ईसू जेनोम एर्रानो
2
1 आ वादेक आगूसतूस एन्डान पिदीर तो रोमी देचेत केसर कोस देचा चेलाकपेक जाम्मा रोमी देचेतa लोग आपलेन-आपलेन पिदीर लिकाकतानो आय एनी डोन्डामाल पायतेड।
2 ई पोईल पिदीर लिकूरान वादेक किवरीनीयूस एन्डानेड सूरीया पेरगेन तो राजपाल मेनेक एरी मेन्डू।
3 जाम्मा लोग पिदीर लिकाक आपला-आपला बुवेर दादीलेर गेड़ेल ती चेन्डेर।
4 आदूग यूसूप बेले तान दाऊदीन तेरानतेड मेन्डानूग गलील देचेत नासरत पोलूब तीग एऊदीया देचेत दाऊदीन गेड़ा बेतलेएम ती चेन्डेड।
5 ओड तानूंग आडी मेन्डान मरीयमीनोड पिदीर लिकाक आना चेन्डेड।
आतोड आद मेन ती तेबी मेन्डू।
6 ओर आना मेनेक आदूग पाईंग एर्रान दिना पूरोतो।
7 ओरूग किराय कुड़ीये ती पाड टोन्डा कान्डूग आद तान्न पोईलात चिन्डीन जेनोम चिय किली ओनीन गान्डे ती आलची किली चाकूरतोल तो ओडे ती चोंगीतो।
गाडीकूलूग सरग दूतकूल काबेर चियरानो
8 आ देचेत गाडीकूल आन्डेक गोटान ती मेन्नी किली आपला मान्देन राका चाजूरीर।
9 पोरबून ओक सरग दूत ओर लेग्गाट वेरी किली देका पाट्टेड आरू पोरबून चाबाव तीग मेडूरान रेग ओर बोँरेक आट्टोतो।
आदूग ओर निक्के नारचेर।
10 एरोड सरग दूत एके ओरीन,
“नारचूमोर।
चूड़ूर,
आन इमीन निक्के वेड़केत एडो पाटेन वेनपीकतान।
आ पाटा जाम्मा लोगूग एर्रा।
11 इने दाऊदीन गेड़े ती इमीन बाचाकतानेड ओकूर इमूंग जेनोम एञ्ञेड नाड आरू ओडी आय मसीयालb एन्डान पोरबू।
12 आदीन चिना इमूंग इद आय:
ईम ओक पापीन गान्डे ती आलची किली चाकूरतोल तो ओडे ती चोंगीकतानोन बेटूरार” एट्टेड।
13 आनातले उदापड़े आ सरग दूतीन चेंगे सरग दूतकूलीन मान्दा जुवी किली मापोरबून जुवार चाज चाजी देका पाड्डी किली ईटे पोक्केर:
14 “पोडी सरग ती मापोरबूग इजीत तो मान एरको
आरू मोंजीपूर ती ओनूग मेन्न ती वेर्रान लोग चुक ती मेनूंग एरकेर”
एट्टेर।
15 सरग दूतकूल ओर लेग्गाट तीग सरग ती चेन्डान पिटतेल गाडीकूल तामूंग तामी,
“वेरूर आम्मोर बेतलेएम ती पोरबू आमीन पोकरान आकाट एर्रान ई पाटेन चूड़ू चेनार” एट्टेर।
16 ओर जेटके-जेटके चेनी किली मरीयमीन,
यूसूपीन आरू चाकूरतोल तो ओडे ती मेन्डान आ पापीन चूड़ेर।
17 ओनीन चूड़ी किली सरग दूत तामीन पोक्की मेन्डान आ चेपालीन इसाब तो पाटेन ओर पारगोड पोक चिञ्ञेर।
18 आरू आदीन वेनदान जाम्मा लोग गाडीकूल पोकरान आ पाटेलीन वेन्नी किली काबा एञ्ञेर।
19 एरोड मरीयम जाम्मा पाटेलीन आपला मेन्न ती इड्डी किली चुरता चाजूरू।
