Shiyanso 43

UBenyamini na vamaame viiluta ku Misili

1 Lino ukho ku Kanaani, injala yaava nkhome mandu. 2 Ishakiilya shina vagulaga kihuma ku Misili shaganile kisila, uYaakobo wávajovela avanaakwe, “Wuyiili ku Misili, mutugulile ishakiilya ishinji.”

3 Leelo, uYuuda wámujovela uwihaanave wáaja, “Umukhome yula wátukhaana kwa kikuviilisa, wáajova, ‘Nda musikhayinsa nu munangʼana weenyu, musikhawonana noone.’ 4 Nda uyitishe tilute lumo nu munangʼana weesu, tisiilute tikugulile ishakiilya. 5 Leelo nda ukhaane kiluta lumo na woope, ose tisiiluta, kwa kiiva yula umuunu wátujovelaga kiija, ‘Nda musikhayinsa lumo nu munangʼana weenyu, musikhawonana noone.’”

6 Apo baheene uIsilaheli wávajovela, “Kwashi mwanileetela amalava, pina mwamujovela umuunu yula kiija muna munangʼana weenyu?” 7 Woope vamujovela, “Umuunu yula wátuposelesaaga mandu ose ni shikholo sheesu wáaja, ‘Uwiheenyu ashaanali muumi? Muna munangʼana weenyu uyunji?’ Lino ose, tamugomosesaaga ngaja shina wátuposaaga. Ndi tamanyaga wuli kiija asiijove, ‘Mumuleete umunangʼana weenyu’?”

8 Apo, baheene uYuuda wámujovela uIsilaheli uwihaanave, “Lekha tilute lumo nu munangʼana weesu, baheene tigahe nyangu kigula ishakiilya, baheene ose, owe na vaneesu tikulushe injala. 9 Shiyooli one yuune nayikhomenkhania kimuloleela, nda nisimutiniise umwaje khanji, munipiikhaje shiluta. 10 Shiyooli taali tive tisidiilile kipulinkhana, taali tiiva tilutile na kitina mala khavili.”

11 Apo baheene uwihaanave wávajovela, “Nda yive ndeeno, gahi shiisho. Lino tooli ifiinu fimonga ifinofu ifya mu nyi yeesu, five fya kimupeela ulutono. Mufiviishe mu mafukho geenyu, mumutwalile umukhome uyo uwa ku Misili. Mumutwalile amafuta amanofu, uwuushi wudoodo, imbeyu sa mapishi sina siliiwa,^a ingaagulwa sina sinunshilila ni fiinu fina finunshilisa ishakiilya. 12 Khanji, twali ihela, sive mala khavili ya sila sina mwatoolaga ulwa wutasi, baheene mutinie sila sina mwasaagaga mu mafukho geenyu. Yikwiliile kiiva vasisamwaga hela. 13 Lutaji lumo nu munangʼana weenyu kwa muunu uyo, lutaji nyangu. 14 UNguluvi uMunya Ngufu Soona, amugahe umuunu uyo avasungupile, baheene amuleshele uSimiyoni umwanangu, hata nu Benyamini muwuyaje lumo nawo. One, nda kifwilwa avanangu, leshi nifwilwe!”

15 Apo, avaana va Yaakobo vatoola ifiinu fila ifya lutono ni hela mala khavili ya sila sina vatoolaga ulwa wutasi. Vaaluta lumo nu munangʼana waanave uBenyamini mbakha ku Misili. Vaganile kifikha ku Misili, baheene vaaluta kwa Yusufu. 16 UYusufu wáganile kimwaga uBenyamini ali na vavaha vaakwe, wámujovela umuyimililaaji wa nanda yaakwe, “Vatwala avaanu ava kukhaaya yangu. Ushinje ishidiimwa shimo na uyandaale ishakiilya, kwa kiiva iminsiyaano paminsi nisiilye nawo ishakiilya.”

