Malino masannam to nahande pala' nakulambu tahuno DEBATA
125:1-5
125
1 Penaniam muende' Yerusalem.Menna-menna matappa' längäm DEBATA,
la sihhapam tanete Sion tatilenggu' tatibosso',
tatibeho susu' tatidende katonam sule lako salako-lakona.
2 Umba susi mentu'na tanete ullilim pali' Yerusalem,
susim too duka' DEBATA uhhande pala' ungkulambu tahuno umma'Na,
mengkalao temo sule lako salako-lakona.
3 Anggam la salängäm allo muanda'i kakuasaam to tameada'
illaam botto litä'na to meada' to namanasam DEBATA,
anna mala indo to meada'
tä' sola pa'palakoam to tameada'.
4 O DEBATA, beenni kamapiaam lako to mapia penaba,
anna to malolo penaba;
5 sapo' lu lako to sassa' lalam,
la napempa'deam di too DEBATA sola ingganna to umpogau' kakadakeam.
La untammu hi too kamalinoam sola kamasannangam to Israel!