Hèbùdéèpa 8

Sèsíì-dà yòǹ ti dɔ̀hàka kpɛ̰́ǹn mɔ́nń.

¹ Ǹtɛ mìì héé-sa yudí ti wɛɛ̀-sà wɛnnì kú hḭ́ńkà-ní: Ye kú dɔ̀hàka kpɛ̰́ǹn kú bookú-dà ti káá-ma. Ò taá kaàdi, Weèdi nɔɔ̀ti wɛǹni kpɛ́ɛdí wóokàtàda heùma-dà, hḭ́ǹka mɛhɛká. ² Ò pa̰kú ye pesá dɔ̀hàka kpɛ̰́ǹn tɔná-dà, Weèdi fḭ́ḭkú mɛhɛká. Ye kú fḭ́ḭkú-dà yòǹ Weèdi fḭ́ḭkú mɔ́nkú. Nìpa pú kù kpɛ̰́ḭ́, àmá Bateó-dà kù kpɛ̰́ḭ́.

³ Dɔ̀hàka kpɛ̰́ǹn wɛǹni, pà hɔ̰́ ò hḭ́ná è yɔ̀ ó n'kɔ̰́nì nìpa pa̰ká-dà Weèdi, é m'pa̰kú-nà dɔ̀hàka pa kpɛ́mú. Yè mɛ̀ɛ té békú ti kú kóóò-ní, ó n'káá ò mɛ̀ɛ té kɔ̰́nì-sa-dà Weèdi. ⁴ K'ò de péé teǹka hḭ́ǹka-dà, ò múńtà de pú kó n'yòǹ dɔ̀hàka yaǹn, mìì tee-sá dɔ̀hàka yam̀ma yɔ̀ɔ péépu-dà, è kɔ̰́nì pa̰ká Weèdi é n'yònà Mɔ̀yísì kpɛ̰́ńtìnùka hḭ́mpú. ⁵ Pà pa̰kú pa tɔná Weèdi fḭ́ḭkú mɛhɛká-dà. Ye tɔná pà pa̰kú-na yohìnì mìì péé-sa-dà nà mɔ́ma hḭ́ǹka è tṵ́mà yòǹ ye dìku. Weèdi de cakáà-á-ma Mɔ̀yísì ò de kó pa̰á̰ tḭ́ń wɔ̀ni ni fḭ́ḭkú è yɔ̀: A dá dúí yècḭ́ḭ̀, kù pa̰á̰ ku wɛǹni kà kú n'yònà sɛ̰́nɛ́nɛ́ n de a bɛkáà-ku ta̰à̰di hḭ́ǹka. ⁶ Àmá sá̰mà-ní, tɔmú pà kɔ̰́ɔ̰̀-pu ti kú dɔ̀hàka kpɛ̰́ǹn, mù ha̰tà-á-ma dɔ̀hàka yam̀ma tɔɔ̀pa kpɛ́mú, è yá̰á̰ múnáma ò yòǹ-ma kú mɛhɛká cawà̰do, mà ha̰tà-á-ma dekáà wɔ̀ni kpɛ́ɛmá, mà mɛ̀ɛ tṵḿ-sa kú hḭ́ǹka kà Weèdi hḭ́nà nùdi è yɔ̀ nì k'éè pa̰ná, yè suu-ú-ma é ha̰tá.

⁷ Kà múnáma cecemá de kɔ́ɔ́ sá̰à̰ni, è yenì yè pú békáà Weèdi mà cèhèna nà dɛ́ɛ̀ma. ⁸ Há̰kà, Weèdi mɔ́nní de dɛ́hà-á-ma ni nìku hɛ̰kàma, ye kú kpɛ́mú-dà tee Bateó de pà cakáà-ma è yɔ̀:

Daàka pení-ma-ní,

kà n kó pa̰á̰ múnáma pàm̀ma,

nà Ìsìdàyɛ́dì nìku, nà Sùdáà kpɛ́kú.

⁹ Ye kú múnáma pú kó n'yònà

n de pa̰à̰-ma nà pa yààpa,

n de pà hɛ̀dà tḭ́ń daadí nà n nɔ̀ku,

é pà dèna Èsípútì teǹka mɛhɛká.

Pà há̰ pú púsí-ma kpɛ́mú sukú n múnáma

n de pà pa̰à̰-nà-ma,

ye kú kpɛ́mú-dà tee n mɛ̀ɛ té pà wɛ́i-má,

mmí Bateó-dà mà hḭ́n.

¹⁰ K'ò tṵ́mà yɔ̀:

Ǹtɛ múnáma n kó pa̰á̰-ma

nà Ìsìdàyɛ́dì nìku ye kú daàka dàhàka

mà kó n'yòm̀pu.

N kó taàa n kpɛ̰́ńtìnùka

pa yam̀màhàka mɛhɛká-dà,

é kà wà̰ta pa yàma mɛhɛká.

N kó n'yòǹ pa Weèdi-dà,

kà pá n'yòǹ n nìku.

¹¹ Yè koò pú kó béka è yɔ̀,

òcɔ̰́ǹ é biɔhàna o yɔtí kóoó,

yoo o kúcàa è yɔ̀ ó n yá̰dá.

Pa wɛǹni kó nà n yá̰á̰-ma,

é tódá sìm̀mɔ́m̀ma háá nà kpɛ̰́m̀ma,

¹² mìì tee-sá, n kó pà

dèda-á-ma pa sḭ̀ḭ̀ma,

n koò pú kó n'tài

pa yetáka n yàma mɛhɛká.

¹³ Weèdi yíí-mà ye kú múnámà è yɔ̀ múnápààma, yè sá̰kà ò kpáhìnà cecemá kpɛ̰́ɛ̰̀ma-dà. Mìì há̰ yókáà-sa è kpɛ̰́ń, yè pú dɛu-nà ka̰hápu.