17 Umuyimililaaji yula wáagaha ngaja shina akhandi alajisiiwe, wávatwala kukhaaya kwa Yusufu. 18 Vaganile kiwona vitwalwa kukhaaya kwa Yusufu, baheene vayansa kitiila. Vayansa kijovana, “Tiletiilwe kuno kwa kiiva ya hela sila sina satinisiwaagwa mu mafukho geesu ulwa wutasi. Lino isakula imwenshe ya kituyalushila, atumene, atoole idogovi seesu na atugahe tive vavanda vaakwe.” 19 Ndeeno, vamuvejeela umuyimililaaji wa nanda ya Yusufu valogola nawo pa mulyango. 20 Vamujovela, “Wee mutwa, tilomba utupuliise, ose tatalaga tayinsa apa ulwa wutasi kigula ishakiilya. 21 Leelo pina tikhandi tiiwuya kukhaaya, taganile kifikha uluvala ulwa kituuya, tadindulaga amafukho geesu, taswigaga kisaaga ihela isa shila muunu ngaja shishila shina sikhandi sivishiilwe mu mafukho geesu! Lino tasitinia ihela iso. 22 Tiyinsile ni hela isinji kiija, tigulile ishakiilya. Tisimeenye yu naani wáviikhaga ihela mu mafukho geesu.” 23 Umuyimililaaji yula wa nanda ya Yusufu wávajovela, “Muve nu wulindamafu, musikhatiilaji. UNguluvi weenyu na wa wiheenyu yumwene yuna wávapeela ulutono lwa hela mu mafukho geenyu. One nayanushilaga amahombo geenyu.” Baheene wámudindulila uSimiyoni kihuma mukhati wámuleeta kwa vamaame.

24 Apo, umuyimililaaji yula wávasaajisa mukhati ya Yusufu. Wávapeela amalenga aga kiyiyooga amagulu na wásipeela idogovi saanave amasole. 25 Avavaha va Yusufu vaviikha wunofu ifiinu fila ifya lutono, fina vakhandi vatoolile ifya kimupeela uYusufu, kwa kiiva vakhandi vapuliishe kiija, vasiilye lumo ishakiilya sha paminsi.

26 UYusufu wáganaga kitina kukhaaya, avamaame vamupeela ifiinu fila ifya lutono, fina vakhandi vamuleteele mukhati yaakwe, baheene vamusungamila mbakha pansi. 27 UYusufu wávahunjila, baheene wávaposa, “Yula umugogolo, uwiheenyu yuna mwanitavililaga imola saakwe, wuli ilamukha? Ashaanali apili muumi?” 28 Woope vamujovela, “Umuvanda waakho uwiheesu apili muumi, ilamukha.” Apo, vamusungamila ulwa wuvili kwa lishima. 29 UYusufu wáganile kivaloleela, wámwaga umunangʼana waakwe uBenyamini, umwana wa maayi waakwe, baheene wávaposa, “Uyu yumwene umunangʼana weenyu yula yuna mwanijovelaga imola saakwe?” Baheene wámujovela uBenyamini, “Mwanangu, uNguluvi akuyimiilile.” 30 UYusufu wáava ni lihaahi likhome kwa kiiva ya kimwaga umunangʼana waakwe, amaanyosi gayansa kilenga lenga, wáahuma nyangu kunja wásakula uluvala ulwa kityega, wáhuluta kumwandi yaakwe, wáyansa kikhoola.

31 Wáganile kimala kikhoola, wáyiyooga ku meeho, baheene wáahuma apo kuno ikiyisivila, wálajisa iijova, “Leeti ishakiilya.” 32 Vamuleetela ishakiilya shaakwe mwene duguli, avamaame woope shaanave, aVamisili vina vakhandi apo, shakiilya shaanave. AVamisili vasiilya lumo na Vahebulaniya, kwa kiiva aveene kigaha ndeeno, mwikho. 33 Apo, avamaame vakhasiwa pamwandi ya Yusufu, kifwatana shina vatunjilinkheene kisawa, kiyansa umuvaha mbakha umunangʼana. Avamaame vakhandi viloleelana, kuno viswiga. 34 Vapeelwa ishakiilya kihuma pa meesa ya Yusufu, leelo ishakiilya shina wápelwagwa uBenyamini, shikhandi mala khasaanu kishila isha vayine. Baheene vaangʼwa nu mwene mbakha vashendeeva.