Kamagerona Babeli
18
1 Karoona malaeka iti mololita nodo, kuita mbulimi malaeka au haduana mendaulu hangko i suruga. Kuasana mahile, hai anti pewangkana, humalele dunia mabaa. 2 Ia monganga masisimbuku, nauli,“Magero! Mageromi Babeli, wanua au mahile!
Mepongka ide-ide, wanua ide rapaidaimi seta,
tokadake, hai hinangka tadasi au rapalia hai rakahihi.
3 Mageromi wanua Babeli,
lawi to Babeli mowawaha tauna i humalele dunia
bona maenu paenu au melangui.
Lempona: mowawahahe tauna mampeulai babehianda au kadake.
Ope-ope datu i dunia mampeulaihe babehianda au merikai iti.
Hai topobalu-balu i dunia mewalihe tauna au pebuku
hangko i mampopengaa peundeanda to Babeli.”
4 Roo indo, kuhadi mbulimi hambua wotu hangko i suruga au manguli,
“Padumokau taunaNgku!
Melohomokau hangko i wanua ide.
Ineekau mampeulai dosanda ampu boea ide,
datikau nalelehi pepopeahi-ahi au morumpahe.
5 Lawi dosanda mombetitiwongkomi hawe i langi.
Hai ina nahurungimi Pue Ala ope-ope dosanda.
6 Wanua ide, rumihi kakadakena i tauna ntanina.
Mewali, hangangaa rahurungi babehianda nodo au rababehi i tauna ntanina
hangangaa rahurungi rombela hangko i ope-ope babehianda au kadake.
Hangangaa rapaara i wanua ide pepopeahi-ahi au rombela karumihina hangko i pepopeahi-ahi
au rababehi i tauna ntanina.
7 Hangangaa rapopeahi-ahihe hai rapamaparihe,
lawi mampemahilehe, rauli:
‘Iko datu towawine.
Barana tobemba.
Barana ina molambi kapari.’
8 Anti kamampemahilenda iti,
i lalu hangaloa pea wanua Babeli
ina opehe narumpa,
kapate, pandawi hai rimi.
Hai wanua ide ina tehuwe,
lawi au mohuku wanua ide,
iami Pue Ala au makuasa.”
Kamagerona Babeli rateriahi tauna i dunia
9 Datu i dunia mampeulaihe babehianda to Babeli au merikai, hai nodohe to Babeli, ihira mampeulai peahe peundeana lalunda au kadake. Mewali, ane datu iti moitahe rambu au mengkaore hangko i wanua Babeli au rahuwe, ina rateriahi kamagerona. 10 Ina ratotoki ngkarao pearai lawi langahe nalelehi pepopeahi-ahi au morumpa wanua iti. Hai mololitahe, rauli, “Hurewu-hurewumi wanua Babeli au mahile hai maroho! Hampalai pea, tunami anti pehukuna Pue Ala.”
11 Topobalu-balu i dunia, masusa lalunda hai moteriahihe kamagerona Babeli, lawi barapi ara au ina moholo balu-balunda 12 au ngkaia pakana iti, nodo: bulawa, salaka, paramata, hai mutiara. Nodo wori hampi maluha au rababehi hangko i bana au masuli hai bana au malei hai malentoro. Ara anu-anu au rababehi hangko i kau mawongi, hangko i ngihi gaja, hai anu-anu ntanina au rababehi hangko i kau masuli, ba hangko i tambaga, besi ba watu pualam. 13 Nodo wori kanino hai rampa-rampa ntanina, anu-anu au mawongi nodo dupa, mire hai kemenyan. Tepesua wori anggoro, lana, tapu hai parea Nodo wori japi, dimba, dara, roda, hawi hai tauna au ratawani. Ope-ope balu-balunda iti barapi ara au moholo, anti kamageronami wanua iti. 14 Ido hai topobalu-balu iti moteriahihe ampu boea Babeli, rauli,
“Ope-ope au niunde tunami.
Ope-ope au masuku hai merae,
barapi ara irikamu,
hai barapi ina ralambi.”
15 Topobalu-balu au mewalimohe tauna pebuku lawi mobalu-baluhe i to Babeli, i tempo iti ina metotoki ngkarao pearaihe, lawi langahe ina nalelehi pepopeahi-ahi au morumpa wanua iti. Moteteriahe hai masusa lalunda, 16 rauli,
“Hurewu, hurewumi wanua Babeli au mahile hai maroho!
Hangkoia to Babeli mopake hampi au maluha,
bana malei hai malei malelentoro.
Hai meparewa bulawahe, watu paramata hai mutiara.
17 Agaiana peawanda au ngkaia iti, hampalai pea tunami!”
Ope-ope tauna au mohaokihe katuwonda i tahi, maroa au moanti kapala tahi, maroa topobago i kapala hai ope-ope tauna au mesawi i kapala, metotoki ngkarao pearaihe 18 mampeita rambu au mengkaore hangko i api au moande wanua iti. Mololitahe, rauli, “Marugi mpuu wanua au mahile! Bara ara pahuruna!” 19 Ina moawuihei waanda tanda kamasusana lalunda. Ina moteriahe hai mongangahe, rauli: “Hurewu, hurewumi wanua Babeli au mahile hai maroho! Anti peawanda to Babeli, ido hai ikita ope-ope au mobago i kapala tahi mewalike tauna au pebuku. Agaiana peita: hampalai pea, wanua iti tunami!”
Kamagerona Babeli rapokatana i suruga
20 Hangangaa matanakau, ikamu au maida i suruga.
Nipokatanami kamagerona wanua Babeli!
Hangangaa matanakau, ikamu taunana Pue Ala,
ikamu ope-ope suroNa hai nabiNa!
Lawi Pue Ala mohukumohe to Babeli,
mohurungi babehianda au kadake irikamu.
21 Roo indo, hadua malaeka au maroho moangkami haogu watu au kamahilena meliu hangko i riso, hai naweduka i lalu tahi, nauli,
“Nodo watu ide raweduka i lalu tahi hai barapi ina ralambi hule,
nodo wori wanua Babeli au mahile ina rapatuna,
hai barapi ina raaro hule.
22 Topokecapi, toponani, topotulali hai topotawue tatamburu,
barapohe rahadi i wanua iti.
Topoaro sou hai topokarahi barapohe ara;
pomoni pombaua barapi rahadi.
23 Barapi ina ara au mopatuwo hulo.
Barapi ina ara wotu toratauna.
Barapi ina ara wotu posusa petauna.
Ope-ope iti ina mewali
lawi hangkoia topobalu-balu i Babeli
mahile hanganda i dunia,
hai anti kapangisanda au kadake,
mopakanawomohe ope-ope tauna i dunia.
24 Hai mopapate worimohe bosa tauna i dunia
tepesuahe nabina hai taunana Pue Ala.”