Kàdátìpa 1

Pɔ̀kàta Pɔ́dì wà̰haà-ta Kàdátìpa

Dɔɔ̀mu

^1-2 Mmí Pɔ́dì Sèsíì tɔntɔndikó nà weèdɔɔ̀pa tɔɔ̀pa wɛǹni mɛ̀m̀pà n péé-nà-pa miì, tḭ́ńti-dà wà̰hu pɔ̀kàtà mɛntà Kàdátì teǹka weèdɔɔ̀-nàmɔ̀ka. Yè pú yòǹ nìpa-dà n ta̰kadà yoo nìi-dà hédà kà n yòǹ-nà Sèsíì tɔntɔndikó, àmá Sèsí-Kídísì nà Báàa Weèdi mɛ̀nì ò yá̰hìnà-di kpíípa mɛhɛká-dà n yíí. ³ Ti Báàa Weèdi nà ti Teó Sèsí-Kídísì é nɛ pa̰a̰ pa̰á̰suumá nà wɛ̀ɛ̀di. ⁴ Sèsí-Kídísì-dà kɔ̰́ɔ̰̀ o cɔ̰́ɔ̰̀di é kpíí ti sḭ̀ḭ̀ma kpɛ́mú, é ti dontá fòùkù mɛnkù pa̰á̰kpákpààma mɛhɛká, é n'yònà ti Báàa Weèdi de kpɛ̀kaàma. ⁵ Báàa Weèdi yèdi é n'yòǹ fa̰ntà-di k'yé n'kɔ́ɔ́ yɔ̀ɔmá! K'yé mà n'yòǹ.

Weèdi Wɛnaamá yòǹ màcɔ̰́-dà

⁶ Yè n dii-í-ma nà nɛ bútà-ma kú bookú Weèdi fen-fem̀ma, é fitá Wɛnaamá tɔɔ̀ma kú bɛ́ka. Mɛní-dà há̰ nɛ yíí Kídísì pa̰á̰suumá mɛhɛká. ⁷ Nɛ maàhu è tonà Wɛnaamá tɔɔ̀ma-dà péé, àmá Wɛnaamá tɔɔ̀ma kɔ́ɔ́. Nìpa-dà péé nɛ cɔhɔ̀kà è nɛ buupú, è dɔ́sí cehèna Kídísì wɛnaamá. ⁸ Ti nɛ yɔ̀ɔ cakàpu-dà Weèdi wɛnaamá. Kà tɔɔ̀ɔ òcɔ̰́ǹ tɛ̀ni, bá kà tḭ́ńti-dà yoo Weèdi tɔntɔndikó òcɔ̰́ǹ cútà-ní nà hḭ́ǹka è nɛ cakáà wɛnaamá tɔɔ̀ma, kà mà ceń-nà ti nɛ cakáà-mà, kà sḭ̀mu é dɔdi ye yaǹn yudí hḭ́ǹka. ⁹ Ti mà nɛ yɔ̀ɔ cakàpu-dà, kà n tṵ́mà mà nɛ cakú wɔ̀nì mɛ̀nì è yɔ̀: K'òòcɔ̰́ǹ tɛ̀ni é nɛ cakáà Weèdi wɛnaamá tɔɔ̀ma kà mà ceń-nà nɛ yeèkaà-mà ti nùka mɛhɛká, kà nɔdàma é mpéé-nà ye yaǹn.

¹⁰ Kà n wɛì mɛma, n pɛnti nìpa sɛdàma-dà nkɛ́ɛ̀ Weèdi kpɛ́ɛmá? N pɛnti n kó hḭmpú-dà é nakàna nìpa yàma? Ṵ́ṵ̀! Kà n de pɛnti é nakàna nìpa yàma, è yenì n pú yòǹ Kídísì deho.

Yè hḭmpú kà Pɔ́dì é hḭn Sèsíì tɔntɔndikó

¹¹ N kúcàpa nà n potɔ̰ɔ̰̀pa-nà, n nɛ cakú-ma: Weèdi wɛnaamá n nɛ cakáà-ma, pú yɛɛ̀ni-nà-ní nìpa pesá. ¹² Múńdìkaà, n pú mà yèkaà, n mɛ̀ɛ pú mà biɔháà nìdì peyà, àmá Sèsí-Kídísì-dà mà nà n bahìnà.

¹³ Nɛ yeèkaà-á-ma n de yòm̀pu è káà kɔ́dì Sùwífùpa kú weèdɔɔ̀pu. Nɛ yá̰á̰-dà n de fá̰kápú-ma kú bookú dɛ́dɛ́í weèdɔɔ̀pa è kpɛ̀i pà nuncí. ¹⁴ Ye kú wɔ̀ni-hɔ̰, n dapàǹtɔ̀pa wɛǹni mɛhɛká tíńtí Sùwífùpa ti bookú mɛhɛká, n de kɔ́ɔ́ tɔù ti weèdɔɔ̀pu hḭ́ǹka. N de káá-ma wɔ̰ǹyahití é pà ha̰tá ti yààpa kákámú hḭ́ǹka.

¹⁵ Àmá kà Weèdi é n ta̰kadá ni pa̰á̰suumá mɛhɛká kà n yṵṵ́ káà n póń, é n yíí è yɔ̀ ń púsí ni tɔmú. ¹⁶ Kà daadí pɛdá, kà ní ta̰kadá é n bɛka ni bíitá, è yɔ̀ n caka ta wɛnaamá mɛ̀m̀pà pú yòm̀pa Sùwífùpa, n pú taá béka òcɔ̰́ǹ tencí. ¹⁷ N mɛ̀ɛ pú póńtà Sèdìsàdɛ́m̀, è kó taá é peèta-nà mɛ̀m̀pà de n ha̰nci-pá é hḭn Sèsíì tɔntɔndipá. Àmá n de cemà ka̰hà Àdàbíì teǹka-dà, ye kú dàhàka, ká n fitá é tóní Dàmásì yɔtí. ¹⁸ Beeká kàta̰a̰ kú dàhàka-dà, n póńtà-ma Sèdìsàdɛ́m̀ è kó taá yá̰dá Píyɛ́ɛ̀^a. Ká n tɛ̀i é pa̰á̰ o pesá daàka píì-kànùm̀. ¹⁹ Mɛnń bààsí, n de pú tɛ̀i é dɛ́há Sèsíì tɔntɔndikó tɔɔ̀o òcɔ̰́ǹ, k'yè pú yòǹ Teó kúcàa Sàákì. ²⁰ Ye wɛmà n nɛ wa̰à̰hu-mà yòǹ wɛbeèdi-dà. Weèdi mɔ́nní yá̰á̰-ma è yɔ̀ n pú báńtí.

²¹ Ye kú dàhàka, n de taá Sìdíì tempáàku-dà nà Sìdìsíì kpɛ́kú. ²² Àmá, Sùdéè tempáàku weèdɔɔ̀pa de mun pú n dɛ́hà daadí yènì. ²³ Pà baà de hɔ̰́ n'you sá̰à̰di-dà kà pà toò: Mɛ̀ǹǹ de ti fá̰kápú-ko, mɛnń-dà cakú wɔ̀nì mɛnì dandaní wɛnaamá ò de pú kpɛ̀i kà mɛ̀mà m'péé-ma. ²⁴ Kà pà dùǹti Weèdi nà n kpɛ́mú.