¹ Anaku Timotius,

Au, Paulus ukanu surate rei. Au maisosie wani Kristus Yesus iaisosiku pusu Anahatana ne maue. Iaisosiku na iuna sani naone iasau. Iasau ata mka sio oamahaiso rotu-tu ria supani pusu anoo osa runa Kristus Yesus.

² Ukanu surate rei osia, Timotius, anaku wani anoku runaya. Uainisi tau Amari Anahatana runa Upuri Kristus Yesus sanrei, “Ama. Upuku Yesus. Masike Timotius ipalalosa iae, orui iake mainae osiki sirinia. Anomo runaya. Ounai ikarihuru iamahai.”

³ Au uasau osi Anahatana ata, “Ama. Ano mo, ano iake. Timotius iparisaa tau Yesus. Reiso ano iake tunne naiosa.” Au uanori runa Anahatana rei sani masuae wea upu oanori runai oi. Uanori runai uarinii rerihoni uamahaiku sapani. Uamahaiku uanori runa Anahatana manisate anoku. Au uasau ata Anahatana iake pannuhu anoku erepeka runaya, oyo uainisi tau Anahatana osia tau onone, tau ranie. ⁴ Anoku erepeka runa sapani na ita iauhaa umau, oyo matamu waena. Reiso anoku ererihu runaya. Nanie usupua na mka anoku miri-mirike. ⁵ Anoku erepeka runa sapani na ano aparisaa ia-ia tau Kristus Yesus. Ano aparisaa sani mataanoe momomu Lois runa inamu Eunike oparisaa. Au uanei ata ano oi aparisaa. ⁶ Reiso au uakiraya na aamauna honu auna me tanei wani Anahatana ihitia na aunai. Anahatana iakahaia aunai. Ihitia pusu au uahusiea. Asaka na aamauna anana tanei honu sani ia isa iauhona usa na ereai honu. ⁷ Auna me tanei rei tau Anahatana irui Ne Inaha osita. Anahatana Ne Inaha rei iuna ita ikaitau tewa. Ne iuna ita ianori runa Anahatana. Ianori runa ne kawasa. Iuna ita anori runa Anahatana ruai runa tumatau oi. Iuna ita iapamese anori.

⁸ Reiso pene aaumaa asima rerihoni Upuri. Pene aaumaa rerihoni au wani sio onusuku pani pui anoe tau au usima rerihoni ia rei. Ne sinsaraya sani au reini tau aaunauso tau Sou Iake rei. Mka Anahatana iunaya aamkona na aapamese sinsaraya. ⁹ Anahatana sahoro iapuheuta na iamahaita rotu-tu ria supani. Anahatana sahoro ianaha runata na ita manisata onata. Iuna sanrei pusu ita re atata tewa. Ne iapuheuta runa ianaha runata pusu ia ruai iheu nanie irui iake osita. Masuae on Anahatana ihaye tuniai reini tewasi, iheu nanie irui iake osita pusu Kristus Yesus. ¹⁰ Muie reini mo, Anahatana iatuheteta sapani na irui iake osita tau Ia Waini Iapuheuta ihokai. Ia reimo, ia Kristus Yesus. Pusu Yesus ita ikaitau matane tewa nea. Anahatana iatuheteta nea ata pusu Sou Iake rerihoni Kristus Yesus, mka iamahaita rotu-tu ria supani.

¹¹ Au mo, Anahatana ihitiku tau ne maisosie. Ihitiku na uaunauso tau Sou Iake rei runa uatuheteso tanui. ¹² Reiso masike sinsaraku tau Sou Iake rei iae, uaumaa tewa. Tau sae, uationa Kristus Yesus waini uparisaai. Uanei ata Sou Iake rei wani iruiki osi au nea na uaunauso tanui, mka isakai. Isakai rotu-tu mka ihokai honu.

¹³ Asaka na aaunauso tau maunau titue rai waroni ano aatinu rerihoni au. Aaunauso aparisaa tau Kristus Yesus. Anomu runa Anahatana runa tumatau pusiso. Aparisaa tau Kristus Yesus iakahaia. Anomu runaso tau Kristus Yesus iakahaia. ¹⁴ Asaka Sou Iake rei wani Anahatana iruiki osia na aaunauso tanui. Asakai na pene ia isa ineniki. Asakai tau Anahatana Ne Inaha waini iruei pani anori iakahaia.

¹⁵ Ano aanei nea ata sio wasoni oparisaa pusiso sui otoe Asia openeso tanuku. Figelus runa Hermogenes iae openeso tanuku. ¹⁶ Ne uainisi na Upuri irui iake osi Onesiforus ne mansiau. Nai ina-inasa raini iuna anoku iake. Masike sio onusuku pani pui anoe iae, Onesiforus iaumaa rerihoni au tewa. ¹⁷ Ne ihokai mai kota Roma, oyo inina-ninaku ro-rotu-tu isupuku. ¹⁸ Ano ruamu aanei sapani na iakahai pani kota Efesus. Uainisi na Upuri iapunokoi tau ranie hatae rei mka iapasana pusita.