20 एटे ओरीन पोक्की मेन्डीर आटनी जाम्मा एर्रानोन गाडीकूल वेन्नी किली आरू चूड़ी किली मापोरबून पिदीर पात्ती किली चाराकतेर आरू ताम्म मान्देकेल मेल्लेर।
ईसून चेटी चाजूरानो
21 तेबे आँट दिना पूरा एर्रानूग पापीन जियोम पाड तो तीप तोलीन कुड्डी किली ओन पिदीर ईसू इट्टेर।
इयची पिदीरीन सरग दूत मरीयमीन मेन ती तेबूरान ले मुन्नी पोक्की मेन्डीड।
22 मूसालीन नियोम ती लिका मेन्डान आकाट पाईंग एर्रान पिटतेल रीती रिवाजूल चाजी किली ओगराक एर्रान दिना पूर्रानूग मरीयम आरू यूसूप ओनीन पोरबून मुन्देल ओपीक चियू एरूसेलेम गुडी ती उञ्ञेर।
23 (“गेरोब तीग जेनोम एर्रान पोईला तो पोत आरू चिन्ड जाम्मा पोरबूग एलगाक एर्रार”c एनी पोरबून नियोम ती लिकूरानो मेन्डानूग आटनी चाजेर।)
24 पोरबून नियोम तो लिकेन आकाट “ओक जोड़ी बोड़ेल चिलाड पांरवेन इरडू पापकूलीन”d एन्दरी किली जेतरे ती चोत्तीक बेले आना चेन्डेर।
25 आतोड एरूसेलेम ती सिमीयोन पिदीर तो ओकूर मांजा मेट्टेड।
ओड देरमी आरू बोकतीत मांजा मेट्टेड।
ओड मापोरबू मसीयालीन चोटची किली इसराएल लोगीन जियोम मान्डाकतान बेरा एतोड एदूरा एनी काची मेन्डीड आरू ओन पोडे नाती केचूर चिला जियोम मेन्डीड।
26 नाती केचूर चिला जियोम तीग ओनूग “ईन पोरबून मसीयालीन चूड़ाका चायाता” एनी पारगाकतानो मेट्टो।
27 ओड नाती केचूर चिला जियोम तानीन उसकाकतानूग गुडी ती वेञ्ञेड।
ईय्या बुवा आ पाप ईसून गुडी बीतराम नियोम तो रीती रिवाजूलीन चाजू एन्दरेक,
28 सिमीयोन ओनीन आपला केय्यूल ती पात्तेड आरू मापोरबून जुवार पोक्की किली,
29 “ए,
सावकार!
एपोर ईन आपला कामीयालीन पाटा चियी मेन्डान आकाट
चुक ती पाव चिय।
30 लोगीन बाचाक ईन चोटतानेडीन आन्न बोम्मेग चूड़ेन।
31 आदीन ईन जाम्मा देचेत लोगीन मुन्देल तायार चाजोत नात।
32 ओड एऊदीकूल चिला लोगूग चेत्तीन पारगाकतान विलीजीन आकाट मेन्नी किली
इम इसराएल लोगूग पिदीर काट्टीकताड” एट्टेड।
33 ओन ईय्या आरू बुवा ओन इसाब ती पोकरान ई पाटे तीग काबा एञ्ञेर।
34 सिमीयोन ओरूग आसतीर चियी किली ओन ईय्या मरीयमीन,
“चूड़ ऊड गो इसराएल ती कुबे लोगीन उरकीकताडe आरू चुनतीकताडf आरू ऊड कुबे लोग विरूदी एर्रान मापोरबू तेबाक मेन्डान ओक चिनेन आकाट मेन्डाड।
35 आदूग कुबे मेन्न तो बिचारूल पारगोड एर्रानूग इन जियोमीन बेले कान्डेनोड उचरान आकाट बावूरा” एट्टेड।
36 आतोड आचेर एन्डान कुटूम तो पानूयेलीन तेरान तो माल,
