ada iti? 11 Au kupokalanga, bara ina mobundu kamawowengku mopahawe Ngkora Marasa irikamu.
Paulu merapi bona to Galatia mampeulai babehiana
12 Halalungku to Galatia! Kuperapi bona nipeulai mpuu babehiangku. Lawi naurina to Yahudi, kukabahami peulangku i adanda to Yahudi bona mewalina nodo ikamu au barakau to Yahudi. Bara manina hambela modoko au bara maroa hangko irikamu. 13 Manoto nikatuinao mani kahawengku i boeami nguru-nguruna hai popahawengku Ngkora Marasa irikamu lawi tempo iti mahaina. 14 Agaiana kehapiri meringkui hakingku iti, bara mpuuna nikaraohi ba nipokarika. Nidoko maroana, nodokau modoko hadua malaeka ba nodokau modoko Kerisitu Yesu. 15 I tempo iti, matana mpuu lalumi. Agaiana ide-ide, iumbami kamatanami iti? Hangkoia, kuisa mpuu, halalu, ane ara ba apa pea au kuparaluu, barana nipokabohia. Mogalori matami haduduami, ane kepeisa nidungkiki hai niweina, bara ina nipokabohi. 16 Ba niimbarina pae iwalimi, lawi kupahaweakau apa au tou?
17 Arahe tauna au mampeinao mangala lalumi. Agaiana tunggaianda bara maroa, lawi rapeinao mogaakikau hangko iriko bona meulakau irihira. 18 Barakau kusalai ane arahe au modiikau mewali ranganda, asala maroa tunggaianda. Hai tunggaianda hangangaa maroa liliu, bara pea i tempoku ara i olomi. 19 Halalu, kuimba mpuumokau anangku. Hai ide-ide mapari lalungku mampepekirikau. Kamaparina lalungku ide nodo kamaparina hadua towawine au ina moana. Hai ina mapari liliu lalungku duuna poantimi himbela hai poantina Kerisitu. 20 Ide-ide kupeinao mpuu bona hihimbelana hai ikamu bona lolitangku au makasara i sura ide anti kawuntunami pekiringku, peisa kubaliki.
Paulu mampopandiri tuntukana Hagari hai Sara
21 Halalungku, ikamu au mampeinao moula Aturana Musa, nipehadingi lolitangku! Ina kupakanotoakau apa au teuki i lalu Sura Aturana Musa. 22 Inditi teuki: Burahima rodua anana. Anana au hadua napoanaka Hagari, au hawi katuwona. Hai anana au hadua napoanaka towawinena au rahanga Sara, au bara hawi. 23 Anangkoi au napoanaka towawine au hawi tuwona, rapoanaka moula peundeana manusia. Agaiana anangkoi au napoanaka towawine au bara hawi, rapoanaka mopabukei dandina Pue Ala i Burahima. 24 Tuntukana iti peisa mewali ngkora pandiri irikita. Towawine au rodua iti lempona rompaka dandi au nawei Pue Ala i manusia: dandi au hampaka mokanai Aturana Musa; hai dandi au hampakana iami dandi au nawei Pue Ala i Burahima. Ope-ope tauna au mampeulai Aturana Musa, katuwonda nodohe katuwo hawi, lawi mengkoruhe i Aturana Musa. 25 Mewali, Hagari au hawi tuwona rapandiri nodo Atura au nadoko Musa i wongko Bulu Sinai i tampo Arabia. Hai Hagari iti peisa wori rapandiri nodo wanua Yerusale au ara i dunia ide. Lawi ampu wanua Yerusale tuwohe nodo hawi, lawi mengkoruhe i Aturana Musa. 26 Agaiana Sara iami towawinena Burahima au bara hawi. Ia nodo wanua Yerusale au i suruga. Sara itimi au tapoina, lawi tekabahamoke hangko i Aturana Musa; barapoke napohawi Atura iti. 27 Iti mewali moula apa au teuki i lalu Sura Malelaha au manguli:
“Matanako, oio towawine au lalo,
au barako hambela moana!
Matanako hai mengeleko,
au bara hambela mantodiha moana!
Lawi nauri napalehiko tobalilomu,
ina meliu kabosanda pemuleamu
pane towawine au tuwo hihimbela hai tobalilona.”*
28 Halalu-halalu! Ikamu ananamokau Pue Ala au rapoanaka hintoto hai dandina Pue Ala; ikamu himbelakau hai Isaki. 29 I tempo iti, anana Burahima au rapoanaka moula peundeana mampopeahi-ahi adina au rapoanaka moula kuasana Inao Malelaha. Nodo wori au mewali i tempo ide: ikita au mampeulai peundeana Inao Malelaha rapopeahi-ahike tauna au mampeinaohe mopari-parike mampeulai Aturana Musa. 30 Agaiana apa au teuki i lalu Sura Malelaha? Ara au teuki node, “Wuramide hawinta au towawine iti hihimbela hai anana! Lawi anangkoi hawi iti bara peisa modoko sosora hangko i umana. Sosora iti hangangaa rawei pea i anangkoi au napoanaka towawine au bara hawi.”* 31 Mewali, ikita ide halalu, barake nodo anana Hagari, au hawi katuwona. Ikita ide, nodoke anana Sara au bara hawi.