मत्ती
लिकूरान एडो पाटा
परीचय
मापोरबू, पुराना नियोम तो वादेक जुमान चिड़ाक किली तान्न लोगूग चियरान बाचाकतान कोस ईसू आय एनी, मत्ती लिकूरान एडो पाटेत कागेत पोक चियमो।
ई एडो पाटेत कागेतीन लिकूरानेड मत्ती आय। ओड रोमी सरकारूग पोटी पातरानेड मेट्टेड। ईसू ओनीन, तान्न चेलाल एरू कूयूरानूग, ओड ईसून बारा जान चेलालेर कान तीग ओकूर एञ्ञेड। ओड ओक एऊदी मांजा आय।
एऊदीकूल पुराना नियोम ती मसीयाल वेर्राड एनी लिका मेन्डा। ओड वेर्राड आरू रोमी लोगीन पान्न तीग एऊदी लोगीन बाचाकताड एनी एऊदीकूल ओनीन पाव चूड़ चूड़ी मेन्डीर। मसीयाल एन्डान पोद्द इबरानी पाटेत पोद्द आय। मसीयाल एनोड तेल्ल ती नेय चाप्पी किली तान्न कामूग मापोरबू आची मेन्डान कोस एनी चोमजूरानो आय। आटनी लिकी मेन्डान मसीयाल, ईसू ई गो आय, एनी एऊदीकूलीन चोमजाक मत्ती ई कागेतीन लिकेड।
ईसू एऊदीकूल कान जेनोम एरी किली पिञ्ञेड। एरोड बेले ई एडो पाटा आमान एऊदीकूलूगी एरा, एरोड जाम्मा मोंजीपूर तो लोगूग बेले आय। पुराना नियोम ती मापोरबून कान तीग काबेर वेन्नी किली लोगीन पोक चियरान गुरूकूल तीग, मापोरबू पाटा चियी मेन्डान पोद्दूल, एटे-एटे ईसून जियोम ती पूरा एञ्ञोव एनी मत्ती टोटीक चियमेड।
ई एडो पाटेत कागेत ती मापोरबू जाम्मेनी आंगरूरान इसाब आरू मापोरबू आंगरूरान सरग तो बीतेर ती रेच्चा लिकी मेन्डानूग, मापोरबू जाम्मेनी आंगरूरानो, चिलाड मापोरबू आंगरूरान सरग एन्डान पोद्दूल गेन-गेन वेरमोव।
ओड लिकूरान तेरान तो पिदीरूल इबराईमीन तीग मुरीयाकमोव। इबराईमीन एऊदीकूल ताम्म पुरकेत बुवा एनी मानूरीर। ओन तेरान ती दाऊद मेनगा जेनोम एञ्ञेड। ओड इसराएल लोगीन मुकीयाल कोस मेट्टेड। ईसू दाऊद कोसीन तेरान ती आरू ओन पोलूब बेतलेएम ती जेनोम एञ्ञेड एनी मत्ती टोटीकमेड।
ईसू रेच्चा मेरचीकतान मुकीयाल गुरू आय आरू ओनूग मापोरबून नियोमूलीन चोमजाक आरू मापोरबू जाम्मेनी आंगरूरान इसाबूलीन केडीक पान्न मेन्डा एनी ई एडो पाटेत कागेत ती मेन्डा। ओड मेरचीकतानोन मत्ती दाड़का दाड़ी लिकेड नाड। आव ईव आय:
1. कोप्पे ती मेरचीकतानो — इना मापोरबू आंगरूरानोन पातीयाकतान लोग एट्टो चेलनूकूड़ूल ती पीयरानो आय, ओरूग नातो-नातो आसतीरूल टोन्डूराव आरू ओर नातेग आचा चाजी कातानो आय एनी मेन्डा। (आदयाय 5-7)
2. ईसू बारा जान चेलालेरीन ओर चाजूरान कामूल इसाब ती केडीकतानो। (आदयाय 10)
3. मापोरबू जाम्मेनी आंगरूरान इसाब तो चोमजाकतान डाग्गेल। (आदयाय 13)
4. ईसून चेलालेर एर्रानो एनोड, एट्टोत आय एनी मेरचीकतानो। (आदयाय 18)
5. ई जुग तो चेरा चेरी वादेक आरू मापोरबू जाम्मेनी आंगरूरान इसाब एतोड वेर्रा एन्डान इसाबूलीन मेरचीकतानो। (आदयाय 24-25)
ई कागेत तो इसाबूल
ईसू मसीयालीन तेरान आरू जेनोम एर्रानो 1:1–2:23
बपतीसमा चियरान एऊना केडीकतानो 3:1-12
ईसू बपतीसमा एतानो आरू चेयतान ओनीन पोरकूरानो 3:13–4:11
ईसू गलील पेरगेन ती केडीकतानो 4:12–18:35
ईसू गलील पेरगेन तीग पात्ती एरूसेलेम आर्रे केडीकतानो 19:1–20:34
ईसू एरूसेलेम आरू आली पालीत पोलूबूल ती केडीकतानो 21:1–27:66
ईसू जियोम पाड्डी किली लोगूग देका पाडरानो 28:1-20