Pepatettena kakeakasam
3:1-26
3
1 O änä'ku, daa ungkalembei pepatuduangku,sapo' la umpaillaam penabako pahentaku,
2 anna malako ma'tammu ubam ma'lullum buha-buha,
anna ussi'dim kamalinoam sola kamasannangam illaam salukatuboammu.
3 Daa umpasilappa' kalemu pangkaha' pa'kamase anna kamanontongam!
La umpelluä illaam bahokomu sihhapam mani',
anna la umpatianna illaam unä' penabammu.
4 Ianaanna umpateenni, la untammuko pa'kamase anna kesanga mapia
dio oloNa Puang Allataala anna hupatau.
5 Mahannuko längäm DEBATA sola sakalebu penabammu,
anna daa uhhannuam pikkiham kalemu.
6 Paihandannai DEBATA illaam ingganna pa'palakoammu,
anna mala nahampasangko lalam la muolanna.
7 Daa umpa'tokeaka'-aka',
pengkahea'ko längäm DEBATA anna pasikambelai kalemu kakadakeam;
8 ianaanna umpateenni, la napobono' bätä puntimmu
anna napomaläpu' kalemu.
9 Pakei kullemu umpuji umpa'kasallei DEBATA,
babai uhuna bua pengkähämu dio oloNa,
10 anna mala dipallapi'i ingganna lokomu,
anna lempam pole pa'pongngeam anggurmu.
11 O änä'ku, daa umpa'bahinni'i pepanännä'Na DEBATA,
daa umpasuhhä' buamu ke natappakadaiko.
12 Aka DEBATA untappakadai to nakaha'i anna nakamasei,
umba susi mesa ambe untappakadai änä' pa'pakamajanna.
13 Maupa' anna katambasam to ullambi' kakeakasam,
anna to ullolongam kamanähängam,
14 aka keguna puha ia muampuam kakeakasam anna la muampuam peha',
la'bi puha ia anna la bulabam,
15 keangga' puha ia anna la batu permata.
Ingganna aka-aka umpohäena tä' deem la umpapadai kakeakasam.
16 Lima kananna naongei buttu kamahendengam,
anna lima kaihinna naongei lemba' katomakakaam sola pa'pakasalle.
17 Kakeakasam mepatette muola lalam kamasannangam,
meundu' ullingkai lalam kamalinoam.
18 Kakeakasam sihhapam kaju katuboam lako to mengnganti manda' mentobe matoto' lako,
maupa' anna katambasam to muoli'i mamma' ussalungkui metindo.
19 Kakeakasam napake DEBATA umballa' lino,
anna kapaissangam napake ungkumbä langi',
20 kapaissanganNa napake umpopa'kalimbuä uwai dio mai tando dokkona lino,
anna gabum yabo langi' umpatuhum langullo.
21 O änä'ku, antii manda' tobei matoto' kakeakasam sola pikki' pali',
oli'i mamma' salungkui metindo.
22 Ianaanna umpateenni la tubo mahendengko,
anna la sihhapam mani' bulabam illaam bahokomu.
23 Tala dondom bulu salamba'mu tala tobä bulu sangkahohimmu,
anna tatitedoko tatiassam illaam pellaoammu.
24 Tala deengko nahua kamaheasam dio petindoammu,
anna la happa' penabammu mamma'.
25 Daa ummahea' ke deenni sule säkä-säkä la mepakahea'na,
battu haka katilakaam la uhhua to tameada'.
26 Aka la nakambi'ko najagai DEBATA,
anna la napasikambelako poja bendo' samelum buaja.
Pesasum la ma'gau' mapia
3:27-35
27 Daa umpomabanda' penabammu umpogau' kamapiaam lako to la sipäto' untahimai,
ke mala mammi umpogau'.
28 Daa muuaam padammu ma'hupatau: “Le'ba' poko yolo makale'pa ussule, mane kubeengko,”
ke deem mammi lako kalemu indo to napelau.
29 Daa umpattujuam kakadakeam sambanuammu,
aka tä' deem kabata-bataanna tohho dio ampe'mu.
30 Daa ussängä' deem anna sipengkangko padammu,
ke tä' mammi deem napogausangko kakadakeam.
31 Daa ungkembuhui kullena to palampi,
anna daa muolai lalanna.
32 Aka nakabassi ia DEBATA to sassa' lalam,
sapo' sangkalamma' ia to meada'.
33 Tohho tädoNa DEBATA illaam banuanna to tameada',
sapo' untamba' ia banuanna to meada'.
34 DEBATA untelle to mantelle,
sapo' ungkamasei to mahempo penaba.
35 To keaka' la umpaipala' sanga mapia,
sapo' to maho la nahuham ia longko'.