22
1 Natudungia worina malaeka iti hambua owai au malino nodo watu au meninto; owai iti mopaara katuwo. Uluna mesuwu hangko i kadera kadatuana Pue Ala hai Ana Dimba, 2 hai moili i olo rara i tanga wanua iti. I pontimali wiwi owai iti, ara kau au rahanga Kau Ngkatuwo.a Kau iti mowua hampulo hai rombela i lalu hampare, wula-wulana mowua. Tawena rapopakuli bona mopakaoha tauna i humalele dunia.b 3 I lalu wanua iti barapi ara au Napaharara Pue lawi kadera kadatuana Pue Ala hai Ana Dimba ara i lalu wanua iti. Hai hawiNa menombahe Iria 4 hai raita lindoNa. Hangana Pue Ala teuki i wingkenda. 5 Barapi ara kaindi, hai ampu boea iti barapohe moparaluu hulo ba pesimbaki alo, lawi pewangkana Pue Ala au ina mosimbakihe. Hai ina moparentahe nodo datu hawe i hae-haena.Kahawena Pue Yesu
6 Roo indo, nauliangaana malaeka iti, “Ope-ope lolita ide tou hai ina tepabukei. Pue Ala au mowei InaoNa i ope-ope nabiNa, Ia au motudu malaekaNa mai mampopaisa i hawiNahe apa au hangangaa holiga mewali.”
7 Nauli Pue Yesu, “Barapi mahae ina hawemoNa! Morasihe tauna au mampeulai ope-ope paturo au teuki i lalu sura ide.”
8 Iko, Yohane, ikomi au mohadi hai moita mata ope-ope au napetudungia malaeka iti. Kakuhadina hai kakuitana iti, molingkudumona motumpa i lindona, menomba iria. 9 Agaiana nakontona, nauli, “Inee! Ineeko menomba iriko. Batena pea Pue Ala au hintoto nupenombai. Lawi ide iko, hawina pea worina Pue Ala himbela hai oio hai hangka nabimu hai ope-ope tauna au mampeulai apa au teuki i lalu sura ide.” 10 Hai nauliangaa mbulina, “Inee nuwuniangi apa au teuki i lalu sura ide, barapi mahae ope-ope ina mewali haha.
11 Lawi ane hawemi tempo iti:
Tauna au kadake,
pogiangaamide mobabehi au kadake.
Tauna au madosa,
pogiangaamide madosa.
Tauna au manoto,
pogiangaamide mobabehi au manoto.
Tauna au malelaha,
pogiangaamide mobabehi au malelaha.”
12 Nauli Pue Yesu, “Barapi mahae ina hawemoNa, hai ina Kuhurungi babehianda ope-ope tauna hintoto hai apa au rababehi. 13 Ikomi Alpa hai Omega, Au Nguru-nguruna hai Au Kahopoana. Pepongkana hai Kaopeana.
14 Morasihe tauna au mobahoi hampinda hawe maituc, lawi ihira au ina rapaliu maande wua Kau Ngkatuwo. Ihira au peisa moliu i babaka mesua i lalu wanua iti. 15 Agaiana tauna au kadake, topedoti, topobabehi au merikai, topepapate, topenomba i anitu, topodongko, hai tauna au mampokatana podongkonda, barahe rapaliu mesua i lalu wanua iti.
16 Iko, Yesu, motudumoNa malaekaNgku mopahawe paturoNgku ide irikamu ope-ope jumaa. Iko pemuleanana Datu Daudi. Ikomi Betue ntanda i Mata alo au mewangka ntepuu.”
17 Inao Malelaha hai towawine au rataunaa Ana Dimba manguli, “MaimoKo!”
Hai ope-ope tauna au mohadi lolita ide, hangangaa manguli worihe, “MaimoKo!”
Hema au mangkadou, maimokau!
Ane niunde, maimokau maenu owai au mopaara katuwo. Hai bara niholo!
Kahopoa sura
18 I ope-ope tauna au mampehadingi apa au teuki i lalu sura ide, kupopaingaa: hema au motambai hampaka lolita i sura ide, Pue Ala ina motambai wori pehukuNa i tauna iti: ina molambihe pepopeahi-ahi au teuki i lalu sura ide. 19 Hai hema au mopamakura hampaka lolita hangko i sura ide, Pue Ala ina mopamakura wori kirana: barapohe peisa maande wua Kau Ngkatuwo, hai barahe peisa mesua i lalu wanua au malelaha, nodo au teuki i lalu sura ide.
20 Yesu mosabi kana i ope-ope lolita ide, manguli, “Tou mpuu. Barapi mahae ina hawemoNa.”
Amin! MaimoKo, O Pue Yesu!
21 Kuharunga bona Pue Yesu mowati ope-ope taunana Pue Ala!