एऊना बपतीसमा चियरान पाटा
3
1 तिबीरीयूस केसर एन्डान कोस देचेन चेलाकतान पोन्दरा बेरेक ती पोन्तीयूस पिलातूस एऊदीया देचेत राजपाल मेनेक,
एरोदेस आन्तीपास गलील देचे ती आरू ओन तोल्लेड पिलीपूस इतूरीया आरू तारकोनीतीस राज ती आरू लिसानीयास आबीलेन देचे ती राज चाजूरीर।
2 आतोड आन्ना आरू कायपा एन्डानेर मापोरबून मुकीयाल पेलाचकूल मेन्डान वादेक मापोरबून पोद्द जकरीयेन चिन्ड एऊनेन कान चिड़ा बाट ती एदोतो।
3 आदूग ओड एरदन पेरेड लेग्गाट तो गुलाय देचेल ती वेरी किली,
“मापोरबू इम पापदेरोमीन माप चाजू मेन्न बावोड मेन्नीन उजराकपूर आरू बपतीसमा एपूर” एनी मेरचीकतेड।
4-6 मापोरबून कान तीग काबेर वेन्नी किली लोगीन पोक चियरान एसाया गुरून कागेत ती ईटे लिकूरानो मेन्डा:
“कोसकूल चेन्डान पावीन तायार चाजी मेन्डान आकाट
पोरबूग इम मेन्नीन तायार चाजूर।
ओन चेड़ेकूलीन टिट्टे चाजूर।
a
ओक-ओक गिड़येल कोप्पीक एर्राव आरू ओक-ओक कोप्पेल तो डेंग चामकनाय एर्रा
आरू बाकड़ी पावूल टिट्टे एर्राव।
कोदरेल डिपकेल पाटी एर्राव।
आरू जियोम मेन्डान जाम्मा,
मापोरबू एटे लोगीन बाचाकताड
एन्डानोन चूड़रार एनी किली चिड़ा बाट ती ओकूर कूयूरान पोल्ला वेनूंग एरमो”b
एनी लिकेड नाड।
7 ओड लिकूरान आकाट एऊना तान्न कान बपतीसमा एक पेची किली वेर्रान जोप तो लोगीन,
“ए किरीच बाम्बीन पापकूल आकाट तो एड़जालेरे!
वेर्रान डेन्ड तीग बाचू लेक ती मेन्नी तूलेरपूर एनी इमीन एड आय पोक्केड नाड?
8 ईम मेन्नीन उजराकतोर एन्डानोन टोटीकतान तिर्राट पालकूल आकाट तो रेच्चाट कामूल चाजूर आरू आपलेन मेन्न ती ‘आम्म बुवा इबराईम आय;
आदूग आम डेन्ड बेटामा’ एनी पोक्कू मुरीयाकूमोर।
मापोरबू ई केलकूल तीग इबराईमूग पापकूल जेनमाक नाम्बीकताड एनी आन इमीन पोक्कूमेन।
9 आरू एपोर मेरकूल मोदेल ती माड़ीन इडरानो मेन्डा।
रेच्चाट पालकूल पाताकोड आवीन कात्ती किली किच ती कुमरार।
आटनी मापोरबू मेन्नीन उजराकपा लोगीन आपला लोगीन कान तीग गुचाक तायार मेन्डाड” एट्टेड।
10 लोग ओनीन,
“आटेकोड आम नातो चाजूराम गो?”
एनी जाच आडेर।
11 ओड ओरीन,
“एरूग-एरूग इरडूकेच कुड़तेल मेन्डाव,
ओर एरूग चिल्लाव ओरूग पायची चियूर आरू एरूग तिन्दान उन्डान बानील मेन्डाव ओर बेले आटनी चाजेकेर” एट्टेड।
12 पोटी पातरानेर बेले बपतीसमा एक वेञ्ञेर।
ओर ओनीन,
“ए,
गुरू आम नातो चाजूरानो आय?”
एट्टेर।
13 तेबे ओड ओरीन,
“लोग एंगोट चियू लागूरा आदूग ले आगेर पात्तूमोर” एनी पोक्केड।
14 आनातले ओदो पालटेनकूल बेले ओनीन,
“आम नातो चाजूरानो आय?”
