Fìdípùpa 4

¹ N kúcàpa nà n potɔ̰ɔ̰̀pa-nà, nɛ́na n dɔ́sí-pa sàma, yè n dodì-í-ma è yɔ̀ ń tṵ́má nɛ dɛ́há. Nɛ́na-dà yòǹ n yaǹnaakú, è yòǹ n tɔmú boutí. N dóòbɔ̀ɔ̀ka-nà, nɛ́ n'tṵḿ tenten nà Teó.

Tencí dèǹdèǹci

² N cɔɔ̀hu Èfòdíì nà Sḭ̀ǹtísì, è tṵ́mà pà sɛ́úkú è yɔ̀ pá m'múń nùdi, mìì tee-sá pà yòǹ Teó kpɛ́ɛpá-dà.

³ Fɔ̰́ń mɛ̀ɛtékà tá, n dehàtɔ̀o mɔ́nń, m'a cɔɔ̀hu è yɔ̀ á tempa-nà-hɔ̰ ye poopà-ní. Pà pɛ́ɛ̀ é n màa-nà-á-ma Kídísì wɛnaamá kpɛ́mú, é pɛ́ɛ́ nà Kèdèmáà, nà n dehàtɔ̀pa mɛ̀m̀pà kú yèka péé-ka fòùmu pɔ̀kàta mɛhɛká.

⁴ Ní m'péé-nà yaǹnaakú mɛhɛká wɔ̀ka wɛǹni nà nɛ múń-nà-ma Kídísì kpɛ́mú, n tṵ́mà mà nɛ cakú-ma: Ní m'péé-nà yaǹnaakú mɛhɛká.

⁵ Nɛ́ héé kà nìpa wɛǹni é yá̰dá nɛ yaǹyɔ̀kàm̀ma sá̰á̰-ma. Ti Teó koò pú dɛu è tóńti-ní. ⁶ Nɛ dá m'maàhu kà nɛ bɔ̀ti putì nà yècḭ́ḭ̀ kú hḭ́ǹka, àmá nɛ́ n'cɔɔ̀hu Weèdi é nì n'sɛ́úkú nɛ kpɛ̀i-sá wɛǹni mɛhɛká. Nɛ́ mà n'hɔ̰n é nì n'sɛɛ́-nà. ⁷ Mɛma, Weèdi wɛ̀ɛ̀di mɛ̀nì ha̰tà-di nìi kó nɛɛ́ mahà-sa wɛǹni, kó m'púsí-ma nɛ yàma, nà nɛ yam̀màhàka, nà nɛ múń-nà-ma kpɛ́mú Sèsí-Kídísì.

⁸ Ká n nɛɛ́ kɔ̀ù n wɛmá n kúcàpa nà n potɔ̰ɔ̰̀pa-nà, n nɛ cɔɔ̀hu è yɔ̀: Niìi mìì kú wɛnnì yòǹ-sa mɔ́ma, mìì kú wɛnnì sànà-sa cuùmá, mìì kú wɛnnì coó-sa, mìì kú wɛnnì weni-sá, mìì kú wɛnnì sànà-sa p'éè dɔ́ka, mìì kú wɛnnì sànà-sa p'éè sɛda, mìì kú wɛǹni sudi-sá, mìì kú wɛnnì sànà-sa fa̰ndàma, ní n'yòǹ niìya̰ mìì wɛ̰ɛ̰́-sa nɛ yam̀màhàka. ⁹ N nɛ biɔhànà-sa kà n'ɛ́ɛ̀ teha, nà nɛ yeèkaà-sa n nùdi mɛhɛká, nà nɛ dɛ́hà-sa ká n yè pa̰ná, nɛ mɛ̀ɛ té yè m'pa̰kú. Mɛma, Weèdi mɛ̀nì pɔ̰n-dí wɛ̀ɛ̀di kó nɛ m'péé-nà-á-ma.

Pɔ́dì sɛɛ́ Fìdípù yɔtí yam̀ma nà pa pa̰ká kpɛ́mú.