आन्ना पिदीर तो मापोरबून कान तीग काबेर वेन्नी किली लोगीन पोक चियरान गुरू ओकाल आना मेन्डू।
आद निक्के मुरताल मेट्टो आरू चुरचा एर्रान पिटतेल चात बेरेक आपला माईडीनोड मेट्टो।
37 आनातले आद नालू कोड़ नालू वेरचीकारूल केटाल मेट्टो।
g आद एतोडी गुडीन चाया मेन्डू आरू नीवता मेन्नी बिन्ती जोड़ी चित्ता विलोमी पाकटा पोकाली मापोरबून मोड़की-मोड़की मेन्डू।
38 आरू आद आयची बेरा आना वेरी किली मापोरबून जुवार चाजू मुरीयाक किली एरूसेलेम तो लोगीनh चोड़ाकतान इसाबूग पाव चूड़ी मेन्डान जाम्मा लोगूग ई पापीन इसाबीन पोकोतो।
39 यूसूप आरू मरीयम पोरबून नियोमूल तो रीती रिवाजूलीन चाजी पोली किली गलील तो आपला गेड़ा नासरत ती मेल्लेर।
40 चेपाल चान्दी किली बेरकेच एञ्ञेड आरू निक्के आकेल बेटेड।
मापोरबून देया ओन पोडे बानी मेन्डू।
पाप ईसू मापोरबू गुडी ती तेब चेन्डानो
41 ईसून ईय्या आरू बुवा एरूसेलेम ती मापोरबू आड़ञूरान पसक तियार तिनूंग बेरचाने चेन्डीर।
42 आटनी,
ईसू बारा बेरेकतेड एरी मेनेक ओर रीती रिवाजूलीन मानू आरू तियार तिनूंग एरूसेलेम चेन्डेर।
43 आरू तियार पोलान पिटतेल ओन ईय्या बुवा मेल्लेक चेपाल ईसू एरूसेलेम ती तेब काट्टेड।
ताम्म ईय्या बुवा एके ओड तेबेड एनी पूनेर।
44 ओर ओड पाव ताकूरान ताम्म लोगीन चेंगे मेन्डाड एनी किली ओकेच तो पाव ताकेर आरू ताम्म कुटूम तो लोगीन कान आरू पुन्दान लोगीन कान कान्डूक मुरीयाकतेर।
45 एरोड बेटा कान्डूग कानची-कानची एरूसेलेम टिटाक मारी मेल्ली वेञ्ञेर।
46 आरू मुचीच तीग ओर ओनीन गुडीत कोरी ती एऊदीकूलीन नियोमूलीन मेरचीकतानेरीन नाड़बूल उन्डी किली ओर पाटेल वेनदानोन आरू ओर पाटेल तो जाच आडूरानोन चूड़ेर।
47 आरू ओन पाटेलीन वेनदानेर जाम्मा ओन गियान तीग आरू ओन पाटेल तीग काबा एर चेन्डेर।
48 ताम्म ईय्या बुवा ओनीन चूड़ी किली काबा एञ्ञेर आरू ओन ईय्या ओनीन,
“ए!
बाबू ईन आम्म चेंगे नांग ईटे चाजोत?
चूड़ इम बुवा आरू आन किसीयाक किली इनीन कानतूम” एट्टो।
49 ओड ओरीन,
“ईम आनीन नांग कानतूर?
नातो आनूंग आम्म बुवेनेल मेन्डानो ई आय एनी ईम पूना मेन्डूर आदूग?”
एनी पोक्केड।
50 एरोड ओर एके ओड नातो पाटेन पोक्केड एनी चोमजू ओड़ेर।
51 आनातले ओड ओर चेंगे नासरत गेड़ा वेञ्ञेड आरू ओर पाटेलीन मानी किली चेलेड।
ओन ईय्या एके ई जाम्मा पाटेलीन आपला मेन्न ती पात्ती मेन्डू।
52 मारी ईसू आकेल आरू मेन आरू मापोरबून आरू मांजेन देये तीग चान्दारे चेन्डेड।