एनी जाच आडेर।
आदूग ओरीन,
“ईम एरीनी ओरबोर चियी किली आरू पोका बोदी चियी किली पोयसेल पात्तूमोर आरू आपला कामेय एर्रा एनी मेनूर” एनी पोक्केड।
15 लोग मसीयालीन पाव चूड़ चूड़ी मेन्डीर आरू जाम्मा लोग आपला-आपला मेन्न ती ऊडी काय मसीयाल एर्राड,
एनी एऊनेन बीतेर ती उवाट चाजूरीर।
16 तेबे एऊना ओर जाम्मेनीन,
“आन नीरोड बपतीसमा चियमेन।
एरोड आन्न ले बेड़तेड ओकूर वेर्राड।
आन ओन पानेयूल तो टोडूलीन कुयकीक चियरान ओन कामीयाल एर्रान बातेरतेन बेले एरान।
ओड इमूंग मापोरबून नाती केचूर चिला जियोमोड आरू किच्चोड बपतीसमा चियराड।
17 तान्न टुटीकतान केटी तान्न केय्य ती मेन्डा।
आदीनोड ओड गोंगकूलीन तुलाक किली पोल्लीन एलगाक किली गोंगकूलीन डिकी ती इडराड आरू पोल्लीन एतोडी चिटा किच ती तीनताड।”
18 आटनी एऊना “मेन्नीन उजराकपूर” एनी केडीक किली मापोरबून एडो पाटेन लोगीन वेनपीकतेड।
19 आतोड गलील देचे ती राज चाजूरान कोस आन्तीपास एरोदेसीन,
तान्न तोल्लेड पिलीपूसीन आडेय एरोदीयासीन चेत्तूग एऊना कावडेड।
कोस आदीन उबराक किली राकी मेन्डीड।
आरू कोस चाजूरान जाम्मा कियाल तो कामूलीन चेत्तूग बेले एऊना ओनीन कावडेड।
20 मारी एरोदेस एऊनेन जेल ती केटपीक किली आवीन ले बेले बेड़तो कियाल तो काम चाजेड।
ईसून बपतीसमा
21 जाम्मा लोग बपतीसमा एपेक ईसू बेले बपतीसमा एची किली बिन्ती जोड़ेक सरग चानची एञ्ञो।
22 आरू नाती केचूर चिला जियोम पांरवा आकाट मेन एरी किली ईसून पोडे इड़ेड आरू “ईन आन्न लाडराल चिन्ड आय।
ईन आनूंग मेन्न ती वेर्रानोत आय” एनी सरग तीग ओक पोल्ला वेनूंग एञ्ञो।
ईसून तेरानतेर
23 ईसू,
मापोरबून पाटेलीन मेरचीक मुरीयाकपेक तीस बेरेकतेड आकाट मेन्डीड।
ओनीन ऊड यूसूपीन चिन्ड (एनी लोग चोमजूरीर।)
यूसूप एलीन चिन्ड मेट्टेड।
24 एली मात्तातीन चिन्ड,
मात्तात लेवीन चिन्ड,
लेवी मलकीन चिन्ड,
मलकी एन्नालीन चिन्ड,
एन्नाल यूसूपीन चिन्ड आय।
25 यूसूप मत्तीयालीन चिन्ड,
मत्तीयाल आमोसीन चिन्ड,
आमोच नाऊमीन चिन्ड,
नाऊम आचल्यालीन चिन्ड,
आचल्याल नोगालीन चिन्ड आय।
26 नोगाल मात्तालीन चिन्ड,
मात्ताल मत्तीयालीन चिन्ड,
मात्तीयाल चिमीन चिन्ड,
चिमी योचेकीन चिन्ड
योचेक योदालीन चिन्ड आय।
27 योदाल एऊनेन चिन्ड,
एऊना रेचालीन चिन्ड,
रेचाल जरूबाबीलीन चिन्ड,
जरूबाबील सालतीयेलीन चिन्ड
सालतीयेल नेरीन चिन्ड आय।
28 नेरी मलकीन चिन्ड,
मलकी आदीन चिन्ड,
आदी कोसामीन चिन्ड,
कोसाम इलमोदामीन चिन्ड,
इलमोदाम एरीन चिन्ड आय।
29 एर एओसून चिन्ड,
एओसू इलाजारीन चिन्ड,
इलाजार योरीमीन चिन्ड,
योरीम मात्तालीन चिन्ड,
मात्ताल लेवीन चिन्ड आय।
30 लेवी सिमोनीन चिन्ड,
सिमोन एऊदेन चिन्ड,
एऊदा यूसूपीन चिन्ड,
यूसूप योनानीन चिन्ड,
योनान इलयाकीमीन चिन्ड आय।
31 इलयाकीम मयलेआल चिन्ड,
मयलेआल मिनालीन चिन्ड,
मिनाल मात्तालीन चिन्ड,
मात्ताल नातानीन चिन्ड,
नातान दाऊदीन चिन्ड आय।
32 दाऊद इसेन चिन्ड,
इसे ओबेदीन चिन्ड,
ओबेद बोआजीन चिन्ड,
बोआज सलमोनीन चिन्ड,
सलमोन नयसोनीन चिन्ड आय।
33 नयसोन आम्मीनादाबीन चिन्ड,
आम्मीनादाब आदमीन चिन्ड,
आदम अरनीन चिन्ड,
अरनी इसरोनीन चिन्ड,
इसरोन पिरीचीन चिन्ड,
पिरीच एऊदेन चिन्ड आय।
34 एऊदा याकूबीन चिन्ड,
याकूब इसाकीन चिन्ड,
इसाक इबराईमीन चिन्ड,
इबराईम तेरालीन चिन्ड,
तेराल नाओरीन चिन्ड,
35 नाओर चरूगीन चिन्ड,
चरूग रऊन चिन्ड,
रऊ पिलीगीन चिन्ड,
पिलीग एबीरीन चिन्ड,
एबीर चिलालीन चिन्ड आय।
36 चिलाल केनानीन चिन्ड,
केनान अरपकजदीन चिन्ड,
अरपकजद चेमीन चिन्ड,
चेम नूवालीन चिन्ड,
नूवाल लिमीकीन चिन्ड आय।
37 लिमीक मातूचीयालीन चिन्ड,
मातूचीयाला अनोकीन चिन्ड,
अनोक ईरीदीन चिन्ड,
ईरीद मअलेलीन चिन्ड,
मअलेल केनानीन चिन्ड आय।
38 केनान इनोचीन चिन्ड,
इनोच चेतीन चिन्ड,
चेत आदमीन चिन्ड मेट्टेड।
आरू आदम मापोरबू गेड़रानेड आय।