Labu' kamasannangam di lino
49:1-21
49
1 Lu lako to untetem to menani. Pampujiam napapia pessubunna Korah.2 Patananniia' talingammu, o inggannako hupatau,
palempei sulim patomalimmu, o mentu'nako issinna lino,
3 susi to bahinni' teem to kasalle,
susi to mase-mase teem to makaka tä' deem se'lana!
4 Pudu'ku la umpassubum tula' ponno kakeakasam,
issi penabangku mebeem kapaissangam.
5 La kupatananni talinga tula' to keaka',
la kupomasiä' kalembasanna kada passelonni kupasindum ma'katapi.
6 Akanna la mahea'ä' muoloi wattu kamasussaam,
wattunna nalimbu tamaä' balingku to tameada',
7 to umpopa'attaham katomakakaanna,
anna umpa'kassiam kulle budanna?
8 Tä' deem moi podo la mesa tau la mala ussolom solana,
battu haka la ullombunni sungnga'na dio oloNa Puang Allataala.
9 Aka tä' deem pada samasuli' pelombunninna sungnga',
moi la aka tala malai disolongam,
10 lambi' tubo sule lako salako-lakona,
lappa' dio mai ba'ba talumbä.
11 La nakannassai, naua: to keaka' naande kamateam,
to maho anna to takepikkiham, pada-pada naande kamateam,
anna ingganna kulle pa'tampena la napota'gena tau senga'.
12 Ku'bu'nam la napobanua sule lako salako-lakona,
la naongei tohho situngguam;
ingganna litä'na yolona nakona mandam.
13 Sapo' moi la umba susi katomakakaanna hupatau, tä' siam la da'da' liu;
la pa'de siam umba susi olo'-olo' mate.
14 La susim too ullambi'i to uhhannuam kamatohoam kalena,
katihotosanna to umpopa'attaham pangngoko di tambu'na. Sela
15 Susi domba, sangngim tinanda lako kaliane anitu,
nakuasai kamateam;
la nadakka' to meada' wattu mebengngi',
bosi bätä puntinna dio ongeam to mate,
sikambelam ongeam kamasannanganna.
16 Sapo' Puang Allataala la ullangnga'i sungnga'ku,
dio mai pantakka'na kaliane anitu,
napatinanda dio olo kamatandeanNa. Sela
17 Daa ummahusa' ke tomakakai mesa tau,
anna tuttuam längäm katuboanna illaam dapo'na,
18 aka matei too tä' siam la umbaba katomakakaanna,
tä' siam la umbaba kullena lako ku'bu'.
19 Moi la masannam katuboanna inde lino,
moi la napakate'de' hupatau
aka manähä ussalu salukatuboanna,
20 sapo' la tinanda siam duka' lako ongeanna nene to naponene,
tala deemmi muita pole paindona masiä sule lako salako-lakona.
21 Hupatau to ponno yabo ponno dio, sapo' tamuissam se'la,
la pa'de siam, umba susi olo'-olo' mate.