7 Gahagai duka' sampim bulu beke la sapulo mesa lamba'na la mendadi papana sitonda hindinna indo Kema Kapenombaam lapi' kaduanna. 8 Mesa oi indo sampim bulu beke tallu pulo oom singkum kalandona anna appa' singkum kalua'na. Dadi, indo sapulo mesa lamba'na sampim la pada-pada kalua'na anna kalandona. 9 Lima lamba'na la umpasiampim-ampim mendadi salamba', anna annam lamba'na la umpasiampim-ampim duka' mendadi salamba'. Indo to annam lamba'na dipasiampin-ampim, la ulluppi' tängä indo ampim kaannanna mendadi pelapa' dio olona indo kema. 10 Talinga-lingai dio bihinna indo sampim diampim uhuna la lima pulo talinga-linganna, anna lima pulo siam duka' indo sampim diampim kaduanna. 11 La unggahaga duka' lima pulo pekädä-kädä tembaga la umpapia, anna umpasikädänni talinga-linganna indo dua lamba' sampim to puha diampim, anna mala silombum mendadi salamba'. 12 Indo to lima lamba'na dipasiampim-ampim la kadobe-dobe ia bahe duanna dio boko'na indo Kema Kapenombaam aka dipopelapa'um bahe duanna dio olona. 13 Bihinna indo sampim bulu beke pabäi kadobe-dobe sisasingkungam patomali sa'dena indo Kema Kapenombaam mendadi pelapa' sa'de. 14 La unggahagapi duka' pesambona sitonda hindinnam indo kema salapi' lollo' domba laki diwante' malea, anna lollo'na olo'-olo' malängngo' la umpalapi'iam polepi yabona.

15 La unggahaga duka' andihi dipasiundu' dikatea'i alla'na kaju akasia la umpapia mendadi pahamaka'na indo Kema Kapenombaam. 16 Mesa oi indo andihi dipasiundu' dikatea'i alla'na sapulo oom singkum kalandona anna sasingkum satangnga alla'na indo andihi dipasiundu'. 17 Mesa oi too indo andihi dipasiundu' bassim diotim oom dio tämpä' tando dokkona anna mala sitohoi. La umpateem asammi too pada indo andihi dipasiundu'na Kema Kapenombaam. 18 Papiai dua pulo andihi dipasiundu' la dio sa'de tandai selatanna indo Kema Kapenombaam, 19 anna gahagai appa' pulo pentokoam peha' la napentokoi indo dua pulo andihi dipasiundu'. Dua pentokoam mesa oi indo andihi dipasiundu', nasimesai indo dua otinna. 20 Susi toi duka' sa'dena indo Kema Kapenombaam tandai utara, gahagai dua pulo andihi dipasiundu' 21 anna appa' pulo pentokoam peha'. Dua pentokoam mesa oi indo andihi dipasiundu'. 22 Dio boko'na indo Kema Kapenombaam, battu diua tandai katampusam, gahagai ia annam andihi dipasiundu'. 23 La umpapia polepi duka' dua andihi dipasiundu' dio sikunna patomali dio boko'na indo Kema Kapenombaam. 24 Indo dua andihi dipasiundu', la dipaundu'iam polepi indo andihi dipasiundu' dio sikunna sipatomaliam mengkalao dio sule längäm la napasianda'i susi galege'-lege'. 25 Dadi, la kahua andihi dipasiundu' dio boko' sitonda sapulo annam pentokoanna peha' dipapia, dua pentokoam mesa oi indo andihi dipasiundu'.

26 La unggahaga duka' sapulo lima pesulu' kaju akasia la umpapia, lima pesulu' dio sa'de mesanna indo kema, 27 lima pesulu'na dio sa'de kaduanna, anna lima pesulu'na indo andihinna Kema Kapenombaam dio boko', battu diua tandai katampusam. 28 Indo pesulu' illaam tängäna andihi, la umpadekke' bahe tängäna längäm indo andihi dipasiundu', salolo tungngette' mengkalao dio tämpä' sabalinna sule lako tämpä' sabalinna. 29 Indo andihi dipasiundu' la sangngim ussapu' bulabam; indo galege'-lege' la dipassollo'i tama pesulu' la bulabam dipapia; anna indo pesulu'na la ussapu' bulabam. 30 Pake'de'i Kema Kapenombaam la umpasusii indo to kupaitaiangko yabo inde tanete.

31 La unggahaga sampim pesapa', bännä malibulum, bännä mellolo pao, bännä kasa eja, anna bännä linen malängngo' la ditannum. La disumma' gamba'na kerub dio, napapia to majatta massumma'. 32 Gahagai appa' andihinna indo sampim pesapa', kaju akasia la umpapia la disapu' bulabam, anna padekke'i indo sampim pesapa' lako indo passedangam bulabam dio indo andihi, anna la dipopentoko indo andihi dokko appa' pentokoam peha'. 33 Indo sampim pesapa' la umpadekke' sipatu yabo mai indo pekädä-kädä to umpasianda'i indo sampim dipopapa. Anna mane umbaba tama indo Patti Pa'dandiam, paillaanni tandai tamanna indo sampim pesapa'. Indom too sampim pesapa' la mualla'i Tambim Maseho anna Tambim Handam Maseho. 34 Anna mane untutu'i tutu' diongei diampunni dosa indo Patti Pa'dandiam illaam indo Tambim Handam Maseho. 35 Indo meja ongeanna hoti dipehumalasam, la umpaillaam tando illaanna mai indo sampim pesapa', illaam sa'de tandai utarana Kema Kapenombaam. Anna pake'de'i indo andihi lampu illaam sa'de tandai selatanna Kema Kapenombaam sitingngajo indo meja.

36 La umpapia duka' sampim pesapa' la ditutu'iam ba'bana indo Kema Kapenombaam, bännä malibulum, bännä mellolo pao, bännä kasa eja, anna bännä linen malängngo' ditannum la disumma' sanda dio hupanna. 37 La unggahaga lima andihi, kaju akasia la umpapia la umpantoke'i indo sampim pesapa' anna la ussapu' bulabam. La deem passedanganna, bulabam la umpapia, anna la untollo lima pentokoanna tembaga la napentokoi indo andihi.”