¹⁰ Yè n nadi sàma-dà nà n múń-nà-ma Teó, mìì tee-sá nɛ tṵ́mà dèǹtà n kpɛ́mú é n wisí. Ye wisímà-ní, nɛ de mà káá-ma, àmá nɛ pú dɛ́tà bòdi é mà bɛka. ¹¹ N pú wɛì mɛma, è yɔ̀pu kpɛ́mú n pɛnti yècḭ́ḭ̀, á̰à̰. N yɔ̀ɔ mandápu-dà n ní n'sàà n káá-sa. ¹² N nɔn-ń-ma è fòù n kɔ́ɔ́ tḭ́ń wɔ̀ni yècḭ́ḭ̀, è nɔn è fòù n káá tḭ́ń wɔ̀ni. N biɔháà-á-ma è té n'sàà n káá-sa, páàti wɛǹni, nà niìi wɛǹni mɛhɛká: Kòni mɛhɛká-dà, dikádɛ́nkú mɛhɛká-dà, n káá tḭ́ń wɔ̀ni-dà sàma yoo n kɔ́ɔ́ tḭ́ń wɔ̀ni yècḭ́ḭ̀, n biɔháà-á-ma è té n'sàà n káá-sa. ¹³ N kó nɛɛ́ pa̰á̰-ma niìi wɛǹni nà Kídísì mɛ̀ǹǹ pɔ̰n-kó kpeèti kú kpɛ́mú. (Kídísì-dà n pɔ̰n kpeèti kà n nɔn è pa̰kú niìi wɛǹni.) ¹⁴ Nà mɛma há̰kà, nɛ pa̰à̰ suumá-dà nɛ n totà-nà-mà-ní n náńkú.

¹⁵ Fìdípù yɔtí yam̀ma-nà, nɛ yá̰á̰-ma dɛ́dɛ́í è yɔ̀ n cetà tḭ́ń daadí Kídísì wɛnaamá cakàpu, n de yídà-á-ma Màsèdɔ́nì tempáàku. Ye kú daadí-ho, mmí nà weèdɔɔ̀-hòǹhòni tɔɔ̀di nìcɔ̰́nì de pú pɛ̰ḭ ti tɔɔ̀pa nɔ̀hi, k'yè pú yòǹ nà nɛ́na cɔ̰́ɔ̰̀di. ¹⁶ Nɛ de mà yɔ̀ɔ pa̰á̰pu-dà háá cɔ̀ku màdɛ́ɛ́, kà n péé Tɛ̀sàdòníkì yɔtí, kà nɛ́ n naǹci-ní yè de n békú-sa. ¹⁷ Yè pú yòǹ pa̰ká-dà n pɛnti-má, àmá n kpɛ̀i-sá-dà héé nɛ́ dɛ́tá cɔ́ǹti nà ka kpɛ́mú. ¹⁸ N dɛ́hà-á-ma nɛ n naǹci-sá-ní wɛǹni, k'yé n tɛ̀i é múńtá yɔ̀ɔ sɔ̰́ńtá. Nɛ kɔ̰́ɔ̰̀-sa-ní wɛǹni Èpàfòdítì, yè n ta̰ntà-á-ma-ní, yècḭ́ḭ̀ koò pú n dóńtà sá̰mà. Nɛ pa̰ká yònà dɔ̀hàdi mɛ̀nì kú nɔ́kú naa-dí-dà, dɔ̀hàdi Weèdi ta̰ntà-di, nì kpɛ̀i-dí kú bookú. ¹⁹ N Weèdi mɛ̀nì káá-di kááma sàma, kó nɛ pa̰a̰-á̰-ma nɛ kpɛ̀i-sá wɛǹni, nà Sèsí-Kídísì kpɛ́mú. ²⁰ Ti Báàa Weèdi yèdi é wɛhika k'yé n'kɔ́ɔ́ yɔ̀ɔmá! K'yé mà n'yòǹ!

Dɔɔ̀mu dèǹdèmu

²¹ Nɛ́ dɔɔ-ho mɛ̀m̀pà yòǹ-pa Weèdi kpɛ́ɛpá nà Sèsí-Kídísì yèdi. Ti kúcàpa nà ti potɔ̰ɔ̰̀pa mɛ̀m̀pà n péé-nà-pa miì mɛ̀ɛ té nɛ dɔń-hɔ̰. ²² Weèdi kpɛ́ɛpá wɛǹni nɛ dɔń-hɔ̰, mɛ̀m̀pà dehú-pa wóosào kpɛ́mú kú dàkà.

²³ Kà Teó Sèsí-Kídísì pa̰á̰suumá é nɛ m'péé-nà!