¹ Festus ihokai poe otoe rei, oyo onona tonu oyo, ieu iarihoni Kaisarea nanie ieui roe Yerusalem. ² Hoka roe oyo, sio imam onata runa sio ona Yahudiu tamena oama-amanaru Paulus osiki. Sio oai-ainisi ³ na iuna iake osiso na iaisosi sio umau orori Paulus roe Yerusalem. Sio rei oheu nanie osakai poe arena tihue, oyo ohunui. ⁴ Ne Festus on poe iasau, “Sio soratatua wasoni osakai poe Kaisarea. Au oi, potuina tewa nea, oyo ununiku poe rei honu. ⁵ Reiso oaisosi sio wasoni no kawasa umau rerihoni omi rei na sio oeuso poe, okataku. Munata Paulus isana mka sio oamanarui poe rei.”

⁶ Iruei roe Yerusalem roe sio Yahudiu onona wanu te hutusa honu, oyo Festus inuniki poe Kaisarea. Hoka poe, hanu sanrei oyo, iruei tau ne katera wani iatinu parakanau tanui nanie iasau ata kani Paulus isana te tewa. Iruei poe oyo, iaisosiso orori Paulus poe tanui. ⁷ Paulus ihokai poe nea oyo, sio Yahudiu wasoni ohokaso on roe Yerusalem rei, oooso ohoriki. Oamanarui oasau ata ne isanaya mtinta panesi. Ne sio onoo tau matae tewa sae waroni sio oamanarui tanure. ⁸ Oyo Paulus ianamana inete ruai. Iahata, “Upuku. Pusu Musa ne maunauna, au we isanae isa tewa. Pusu Anahatana ne numa mainisie, au we isanae isa tewa. Pusu ia natu Kaisar ne maunauna iae, au we isanae isa tewa oi.”

⁹ Ne Festus nanie inana sio Yahudiu anoo. Reiso iasei tau Paulus sanrei, “Ano nanie aeua roe Yerusalem na au uasei tanua na uanei ata kani sio oamanarua titue te tewa?” ¹⁰ Ne Paulus on poe iasau, “Au wani uoo mai ano me kawasa. Ia natu Kaisar roe Roma irui kawasa osia na aasau ata kani usana te tewa. Kahurae omi oasei tanuku mai rei. Ano ruamu aanei ia-ia ata au we sanae isa osi sio Yahudiu tewa. ¹¹ Au we isanae mtinte isa tewa. Isanae mtinte wani kahurae oapasanaku ohunuku tanui. Sinana au we isanae mtinte na kahurae ohunuku, ohunuku, areimo iake. Au uainisi tewa na pene ohunuku. Ne sio oamanaru oakarota, reiso sio no kawasa oruiku osi sio Yahudiu rei tewa. Au uainisi na ia natu Kaisar roe Roma ruai iasei tanuku na iasau ata kani we isanae te tewa.”

¹² Oyo Festus ianamana runa sio wasoni oau-aunaui, oyo iasau osi Paulus, “Ano aainisi na uaisosia roe ia natu Kaisar reiso kahurae ano aeu roe tanui.”

¹³ Potuina tewa oyo, Aia Agripa runa hotai Bernike ohokaso poe Kaisarea nanie oatapea Festus. ¹⁴ Hoka poe oyo, orue onona inasa rai, oyo Festus isima runa Paulus ne parakana osi Aia Agripa. Iasau sanrei, “Ia isa waini rei, Feliks iarihoniki pani pui anoe. ¹⁵ Ueuku roe Yerusalem, oyo sio imam onata runa sio ona Yahudiu nesia rei osima osiku runa ia rei. Osima oyo, oainisi na uasau ata ia rei isana. ¹⁶ Ne uasau osiso ata ami, ia natu Kaisar ne mansiau, piasa atapi ia waini sio oamanarui iamanane sio wasoni oamanarui rei na ianamana inete ruai. Inete ruai samatoro ami aasau ata kani isana te tewa. ¹⁷ Reiso sio ona Yahudiu rei ohokaso mai, oyo unapa potuina tewa. Nene hanu roe oyo, urueku tau we katera wani uatinu parakanau tanui. Oyo uaisosiso orori ia rei poe tanuma. ¹⁸ Sio wasoni oamanarui rei ohitio roe, oyo uahata kani sio nanie oamanarui tau kahatena mainaya. Aikee oamanarui rerihoni kahatena sanrei tewa. ¹⁹ Hasae otuntana runai rerihoni sapani na kahurae sio oainaa runa Anahatana. Otuntana runai rerihoni ia waini nanai Yesus waini imatai. Ne Paulus iasau ata waini iamahaiki. ²⁰ Reiso au mo uanei tewa sapani na au mka uasei tanui rerihoni rei. Oyo uasei ata kani nanie ieui roe Yerusalem na sio oasei tanui roe kota rei. ²¹ Ne Paulus iainisi na sio soratatua oapamesei na mka ia natu Kaisar iasei tanui na iasau ata kani isana te tewa. Oyo au uaisosiso oapa-apamesei rotu-tu mka au pisa uaisosiki roe ia natu Kaisar. ²² Oyo Agripa iasau osi Festus, “Potuina nea au ruaku nanie uatinu ia rei.” Festus on poe iasau, “Hanroe mka ano aatinui.”

²³ Reiso hanroe oyo, Agripa runa Bernike ohokaso. Ohokaso oyo, sio panesi oamuira uaso tau maise onate. Onususo pani numa mainae wani sio hutua oamanouso tanui. Onusu okata sio mainaya rerihoni sio soratatua runa sio onata rerihoni kota rei oi. Oyo Festus iaisosiso orori Paulus roe tanuso. ²⁴ Hoka roe oyo, Festus iasau, “Upuku Aia Agripa runa pusimo utumo wani okatama mai rei. Omi onoo ia reino. Sio Yahudiu pusiso wasoni roe Yerusalem runa mai Kaisarea reini, oainisi runa oakapona oahata kahurae ami ahunui. ²⁵ Ne au usupu ne isanae isa tewa na ami ahunui. Ia ruai iainisi na uaisosiki roe ia natu Kaisar roe Roma na natu Kaisar iasei tanui na iasau ata kani isana te tewa. Reiso uapamata sou nanie uaisosiki roe ia natu Kaisar. ²⁶ Ne uanei tewa mka ukanu tau surate sapani osi upuku Kaisar rerihoni ia reini runa ne parakana rei. Reiso au uaisosiki ihokai mai tanumo reini runa ano ruamu, Aia Agripa, na ita iasei tanui honu na usupu sae isa na ukanu surate rei. ²⁷ Uahana iake tewa kani uaisosi ia isa waini sio oaresiki na ieui roe ia natu Kaisar kani usima tewa rerihoni sio oamanarui sapani. Kahurae usima rerihoni ne isanae sae.”